محليات ومكسرات - وطني وأخوان - هوا مفيش حد غيرهم؟؟

بينما كنت أتصفح بعض المدونات، دخلت مدونة قطة الصحراء لأول مرة وبدون سابق معرفة، وبالتحديد رأيها الكامل في جماعة الأخوان المسلمين ، والرد عليها في مدونة "مصر إسلامية" (لأول مرة أيضا) بعنوان صولة القطط، ثم وصلت إلي مدونة أخري بعنوان "بحب مصر - إخواني وبعشق مصر" وتحديدا مقالة نحن نكره حزبكم ... وسنسقطكم فى اى انتخابات ودعوتة الي "إلي تدشين حملة المليون رسالة الكترونية أو مكتوبة او موبيل إلي قيادات الحزب وأعضائه البارزين تحتوي علي عبارة " نحن نكره حزبكم وسنسقطكم في أي انتخابات"". ومع أعترافي بحرية الرأي كاملة، ومع تأكيدي علي كرهي الشديد سواء للحزب الوطني (لإنجازاتة العظيمة في خراب بيوت المصريين) أو الأخوان المتنطعين (من الباب للطاق - أو بمعني أصح معنديش وقت أناقش وأرفس معاهم) إلا انني أود تدوين بعض الأفكار بناءا علي المدونات السابقة والتعليقات التي جاءت بهم:

1- يجب الأتفاق في البداية علي أمر:

يجب احترام حرية الرأي لكل شخص مهما كانت فكرتة، فإن قبلتها فيمكنني أن أستزيد منها، وإن رفضتها فيمكن أن ألتفت عنها تماما أو أن أعلق تعليقا محترما يعبر عن رأيي وبدون الدخول في مهاترات ومزايدات. وأوضح أيضا أن حرية الرأي لا تتضمن آراء مرسلة أو تجريح في أخرين بغير أدلة (وحتي بأدلة)، كما لا تتضمن السخرية من أراء الأخرين أو معتقداتهم حتي وإن بدت لنا غريبة أو شاذة.

2- أنا أساند أراء قطة الصحراء تماما، فإن كانت لا تملك الأدلة القوية علي ما تقول، فيمكن الرجوع إلي تاريخ الجماعة لمحاسبتهم سياسيا ويمكن الرجوع إلي كل ما نشر وينشر وسينشر عن خباياهم وأفكارهم ومعتقداتهم، فإن كانت غالبية أعضاء الجماعة من الشباب المثقف المجتهد قد تم خداعة بإستغلال الدين والطهارة، فإنهم - وهم المنتشرون في كل مكان علي النت - يمكنهم أن يقرأوا صفحات وكتب ومقالات كتبها متخصصون جادون عن تاريخ وأفكار الجماعة، وأدعوهم إلي مناقشة هؤلاء الكتاب فيما قالوا ونشروا. وإن كانت قطة الصحراء لا تملك الأدلة، فإنني أردت أن أقول كل ما قالت بل أكثر من ذلك، لولا أنني سأردد كل ما قيل من قبل وليس لدي الوقت الكافي لذلك.

3- إطلعت علي برنامج الجماعة لأنتخابات المحليات، عظيم واللة، كلة جميل ..... بس عارفين، أهو شوية كلام انشا مترتب حلو، وخلاص. حد يقولي فرق اية عن برنامج الحزب الوطني، والا برنامج مبارك والا برنامج حزب الكفتة والا حركة بسبس، أهو كلة كلام وخلاص، طب ما هما عندهم 88 مقعد في مجلس الأنس، عملوا بيهم اية يعني؟؟ طب بلاش دي، في أوروبا والدول المتقدمة مش لازم يكون الحزب أو الجماعة بيحكم علشان يعمل حاجة، الأحزاب والحركات إللي برة الحكومة بتعمل مدارس وجامعات ومشاريع (لكل الناس، مش لأعضاء الحزب بس) ..... نقول الحكومة مقفلة عليهم، طب فين اي حاجة بيعملوها للناس اللي هيا مش من الجماعة ومش عايزين ينضموا للجماعة، فين مثلا الأفران اللي بتبيع عيش لكل الشعب من غير سرقة؟؟ فين أتوبيسات أو ميكروبصات لنقل الناس بأسلوب حضاري؟؟ فين مدارس مجانية (حتي لو باشراف وزارة التعليم) في القري؟؟ بلاش دول، فين 10 أو 20 عمارة كل سنة بأسعار في متناول الناس الغلابة؟؟ ناس كتبوا تعليق عند قطة الصحراء وقالوا عن انجازات الجماعة، وضربوا أمثلة بمدارس في الأسكندرية، مش عارف اية الأسلامية، ومستشفي اية الأسلامي، بردوا أحب أعلق وأقول لازم يعرفوا انهم لو عندهم أمل يمسكوا الحكم يبقي يسيبوهم من حكاية الأسلامية دي، لازم يبصوا علي الشعبية، لكل الناس، لأن مصر فيها مسلمين ومسيحيين، أخوان وأحزاب وأفكار تانية، كلها لازم تحترم وكلها لازم تاخد حريتها في التعبير، ودا اللي مش ممكن يحصل لو الأخوان سيطروا علي أي مراكز، يا أفكارهم يا بلاش، فهم يد اللة الضاربة في الأرض، وهما بس اللي بيعرفوا ربنا والناس التانية لازم تتعلم منهم!!

طب هما لو زي ما بيقولوا انهم القاعدة المصرية العريضة - هيا القاعدة عريضة فعلا - وفي برنامجهم حيشجعوا الجهود الشعبية وتوفير دراسات الجدوي للمشروعات ومواجهة المشكلات الحياتية التي يعاني منها المواطن المصري وغيرة اللي موجود في البرنامج، امال هما كانوا فين قبل كدة؟؟؟ يعني يا يبقوا الحكومة يا بلاش؟؟

دا بيأكدلي ان البرامج دي كلها واحدة، مش حاتتعمل، ماحنا شبعنا برامج من الحزب الوطني لوعايزني أسمعهالكم معندش مانع، أنا ماتكلمتش عن الحزب الوطني لأننا كلنا عارفين انجازاتهم اللي نابعة من برامجهم الأنتخابية.

يا أخوانا الحكاية مش حكاية برامج، كفاية الهلس اللي بتضحكوا بية علي أذنابكم والناس الغلابة، اللي عايز يعمل حاجة بيعمل من غير برنامج ولا انتخابات، أنا اعرف ناس بتساعد بجد وبتدي بجد ومهمش في حزب ولا حركة ولا عندهم أي طموح سياسي.

4- كمان من برنامج الجماعة: الاهتمام بالشباب وغرس القيم الإسلامية ومحاربة الظواهر الهدَّامة الوافدة على ثقافة المجتمع .... مش فاهمها دي، يعني شباب المسيحيين حيغرزوا فيهم القيم الأسلامية؟؟ الا هما صحيح حيعملوا اية في المسيحيين؟؟ دول جزء من المجتمع الأسلامي والا هما "خواجات" والا اية؟؟ بلاش يا ناس المسيحيين، نضحي بيهم مش مشكلة المهم مصر تعيش، انما اية هيا الظواهر الهدامة الوافدة علي ثقافة المجتمع اللي حايحاربوها دي؟؟ مين اللي حايحدد الظواهر دي وحيقرر انها هدامة؟؟ يعني مثلا الفلانتين، حقيقي أنا ما بيمثليش أي أهمية ولا حتي بفكر فية، لاكن في يجي عشرميت مليون مصري بيشتروا ورد أحمر لزوجاتهم وخطيباتهم، بس في رأي الجماعة العيد دا حرام وهدام، هما حددوا كدة، يبقي لازم البهايم المصريين ينفذوا والا حاق عليهم عقاب الرب ممثلا في الجماعة، شكلهم كدة حيمشوا مطوعين في الشوارع زي السعودية!!! يعني ننتخبهم ونسبلهم قفانا هما حيروقوه!!

5- اية حكاية القاعدة الشعبية العريضة دي؟؟ يعني كام مليون مصدقينهم؟؟ طب ما الحاج شعبان عبد الرحيم بيفخر انو عندة بردة قاعدة شعبية عريضة بتسمعلوا!! في ناس قالوا 30 مليون.... مش رقم خيالي شوية؟؟؟ يعني 80% من البالغين في مصر بما فيهم المسيحيين!!! حقيقي حقيقي أنا معرفش أي حد ممكن ينتخب حد من الجماعة دي، وأنا معارفي واصحابي وعلاقاتي كبيرة، بس من غير قاعدة عريضة :)

6- مسكوا علي قطة الصحراء انها وصفتهم بالنفاق، فنطوا وصالوا وجالوا و"احنا منافقين؟؟" "احنا كفرة؟؟" .... لأ هيا في رأيي قصدها نفاق سياسي، كدة وكدة، مختلف عن النفاق في الدين، وفي رأيي أن المقصود هما قيادات الجماعة، لأن باقي أعضاء الجماعة (الـ 30 مليون!!) ملهومش في الطور ولا في الطحين، مسوقين ومغيبين غير مخيرين، ودا اسلوب الجماعة طول عمرها.

7- "ما أسخم من ستي إلا سيدي"، ألا يوجد خيارات أخري؟؟ يعني إما وطني أو أخوان؟؟ لأ في خيارات تانية لو عايزين، ننتخب أشخاص مالهومش في أحزاب أو حركات أو حاجات مشبوهه، أشخاص عايزين يعلو بالبلد مش يخطفوها ويساوموا بيها، أشخاص عندهم ملكة القيادة وبينفذوا فعلا مش مجرد بيكتبوا برامج يبرمجوا بيها الشعب، ولحد دا ما يحصل بقولكم "أنا بكره حزبكم الفاشل وجماعتكم المتنطعة ومش حانتخبكم في أي انتخابات".

معا أمام اللة

عجبني الموضوع: معا أمام اللة - مصالحة ومصارحة، أجبت علي الأستقصاء (إذا جاز تسميتة استقصاء مع الأخطاء الموجودة بة)، ولكن لعدة أيام لا تفارقني أفكاري عن هذا الموضوع، وصفة البعض بقضية عمرهم، ووصفة البعض بالخطير، واستظرف البعض في أمورة، بينما استوعلم (من العلمانية) البعض في تعاطي الموضوع. وأريد هنا أن أكتب بضع نقاط جالت بخاطري وأنا أتصفح جميع الأراء، وأسترجع جميع الذكريات:

1- هذة الفتنة (نعم هي فتنة لأنها إفك من عمل شياطين الأنس) مزروعة عن عمد يدعمها المحافظين الجدد، وهو المرادف للماسونية، المرادف للمسيحية الأنجيلية، المرادف للصهيونية، المرادف لكل من يحاول زعزعة الأمم وتهديدها بأستخدام الأقليات. وهذا لا يحدث في مصر فقط (مسيحيون - مسلمون) (مصريون - نوبيون) (شمال - جنوب)، انما يحدث في البلقان واليونان وألبانيا وجنوب أفريقيا، وحدث في العراق والسودان، وسيحدث حيث يستجد موقع أخر.

المقصود هو ألا يستفيق أحد وإلا جزت رأسة، وألا يظن أحد أنة بعيد عن النظام العالمي والماسونية الدولية وإلا فلستعد للتقسيم والتفكك، يستوي في هذا أعتي الدول والأمبراطوريات السابقة.

2- إذا استوعبنا وصدقنا الحقيقة السابقة، يبقي الحل دائما في أيدينا، أفراد جميع الملل والعروق، أمورنا بيدنا لا بيد غيرنا حتي وإن ظهر غير ذلك، ولكننا كشعوب نملك أن نوقف أي فتنة لأنها غير مرغوب فيها.

3- أنا متزوج من مسيحية أرثوذوكسية أوروبية، متمسكة بدينها حتي الموت، أكاد أضربها حتي تصوم صيامهم، وأزجرها حتي تذهب صباح كل أحد للكنيسة، وتصوم معي صيام المسلمين، تراقبني في صلاتي، تدعو بدعائي دائما "ما شاء اللة لا قوة إلا باللة"، وتسبق قولها بـ "انشاء اللة" .... تدرك أن إلاهي هو إلاهها.... رب العالمين تعالي... تبالغ وأهلها في حمايتي من لحم الخنزير كأنة سم سيقتلني، لا يتناقش اصدقائنا في مغزي تحريم لحم الخنزير، فقط ينفذون ولا يتسائلون....نؤمن جميعا بـ "أن أكرمكم عند اللة أتقاكم"، وأن الدين للة.

4- أعتقد ان المسيحيين الحق لا يؤمنوا بأن عيسي (علية السلام) إبن اللة بالمعني الفعلي..... اللة الأب لة مغزي أخر في العقيدة المسيحية، ولهذا فمن صدق أن المسيح هو الأبن فقد كفر، المسيحيون يكفرونة أيضا، حتي الأقباط المصريين لا يصدقون أنة الأبن بالمعني الحقيقي لأني لم استطيع أن أجد هذا المعني في حواراتي مع اأقباط، وإن كنت أجد تأكيد بتبعية عيسي علية السلام كنبي فقط عند سائر الأرثوذوكس.

5- "من شاء فليؤمن ومن شاء فليكفر" .... حتي لو المسلمين كفروا كل المسيحيين، مين قال أنهم كفرة؟؟؟ ربنا هوا اللي بيحاسب، فكل واحد يخلية في نفسة إلا لو ناوي يدخل النار لانة بيكفر الناس بمزاجة، طب ما يقول "أنا ربكم" أحسن وهوا اللي حيحاسب الناس في الأخر!!!

6- أرجع تاني للحكاوي المشهورة، جاري مسيحي وبحبة، صاحبي مسيحي وبيحبني، أكلاشية، بس هوا دا الواقع، عمرنا ما شوفنا مشاكل مسلمة - مسيحية الا من كام سنة، دا معناة ان في حد بيزق النار علشان تحرق البلد، امال هما المسيحيين ظهروا فجاءه في مصر؟؟؟ والا عمرو بن العاص جه السنة اللي فاتت؟؟ والا هما صدقوا إن حسني مبارك بقي أمير المؤمنين والا اية؟؟؟ اللي بيزق بقي أخوان مسلمين والا بن لادن والا بوش والا الحكومة، أهم كلهم مصيبة سودة وحلت علينا كلنا، لو صدقنا كلنا حنبقا حطب للنار دي، ومش حتفرق مسلم والا مسيحي، كلة حيضيع.

7- كالعادة، عايز أقول اللي بيجب مصر يدور علي مصر، يا مسلم اتقي ربك ويا مسيحي اتقي ربك، نفس الرب، ونفس الدين، ونفس الهدف.... نعبد ربنا تعالي، ومش لازم كل واحد يلعب دور ربنا، في النهاية "إن أكرمكم عند اللة أتقاكم".

رَبَّنَا إِنَّنَا سَمِعْنَا مُنَادِيًا يُنَادِي لِلْإِيمَانِ أَنْ آمِنُوا بِرَبِّكُمْ فَآمَنَّا رَبَّنَا فَاغْفِرْ لَنَا ذُنُوبَنَا وَكَفِّرْ عَنَّا سَيِّئَاتِنَا وَتَوَفَّنَا مَعَ الْأَبْرَارِ - رَبَّنَا وَآتِنَا مَا وَعَدْتَنَا عَلَى رُسُلِكَ وَلَا تُخْزِنَا يَوْمَ الْقِيَامَةِ إِنَّكَ لَا تُخْلِفُ الْمِيعَادَ.

يا ابن الــــ ...... يا عباس يا رئيس السلطة الفلسطينية.... أهو علني أهو!!

أحاول الأحتفاظ بنظافة الألفاظ في مدونتي، بس ابن الـ تيييت عباس ابن الــ تيييييييييييييت بيدين العملية الفدائية اللي قام بيها أبطال من أي جبهة فلسطينية مش مهم، بس يا ابن الو تيييييييت يعني لما يسترجلوا الفلسطينيين مرة واحدة في حياتهم تقوم تدين العملية؟؟؟ يعني لما شحبروا المدنيين في غزة وقتلوا مش عارف كام بدم بارد ومن غير أي ادانة بل بتشجيع كان حلو؟؟

انت بتدين استهداف المدنيين فلسطينيين أو اسرائليين، ك تيييييت أم الأسرائليين وك تيييييييت أم المدنيين الأسرائليين، وك تييييييت أمك أنت كمان علشان أنت خ تيييييييت وبتردد الكلام اللي أنت حافظة من سنينن عن المدنيين، أهم حتي سيادك معرفوش يدينوا العملية في مجلس الأمن لأنهم مكسوفين مش عارفين يقولوا اية.!!!!

يا إبن الكلب يا وسـ تيييت شوف الفيديو ده (http://shaltaf.blogspot.com/2008/03/blog-post_07.html)، اللة ياخدك وياخد حماس في خشبة واحدة .... (وحسني مبارك كمان)

أبا القاسم، يا حبيبي يا محمد (صلي اللة علية وسلم)

تقول أغنية الرائع سامي يوسف التي طالما أبكتني أغانية: أبا القاسم، يا حبيبي يا محمد، يا شفيعي يا محمد، خير خلق اللة محمد ..... شوفتوا الكلام: خير خلق اللة محمد... العظماء مائة أعظمهم سيدنا محمد (صلي اللة علية وسلم)، هذا الرسول الذي يحسدنا علية كافة البشر، وبدون مبالغة أو انحياز، يحسدنا العالم علي ديننا أو معتقدنا كما يطلقون علية، فأنا أعيش في دولة أوروبية يأتيني الناس عارفين انني لن أخدعهم في معاملة مالية متحصنين في ديني عارفين أن هذا الدين سيردعني، أقسم باللة أن هذا هو ما يحدث عندي.

ثم يطالعنا في الأخبار: http://www.alarabiya.net/articles/2008/02/27/46212.html

أي مس أصاب هذا الرجل؟؟ اذا كان يعتقد ان هذة هي حرية الرأي والصحافة فليسأل صحافتة أن تتحدث عن أي دين أخر وليري أي صندوق قمامة سيواري طلعتة البهية!!!

أحتجت الدول الأسلامية عن طريق القنوات الدبلوماسية والأفعوانية والمهلبية، ثار الناس وحطموا ودمروا ممتلكاتهم الخاصة في خروج مستهتر، خرجت المظاهرات التي تندد وتدين وتهدد بعظائم الأمور، ذهب "المكلمنجية" للتحدث والتعريف بديننا ..... ولكن ذلك لا يردعهم.

اذا كنا كالأبل في تعاملنا مع القضايا العربة، واذا كانت حكوماتنا لأسباب دبلوماسية بطيخية لا تستطيع ايقاف أي شيء، واذا أصبح الخاصة فينا كغثاء السيل، فيا أيها العامة أرجو ان تفهموا أن هذة الشعوب المتقدمة الأساليب، المتحجرة التقاليد، الأستعمارية الأفكار لا تفهم غير لغة المال والأقتصاد والقوة، فاذا كنا لانملك القوة العسكرية فاننا نملك القوة البشرية بالمليار، ولنذيقهم ما يذيقهم اياه اليهود وانا علي يقين أنهم سيرتدعون ويركعون.

ان تصريحات هذا الألماني المتعصب انما تثير في نفسي الشكوك، فقد فكر: أما وقد نشرت الصحف الدانمركية الرسوم المسيئة مرة أخري، لماذا لم يقم المسلمين بأعمال عنف تساعدنا علي أفهام شعوبنا أي دين بغيض هو الأسلام؟؟ ما علاقة ألمانيا بالدانمرك بعد مرور أسابيع علي نشر الرسوم مرة أخري؟؟ انما هو أراد باطل بكلامة هذا.

لا تثوروا، لا تحزنوا يا أتباع حبيبنا محمد (صلي اللة علية وسلم) ... عاملوهم بما يفهمون لا بما يريدون وسججثون علي ركبهم انشاء اللة..... فلنضيف ألمانيا الي الدانمرك ومن سيتبعهم للمقاطعة، المقاطعة الطويلة الأمد غير محددة المدة، وليس المقاطعة شهر ثم بعد الأعتذار نعود كما كنا..... لا مجال لشركات تهاجم معتقداتنا بيننا، لا مجال لهم ليهينوننا ثم يستغلون اموالنا..... اغلاق تام لهم واعلان مقاطعة نهائية حتي يركع الكلاب، لا تثيركم مقولة انهم يوظفون مسلمين مثلنا، هؤلاء المسلمين مثلنا يجب ان يتركوهم قبلنا وأنا واثق أن اللة سيرزقهم علي حسن نيتهم.

أنا واثق أننا لن نخسر شيئا، هم سيخسرون الكثير الكثير مما يحبون، ولن يضيرنا بعض قطع الجبن أو زجاجات الشامبو أو الزبالة التي يبيعوننا اياها ونأخذها قهرا وسما في سبيل خنوعنا وتقدمهم، ولنعلم أن تقدمهم هذا انما بني علي تقدمنا سابقا وعلي ذلنا حاليا.

خليكوا جدعان وحاولوا، الحكومات مش حتجيبلوكوا حاجة، الحركات الشعبية من الخليج الي المحيط تستطيع ايقاف العالم اذا أرادت. تصوروا أنا هنا في أوروبا قاطعت المنتجات الدانمركية ثم الألمانية النهاردة، مع اني عارف ان مقاطعتي دي مالهاش أي معني وخصوصا في اوروبا، انما بحاول افهم الناس هنا لية أنا بعمل كدا وهما بيفهموا وبيحترموا.

لا اللة الا اللة - محمد رسول اللة

حليم، كريم، عظيم، عليم، حليم، حكيم، متين، منان، رحمان، فتاح، غفار، تواب، رزاق، شفيع، حسيب، ، حليم ----- اللهم صلي علي محمد، وآل محمد ، يا مسلمين صلوا علية ---- اللهم صلي علي محمد، وآل محمد يا مؤمنين صلوا علية

رائعة اخري من روائع سامي يوسف - أسماء اللة الحسني

كفاية يا فهمي

كنت سابقا معجبا بالكاتب فهمي هويدي وكتاباتة وكتبة ومقالاتة، حتي حدثت تحولات جذرية لأفكارةجعلتني أتوجس خوفا مما يقول وأشك في اغراض مقالاتة، ولمن سيقراء هذا فانا أتوجس خوفا من كل الصحفيين والسياسيين وذوي النفوذ وأعضاء الحكومة وكل من يتحدث في مصر، اشك كثيرا في انتمائاتهم وأغراضهم وتمويلهم، وأشك كثيرا في قدرة أي من النجوم الموجودة حاليا علي قيادة هذة الدولة نحو أي استقرار لأن كل شخص ببساطة يطرح المشكلة ولا يطرح اي حل، كأنة ينتظر دولة أخري أو عصر أخر.

نعود الي السيد فهمي هويدي، فما أثارني هنا هو مقالتة الأخيرة عن غزة والأمن القومي المنشورة في جريدة الأهرام (وفي جرائد أخري لا أعلمها)، ثم بكائة لمدة ثلاث دقائق متواصلة في ندوة "العائدون من غزة" التي أقيمت في نقابة الصحفيين بالقاهرة. ولا أستطيع أن أجادل السيد فهمي في أرائة سواء تاريخيا أو سياسيا لأنة قبل كل شيء كاتب لة وزنة وثقافتة العالية وتاريخة وكذلك لأني أعلم تماما أن جدالي لن يؤتي بأي نتيجة كانت سواء علي المستوي الحكومي أو علي مستوي ما قد أشك ان الكاتب يروج لة.

الا انني علي استحياء ساقوم يتدوين عدة ملاحظات (تحتمل الصواب والخطاء بطبيعة الحال) عما دار في ذهني عندما قراءت مقالة واطلعت علي بكاءه:

- وصف الكاتب ما حدث من أهل غزة الكرام في رفح ب "الأنفجار الشعبي"، وهو ما يعني أن الفلسطينيين (كتر خيرهم) ظلوا صابرين عدة شهور علي الظلم والجور الذي أذاقهم اياه المصريون في حصارهم لهم ، بينما المصريون ينعمون في رغد الحياة غير عابئين، وحينها قرر الشعب الفلسطيني، بدون تدبير مسبق ولا أوامر عليا، الأنفجار شعبيا علي الحصار الظالم المستبد وقرروا بين عشية وضحاها كسر الحدود والدخول الي رفح المصرية. ولم يقل لنا السيد فهمي لماذا لم يقم الفلسطينيون بالأنفجار شعبيا ناحية اسرائيل في سبيل تحرير دولتهم سواء الأن أم السنة الماضية أم من 15 سنة أو 30 او 50؟ ففلسطين للذين لا يعلمون حتي الأن محتلة منذ سنوات طوال، ويذيقها الأحتلال جميع الشرور، ومع ذلك لم يحدث اي انفجار شعبي، بل حدث انفجار سكاني وقرروا لحل هذة المشكلة ارجاء تحرير فلسطين حتي يتفرغوا لقتل بعضهم البعض (بالأضافة لما يقوم بة الصهيونيون)، وتكوين الأحزاب والأجنحة والجبهات حتي صاروا بدون غطاء شرعي أو حتي شعبي.

ولم يقل لنا السيد فهمي أين كانت الحكومة المسئولة عن قطاع غزة، وهي التي لا تفوتها شاردة ولا همسة في القطاع، اين كانت وقت وقوع هذة "الجريمة القانونية" "والعبور غير الشرعي للحدود" حسب تعبيرات الكاتب، ولم يقل لنا أين كانت هذة الحكومة وقت تفجير الحود الذي اخذ أياما بل وشهور لكي يتم.

- تحدث السيد فهمي عن أمننا القومي باستخفاف ومشيرا الي أن التهديد الحقيقي هو من العدو الصهيوني كما أنة اتصل بأحد أساتذة العلوم الساسية الذي أوضح لة أن ان تعريف الأمن القومي (الذي يميل لة) هو: أنه كل ما من شأنه أن يؤثر في قدرة الدولة على حماية مصالحها القومية. ومع اتفاقي معة أن تهديد أمن مصر القومي هو من العدو الصهيوني والأحتلال الغاشم لدولة عربية، واتفق معة تماما أن اتفاقية السلام وضعت مصر في خطر أمن قومي بسماحها بعدم وجود قوات مصرية في سيناء، الا انني أود أن أضيف أن الأمن القومي لأي دولة هو ما تحدده هذة الدولة من رؤي سياسية خاصة بها وهو يختلف من دولة لأخري حسب مصلحتها. فهناك مثلا دول يعيش بها أقليات ينتمون الي نفس العرق ويختلفون في الديانة، أو أقليات ينتمون الي عرق اخر ويشتركون مع الأغلبية في جنسية الدولة، فتحدد الدولة أحد أولويات امنها القومي بالمحافظة علي هذة الأقلية ومنع قيامهم بالأستقلال عن الكيان الأصلي. هذا فقط مثال.

وبما أن القضية الفلسطينية شائكة ومعقدة، وبما أن غزة تشترك في الحدود مع مصر وكذلك اسرائيل، وبما أن ذاك "الأنفجار الشعبي" غير معلوم المصدر، وبما أن النوايا سواء اقليمية او دولية او اسرائيلية او فلسطينية غير واضحة أو محددة بطبيعة الحال، فقد أصبح لزاما علي مصر أن تتفق أن خرق الفلسطينيون للحدود المصرية "قد" يكون تهديدا لأمن مصر، وخصوصا بعد ان تواترت حكايات وتداولت خرائط وتناثرت مقالات تؤكد عزم القوي العالمية علي رسم حدود جديدة لغزة بهدف توسيعها علي حساب اجزاء مقتطعة من سيناء ثم يتم اعلان الدولة الفلسطينية هناك. ومع تسليمي بعدم قدرتي علي نفي او تأكيد هذة الأفكار، كما أنني لم ولن أكون يوما علي علاقة بمخابرات دولية او أي حكومات أو احزاب، فليس باستطاعتي معرفة ما يجري وراء الكواليس، وان كان بأستطاعتي أن اقول ان أختراق الفلسطينيون للحدود المصرية هو أحد أشكال تهديد الأمن القومي المصري، لأن ما جري قد يكون مجرد اختبار لقدرة المصريون علي التصدي لهجوم حقيقي يتبعة ......... "الهجوم الحقيقي"!

- يتحدث السيد فهمي عن حروب مصر في فلسطين بأسلوب اعتبرتة استخفافا غير واضح النية، فهو يسرد تاريخ حروب مصر وعدم علاقتها بفلسطين، ونسي ان مصر بعزمها علي مشاركة فلسطين (سواء لفلسطين أو لعمق مصر الأستراتيجي) عرضت نفسها لهجوم عسكري متواصل من اسرائيل، ونسي كذلك فرق الفدائيين المصريين، ونسي نداءات الوحدة العربية والقومية العربية (التي كان العم أمين هويدي أحد رجالها). وان كان نسي أو تناسي، فأنة لا يضير مصر في النهاية كون حروبها دفاعا عن سيادتها، فعلي الأقل حاربنا وقاومنا واستعدنا، كما أننا سعينا وخططنا لذلك مع عدم تناسي تضحياتنا بالأرواح حتي تظل الدولة المصرية كما هي منذ اسست. لم ننام ونستأنس، لم نقاتل بعضنا، ولكننا نفذنا، ولذلك ستبقي سيناء دائما نقطة حساسة في السياسة المصرية، وستبقي دوما أولوية أمننا القومي.

- بكي السيد فهمي مما يحدث في غزة، ومع عدمي قدرتي علي الأطلاع علي ما في النفوس، الا أنني لم أرة يبكي علي العراق وما حدث فيها من مأسي!!! ولم أرة يبكي عما يحدث داخل مصر من مأسي، بل لم أراه حتي مشاركا في مؤتمر صحفي يعلق كما يعلق الغير علي الجوع والفقر الذي يعاني منة ملايين المصريين المحاصرين في دولتهم!! تري هل تذكر السيد فهمي أخوانة المصريين في عزبة القرود وهو يبكي؟ تري هل جال يخاطرة ألوف العراقيين الذين قتلوا في عدة سنوات معدودة علي أصابع اليد الواحد؟ هل أصبح السيد فهمي غزاوي الدموع ومسح من ذاكرتة مشاكل ملايين المصريين المحاصرين الذين لا يجدون حدودا يخترقونها؟

- تحدث السيد فهمي في مقال اخر في جريدة اخري بأعتزاز عن فكرة ازالة الحدود العربية لأن ورائها المخططات الأستعمارية واتفاقية سايكس بيكو ونسي أن الحدود المصرية علي الخصوص لم تتغير منذ عهود الفراعنة، فمن أراد أن يفتح الحدود فليفتحها ولكن بعيدا عنا.

- هل تم اختزال القضية الفلسطينية في غزة فقط؟؟ هل نسيتم الضفة والقدس وباقي أراضي فلسطين؟ مع اعترافي ان الشعب الفلسطيني في غزة محاصر حصارا وحشيا، ومع تقصير الحكومة المصرية في توصيل احتياجاتة الأساسية لأغراض سياسية لا أعلمها وان كنت اجذم أن الخيانة والعمالة ليست منها، الا انني اعتبر غزة جزء بسيط من القضية الكبري التي أعيت حلها أجيال حتي يومنا هذا ...... يا ناس دي كوسفو استقلت!!!

المقالات:

http://www.sadafat.com/?p=307

http://egyptandworld.blogspot.com/2008/02/blog-post_05.html

http://www.alarabiya.net/articles/2008/02/21/45952.html

لقطات واستفسارات، فهل من اجابات أو اختيارات؟؟

3 لقطات خليتني أفكر طول اليوم، مالهومش دعوة ببعض:

اللقطة الأولي:

أعادت مجموعة من الصحف الدانماركية نشر الرسوم اللي سميناها "مسيئة للرسول" (صلي اللة علية وسلم)، وأعاد المسلمين شحن الهمم وشحذ السيوف استعدادا للأنقضاض (صوتيا وصحفيا فقط كالعادة)، ويمكن شوية مظاهرات وقد يتطور الأمر الي مظاهرات تخريب (تخريب ممتلكات اسلامية عامة مش دانماركية لا سمح اللة) ويفرجوا الدنيا تاني علينا وعلي همجيتنا ويقولوا شوفوا الهمج المسلمين، أة ما طبعا الدين الأسلامي بيدعوا للهمجية .... الخ.

انا شايف الموضوع بسيط أوي:

- أولا مفيش حاجة ممكن تسيء للرسول (علية الصلاة والسلام)، واحد رسم واحد بصوره متخلفة وكتب علي الصورة انة سيدنا محمد (صلي اللة علية وسلم)! يا سلام هوا لما قال انة الرسول (صلي اللة علية وسلم) بقة هوا كدة، يعني لو رسمت طيارة وقلت عليها عصفورة بقت خلاص عصفورة؟ دا معناه اني عندي قصر نظر وحمار كمان! وبعدين الرسول (صلي اللة علية وسلم) وأي من الرسل والأنبياء (عليهم السلام) أسمي وأعلي من أي بشر، وياما هذة الرسل والأنبياء تعرضت للأذي والأضطهاد ولم تجنح للأنتقام الغير مسئول وغير منظم.

- ثانيا الحرق والتدمير واعلانات الحرب مش حتجيب نتيجة لأن دا بالظبط اللي هما عايزينة علشان يرسخوا بين شعوبهم فكرة همجية ودموية الدين الأسلامي، هما عملوا فكرة الرسوم دي علشان يستفزوا المسلمين.

- مالهاش أبدا أي لازمة بعثات المفاوضات وتعريف الدين الأسلامي والبطيخ دا اللي أنا كنت موافق علية في الأول علي أساس انها كانت سابقة السنة اللي قبل اللي فاتت، انما بيتهيئلي انهم فهموا كل حاجة خلاص بس بردوا أعادو النشر علشان اعادة الأستفزاز، لعبة حلوة للناس العبط وعايزين يفهمونا ان هيا دي حرية الرأي والهطل دة.

- مفيش رسول بيسلم من ايدهم، حتي هما لو مسيحيين سيدنا عيسي (علية السلام) نفسة مبيسلمش من ايدهم، فمنستغربش انهم يعملوا ويقولوا أي حاجة. (الدين اليهودي ميقدروش ييجوا جنبة لأسباب معروفة).

- الحكومات العربية حتشجب وتعترض بس كالعادة، فالحل في ايد الشعوب، مقاطعة تامة لكل ما هو دانمركي، حاجة بسيطة جدا وسهلة، الحمد للة انهم مش الأمريكان والا كنا موتنا :)، وبلاش بقي الشعارات والهتافات والمظاهرات، برضوا مش حتجيب نتيجة.

بس خلاص

------------------------------------------------------------------

اللقطة التانية:

مناشدات أهالي المصريين المحكوم عليهم بالأعدام في ليبيا لقتلهم أشخاص مصريين وليبيين. أنا مفهمتش القانون الليبي، هل هما لو دفعوا الدية ياخدوا براءة والا الحكم حيتخفف؟؟

بس الحكاية ان القضايا دي بقالها سنين مش من الشهر اللي فات، ولغاية دلوقت القضايا دي متحلتش والمفاوضات موصلتش لنتيجة، لحد ما واحد أعدموه فعلا. اهل الشخص اللي تم اعدمة بيحملوا وزارة الخارجية دم ابنهم مش عارف علي أساس اية؟ طب هوا مش ابنهم دا قتل واحد برضة؟؟ الخارجية عملت اللي تقدر علية برضة والا كان الفروض تدفع الديات؟؟ انا سمعت ان الناس اللي محكوم عليها دي أغلبهم قتل بغرض السرقة، فهل يستحقوا رأفة المجتمع علشان خاطر أمة واختة زعلانين؟

------------------------------------------------------------------

اللقطة التالتة:

أكيد في عمال وموظفين كتير أوي في مصر بيشتغلوا بضمير وبينجزوا ومابياخدوش رشوة وبيفيدوا البلد وأهلهم ونفسهم، انما أكيد برضوا ان في عمال وموظفين كتير أوي بيروحوا يمضوا ويمشوا وبياخدوا رشاوي وعلاقتهم بالعمل انهم بس بيشتغلوا هناك بالأسم، فمبيضيفوش أي حاجة للبلد ولا لأهلهم ولا لنفسهم.

بقول الكلام دا بمناسبة الأضرابات اللي العمال والموظفين بيعملوها، ونفسي أسأل هما علي اساس اية طالبين علاوات وترقيات وزيادات؟؟ هوا اللي حيدفع الزيادات دي بلد تانية اقتصادها احسن والا بلدنا والموظفين والعمال اللي بيشتغلوا بجد؟

لازم المرتبات والعلاوات والترقيات في كل المصالح والمؤسسات والشركات تبقي علي أساس الأنتاج والمجهود اللي بيعمل اضافة، مش علي أساس أسوة بالعمال في الشركات الأخري والكلام اللي ملوش لازمة دة، والعمال اللي مبتشتغلش واللي ملهومش لازمة يقعدوا في البيت، انما اضراب عمال وموظفين نصهم مشفش مكان شغلوا غير يوم الأضراب يبقوا يستحقوا الضرب وبالجزم كمان.

وبعدين اية حكاية ثورة العمال وثورة الجياع والتحذيرات، ما يتنيلوا يشتغلوا بذمة الأول وبعدين يطالبوا بحقوقهم اللي هيا حقوقهم بجد مش حقوق غيرهم وعايزين ياخدوا سف كالعادة.

في كل دول العالم المحترمة اللي بيشتغل بيقبض علي اد شغلة، اللي مش عايز يشتغل ملوش مكان في المجتمع ويقعد في بيتهم احسن.

عموما دي غلطة الحكومة والتنسيق والتخطيط في البلد اللي دلعت العمال والموظفين علشان ينفذوا أغراض سياسية، وبعدين السحر انقلب علي الساحر علشان طلع في ساحر أحقر منة.

هاتو فلوسكم علشان أهرب بيها

المفروض ان التكرار بيعلم الشطار، انما الظاهر ان كتير من المصريين مش ممكن يتقال عليهم شطار، انما ممكن يتقال عليهم أي لفظ تاني لأنهم مش ممكن حيتعلموا أبدا. سبحان اللة.

من شهر كنت بتابع برنامج 90 دقيقة لقيتهم بيتكلموا عن واحد خد من الناس مش عارف كام مليار جنية بحجة توظيفها في تجارة الموبايلات وكروت الشحن ويديهم فايدة شهرية 3 أو 4%، طبعا يا شطار لو حسبنا الفايدة حتكون بالميت 36%، فأية يا شطار، الناس ريلت جنيهات في جيب الراجل اللي في الأخر شرف في القسم والناس لسة مستنين فلوسها.

لغاية هنا ممكن نقول عادي، ونصاب والقانون لا يحمي ال... حلوين!

انما عملت بحث في الأنترنت لقيت ان الحالة دي متكررة 3 مرات في ظرف سنتين!! يا نهار أسود، هما الناس دي اية!!

اللي خلاني انفجر انو ظهرت قضية من كام يوم، نفس القصة والسيناريو، والفايده من 5 ل 7 %، والراجل مخدتش بالي هرب والا اتقبض علية، وحجم الأستثمار في قول 2 مليار جنية!

طلع واحد من اللي بيشتكوا، قالك دا راجل كان متدين وبيحج كل سنة، وكنا بنقابلوا في كافية، واللي خلاني أثق فية هو علاقاتة مع "أبناء مسئولين كبار في الدولة" اللي ظهر في الأخر أنة مثلا ابن مستشار والا قاضي والا ظابط"، ودا اللي خلا الراجل يثق فية علشان مش معقولة ابناء المسئولين يقعدوا مع حد مش موثوق فية او بيتاجر في تجارة مش مشروعة!!!

واحد تاني طالب الحكومة بتحمل مسئوليتها قدام الشعب وانها ملتزمة ترجع الفلوس دي تاني للناس!!! علي أساس ان الحكومة كان لازم تكون موقفة عسكري علي دماغ كل واحد بتراقبة، أو لأن الحكومة غنية وفلوسها كتير ولازم تصرف علي المواطنين القصر!!!

زمان كان فية قضايا الريان والشريف والسعد، ممكن نقول دي أول قضايا والناس مكانتش عارفة وكانت مغلفة بأقاويل عن الفساد وخلافة، وبعدين كل كام سنة تظهر قضايا نقول الناس بتنسي، انما في سنة واحدة تظهر 4 قضايا ورا بعض وكلهم نفس السيناريو(راجل متدين، علاقات قدام الناس، ايصالات أمانة، تجارة غير موجودة، أرباح غير معقولة) دي بقي مصيبة!

القضية هنا مش بس واحد خد فلوس الناس يستثمرها ومرجعهاش، كل واحد ذنبة علي جنبة ودي فلوسوا هوا حر يولع فيها، انما القضية او القضايا:

- الناس دي قصر؟؟ ما كل واحد بدل ما يدي فلوسة لحد تاني ويقعد يستني الفايدة الجهنمية، طب ما يحاول هوا يعمل التجارة دي، ماهياش ذرة يعني! طب ما يشتريلوا حتة ارض يزرعها والا بقرتين يربيهم هيا معضلة؟ ما الفلاحين بيعملوا كدة وبيكسبوا! انما هيا نظرية الأستسهال والتواكل والجهل اللي عاشين فيهم، لو في فايدة كبيرة نجري نرمي فلوسنا، ماهي العملية سهله، بيزنس بأه، مافيش أدني معرفة بالسوق ودرجات المخاطر... محدش حتي قري جرنال.

- كل واحد ربي دقنوا أو بيروح يحج كل سنة بقي شيخ ونقدر نثق فية بأموالنا وحياتنا ويمكن بعيالنا كمان.

- نفس القصة بتتكرر في البورصة (وشوفت ادام عنية من كام سنة ناس خسرت 2 أو 3 ملون جنية في البورصة). سهم تتطلع اشاعة انوا بيطلع، تجري الناس تشتري، وبعدين القصة معروفة، السهم ينزل ويقعدوا يعيطوا. بلاش معرفة بقوانين البورصات، بالعقل كدة... اية اللي حصل في الشركة دي بيخلي سهمها يرتفع، هيا مايكروسوفت والا بيبسي، دي بتبقي شركة أقل من محلية وخسرانة وطلاعان عينها كمانن اية اللي بيخلي قيمتها تعلي في يوم وليلة وبعدبن كل يوم!!

- بردوا كل واحد بيجري علي الحكومة،" ماما ماما عايز فلوسي من الراجل الوحش"، زي بردو "ماما ماما عايزين ناكل" "ماما ماما عايزين نخش الحمام"!!! الحكومة متنيلة ومش حتعمل حاجة خالص، والبلد بظرميط علي مر كل الحكومات، بس الناس مش عايزة تكبر وتاخد الأمور في ايديها، في رشوة مستسلمين، في فساد مستسلمين، في ارتفاع أسعار مستسلمين، وفي الأخر اية اللي بيحصل، الموظفين مبيشتغلوش وبيطالبوا برفع الأجور، طب ما تشتغلوا الأول!! موظفين (من الشعب برده) بياخدوا رشوة وبعدين لما يروحوا يخلصوا مصلحة بيتاخد منهم رشوة يقوموا يشتكوا ان الحكومة فاسدة!! أفران بتهرب الدقيق المدعوم وتبيعة برة بسعر عالي، وبعدين صاحب الفرن بيشتكي ان اسعار المواد الغذائية مرتفعة، ما هما كلهم مواطنين.

اللي عايز أقولوا ان الحكومة دي برضوا مواطنين زينا وبيعتمدوا في فسادهم علي مواطنين زينا، فمحدش يشتكي بقي.

وبعدين في سؤال غبي شوية بيدور في مخي: هيا الناس دي جابت الفلوس دي كلها منين؟؟ هيا البلد لسة فيها فلوس؟

يا رب الشطار يتعلموا.

رسالة إلي الشيخ «مشعل» ... من مقالة للميس جابر - المصري اليوم

http://www.almasry-alyoum.com/article.aspx?ArticleID=93930

قطعت قلبي، أبكتني، فتحت جراح وذكريات... افترستني هذة الرسالة ولا أعرف ان كانت مرسلة حقيقة من زوجة الشهيد أم هي اسقاط واقعي لحالة زوجة شهيد تخيلته كاتبة المقال. لا اعرف كاتية المقال وحتي ما قرأتة لها سابقا كان يعطيني نفس انطباع الشك في مقصدة، ليس لشخصها وحدها ولكن لكل من يتحدث في أي شيء هذة الأيام، أصبت بداء الوسواس من كل القوي والأنظمة في مصر.... ولكن هذة الرسالة كانت تنضح بالأسي، تصرخ بالبساطة، ترجو كاتبتها (ان كانت حقيقية) فقط رضاء اللة حتي تحقق رضاء النفس.

فتحت جرح كبير في قلبي، يوم جائنا نباء استشهاد عمي في حرب 1973، كان ضابطا وحارب من اجل تحرير بلدة، ضحي بنفسة وألوف غيرة ايضا من أجل أن نظل احرار، لا يجثم فوق صدورنا عدو محتل، ونستطيع أن نقرر مصيرنا.

ضحي بنفسة وألوف غيرة ايضا من أجل أن نعيش بدون أزيز طائرات ترعبنا. ضحي بنفسة ولم يفجر نسفة في عملية فاشلة.

ضحي بنفسة وألوف غيرة ايضا من غير صواريخ ورق مقوي ليثبتوا ان خيبتهم موجوده.

ضحي بنفسة وألوف غيرة ايضا في حرب حقيقية منظمة مع العدو الحقيقي، اتحد المصرييون لتحرير أرضهم، محاربوش نفسهم، مطلبوش دعم اتحاد حرب الصحراء حتي ينجدوهم، حاربوا لينا، لوطنهم، لوطنيتهم، لنفسهم ولأولادهم وللمصريين كلهم، مسلمين ومسيحيين.

الذين أطلقوا النار علي زوجك يا أختي لا يستحون عن قتل بعضهم وأنفسهم ليتشبثوا بكرسي الحكم، لو أختلفوا مع أخوتهم قدام البلطجي، يقتلوا أخوهم ,ويقولوا انوا خاين ويمكن كافر كمان، مفكروش ان البلطجي حيستفرد بيهم، والا يا يكونوا في الحكم يا بلاش؟؟ يا فيها لا أخفيها... اللي حتختفي دي بلدهم!!

الذين اطلقوا النار علي زوجك هما المتأسلمين الجدد، حاجة كدة زي المحافظين الجدد في أمريكا، الغاية تبرر الوسيلة، اية يعني لما يقتلوا ألف والا ألفين بريء، المهم يطبقوا أفكارهم ويفضلوا مفطسين الناس، زيهم بالظبط زي الناس اللي هما بيعارضوهم، كلهم صنف واحد.

الذين أطلقوا النار علي زوجك دول مش عرب، دول بقوا بينفذوا كل حاجة ضد مصلحة العرب، حتي كل العرب مش عايزين يساعدوهم.

الذين أطلقوا النار علي زوجك، واخوتهم وصنفهم مش عايزين يحلوا حاجة، كدة أحسن، أكل ومرعي وقلة صانعة، فلوس كتير وبس، والقضية يحلها حد تاني، واذا حد قلهم لأ يبقي انبطاحي وانهزامي وعميل، مفكروش يحاربوا يوم بجد، كلة في الخفاء، كلة بينفذوا شباب مغيب، المهم يفضلوا هما في السلطة. جاتهم البلاء، يبعدوا عننا أنصاف الرجال المخنثون.

نعم يا أختي، نعم يا مصرية، يا زوجة البطل وحفيدة ونسيبة الأبطال، زوجك شهيد، قتلة الغادرون الحمقي اللي باعوا الأرض والقضية والشرف. استشهد بشرف وهو بيدافع عن أرضة اللي أجدادة أستشهدوا وهما بيحرروها.

اية الموضوع؟؟

راند - Rand

http://en.wikipedia.org/wiki/RAND

http://www.annabaa.org/nbanews/53/028.htm

==========

«المصرى اليوم» تنشر المشروع الأمريكي للدولة الفلسطينية المستقلة
رئيس مؤسسة راند يعرض علي الرئيس مبارك خلال لقائهما أمس الأول دراسة قامت بها المؤسسة بعنوان "بناء دولة فلسطينية ناجحة".

http://www.almasry-alyoum.com/article.aspx?ArticleID=93329

التقرير الأصلي من المؤسس "Building a Successful Palestinian State":

http://www.rand.org/pubs/monographs/2007/RAND_MG146-1.pdf

التقرير دا انا شوفتوا من السنة اللي فاتت بس مكانش عندي وقت أقراه، النهاردة طلع علي السطح وابتدا يتناقش او يتعرض.

معرفش كويس والا وحش للفلسطينيين (انما متوقعش ييجي منهم حاجة كويسة.

تقارير مشابهه لها علاقة بالقضية:

http://www.rand.org/pubs/monographs/2007/RAND_MG146.1-1.pdf

مساعدة دولة فلسطينية علي النجاح.

http://www.rand.org/pubs/monographs/2007/RAND_MG327-1.pdf

القوس - كيان رسمي لدولة فلسطينية

أأأه، كدة بأه غلط

http://www.aljazeera.net/NR/exeres/46AB3A2A-58C8-440B-B3EF-629670B36999.htm

http://www.aljazeera.net/NR/exeres/65416A15-37BB-4A6F-9DEF-F809E02A2916.htm

http://www.alarabiya.net/articles/2008/02/12/45523.html

- لا نتفق مع حماس ولا نشجع أي اختلافات وصراعات بين الفصائل الفلسطينية دي حاجة، بس تهديد اسرائيل بأجتياح غزة واعادة احتلالها دة مش مفروض السكوت علية بل والتعامل معاة بعنف كأنة تهديد لأمن مصر بالظبط.

- اذا كانت صواريخ حماس البلاستيك عملت حجة للأسرائيل علشان تصفي حماس، فمش لازم حماس تضحي بارواح المدنيين الفلسطينيين علشان شوية مناظر ملهاش لازمة ومش حتستفيد.

- اذا كانت مصر مستأسدة علشان حدودها ودة حقها، بس دا مش معناة انها توافق علي مجزرة اسرائيلية لمدنيين فلسطينيين في غزة أو غيرها ولازم الرد والتهديد يكون حاسم قبل ما اسرائيل تبرطع بمزاجها.

- اذا كانت اسرائيل خانقة غزة بحصار جائر وكافر (يليق بتاريخ اسرائيل العريق في الأرهاب)، بيقي في ظل التهديدات والقتل المتصل لازم مصر تمد خطوط كهربا وتبعت أدوية واغذية (انشاللة بفلوس محدش قال معونة)، دة مش اختيار، دة واجب.

- كفاية همجية يا حماس وخلي بالك ان في النهاية محدش حينفعك طول ما الهبل شغال.

- في حاجة اسمها الضفة الغربية والرئاسة الفلسطينية والا دي خلاص، بح، باعوها وقبضوا؟؟

- طب في حاجة اسمها دول عربية بترد والا دول عندهم تخمة من القواعد الأمريكية، والأخوة الرؤساء والملوك والأمراء ناموا مع كونداليزا وعندهم رعب جنسي دلوقتي؟؟ (أسف للألفاظ الخارجة).

بس خلاص، كفاية.

أه يا خوفي يا غزة

في ملاحظات وأراء كتيرة أوي علي حكاية غزة واللي بيحصل. ولكن بعيد عن التهليل والتشنج و "لا لتجويع غزة" و"تضامنا مع غزة" والحبشتكانات الي لا تودي ولا تجيب في عالم السياسة والتخطيط الحقيقي، عايز اقول شوية نقط يمكن اكون صح ويمكن أكون غلط فيها:

- المجموعة اللي ماسكة غزة دلوقتي ليها وجهة نظر معينة في تحرير فلسطين مش مجال نقاش اذا كانت صح والا غلط هما حرين، بس كمان في وجهة نظر تانية في الضفة وحصل خلاف بينهم. اللي يعنيني هنا هو الكيفية اللي صفوا بيها الخلاف، مش يتفقوا ويتوحدوا، لا دول نطوا علي بعض، عملوا سباق سرعة مع اسرائيل مين يخلص علي الفلسطينيين الأول. شوفت فيديو على النت أسمة "ماذا حدث"، عن الأيام الأخيرة قبل ما تنفصل غزة عن الضفة، كمية اعدامات وخيانات واستهتار بأرواح الناس واستعراض قوة علي الفاضي، من فتح ومن حماس، هوا دا تاريخ فلسطين الحقيقي، هيا دي الحقيقة المرة.http://www.tadwen.com/working-brain/?p=221

- سيبكوا بقي من حكاية الحركة الأسلامية ولازم نساعد اخوانا المسلمين ونظام الهطالة دة اللي محدوف علي مصر بس علشان العلاقة القوية بين حماس والأخوان، دي مش علاقة بس دول فرع منهم كمان. هما نفسهم مساعدوش بعض وبيقتلوا في بعض وبيخونوا في بعض، اية علاقة دة بالأسلام. اذا كان بعض الفلسطينيين أغني أغنياء العالم العربي ومنهم اسر معروفة بالأسم في مصر مبعتوش ربع كيلو جبنة علي غزة... بلاش، هيا الدول العربية التانية مش مسلمة برضو، طب ما ياخدوا الفلسطينيين ويحموهم ويأكلوهم ويغطوهم قبل ما يناموا كمان.

طب لو حد في أي دولة عربية غير مصر جرب يعمل مظاهرة، الشرطة مش حتضربة.... لا لا لا هما زي الغجر اللي في مصر... دة لو حد عمل مظاهرة هناك حيختفي تماما، دة لو لحق يفكر أصلا....

- ما الوفد الأمني المصري اتضرب لما اتعمي من حماس، ووزير الخارجية المصري انضرب بالجزم، هو الوفد والوزير دة برضوا مش من الأخوة المسلمين برضة والا طالما مش حماس والا أخوان يبقي من الأخوان الكافرين.

- محدش يفتكر ان اسرائيل فوجئت "اذ فجئتن" بالفلسطينيين بيفتحوا الحدود وبيتدفقوا، وجهة نظري ان هيا دي الخطة الأساسية علشان يعودوا الغزاوية علي الحركة دي وهوب "مصر هيا أمي، وسينا جوا دمي" ونصدر القضية لمصر يا يخلصوا علي الفلسطينيين يا الفلسطينيين يحتلوا نص سينا ويرفعوا العلم هناك (رفعوا العلم فعلا في الشيخ زويد)، وأهو نريح العساكر السرائيلية شوية. طب ما هيا اسرائيل عارفة ان مصر معندهاش قوة كفاية في سينا توقف مية متين ألف فلسطيني لو حاولو يعدو، ساعتها بقي حتبقي مشكلة مصر وفلسطين والحرب حتبقي جوة وولعها يا ريس. هما المليون ونص فلسطيني في غزة كلهم بيدينوا لحماس باسمع والطاعة؟ لو قلنا ربعهم عايز يطفش ولقو سينا قدامهم حتبقي كارثة.

- من ضمن اللي حيتسللوا لمصر عناصر تخريبية سواء فلسطينية أو اسرائيلية وهاتك يا تفجيرات وبهدلة في المصريين اللي مش عارفين يلاقوها منين والا منين.

- سؤال جة في دماغي امبارح: لما كان في حرب في افغانستان ضد الروس، كنا بنسمع عن الجهاد وناس بتسافر بالزوفة متطوعة واشي "الجهاد فرض عين" "ومناصرة اخوانا في افغانستان" .... طيب ما في حرب ضد الأمريكان في العراق وضد اليهود في فلسطين، مسمعناش لية عن الجهاد والتطوع؟ والا المخابرات الأمريكاني مدفوش كويس المره دي؟؟

- بس ونبي روحو جاهدوا بعيد عننا، لما تحطوا صوابعكوا العشرة في الشق من الفلسطينيين تبقوا تشوفوا حد تاني تجاهدوا معاه.

- بصوا:

http://www.almasry-alyoum.com/article.aspx?ArticleID=91693

طيب بصوا دة كمان:

http://www.almasry-alyoum.com/article.aspx?ArticleID=91705

لما تنتن يتلم علي تنتون حيعملوا فينا اية؟

ودي:

http://www.almasry-alyoum.com/article.aspx?ArticleID=91659

- اللي حيطلع يقولك ربنا ما يوريك الحصار واحنا بنحارب العدو والكفتة والبطيخ اللي بيتاجرو بيها... معلش ما مصر كانت بتحارب بسبب الفلسطينيين وكان عندنا سينا كلها محتلة وحاربنا 6000 حرب ومات من كل بيت في مصر واحد... أنا شخصيا فاكر الغارات السرائيلية علي القاهرة سنة 67 وكنت لسة عيل صغير ولما كنا بنجري علي المخابىء... بس في مصر في رجالة بصحيح مش تجار خونة... رجعوا سينا وحاربوا صح ووحدوا جهودهم لقضية واحدة... مقعدناش نشحت علي القضية واهي يا عم سبوبة للي يدفع أكتر لمصلحتة، اللي يولع فتح واللي يولع حماس وأهي كروش وجيوب بتتملي وعمر ما حد حيحل القضية.

مصر الكبيره - المثال التانى - الفئه التالته

الفئه التالته فئه الأحزاب السياسيه (وليست الدينيه) والمظاهرات، ودول فئه غريبه طلعت "فجاءه" علشان تملا الفراغ السياسى فى البلد (دا كلام الجرايد مش كلامى، علشان أنا رأيى لسه جاى) وبتعبر عن رأى أغلبيه أو أقليه أو جمعيه أو حزب سواء معلن أو خفى ، وأنا لسه بردوا بتكلم عن السياسيه مش الدينيه خلوا بالكم معايا. اما رأيى فان الناس دى غريبه عنا، ظهروا فجاءه لأنهم كان لازم يظهروا دلوقت

حركه تقولك كفايه… كفايه ايه والنبى؟؟ هوا عمرنا سمعنا عن رئيس دوله عربيه بعد الرسول عليه الصلاة والسلام ساب الحكم غير لما مات والا اتقتل؟؟ يبقى كفايه ايه مش فاهم؟؟ وبعدين ماشى، ماهو لو كان الموضوع يتعلق بالفساد والا الحزب الوطنى والا حسنى مبارك والا التوريث كانو ظهروا من زمان… الفساد من أيام عبد الناصر، الحزب الوطنى بقاله 30 سنه وأكتر الحزب الحاكم، حسنى مبارك بقاله أكتر من 25 سنه رئيس الجمهوريه، وموضوع التوريث دا بقاله من 3 أو 4 سنين.. انما الموضوع هوا انتوا مين بالظبط؟؟ حزب والا عصابه والا شلة متظاهرين والا ايه؟ ماشى فساد وملفات مقلناش حاجه حقكوا وتدافعوا عن البلد.. انما بردوا انتوا مين بالظبط؟ بتمولوا نفسكوا ازاى؟ مين الراجل رئيسكم دا؟ مش لو انتوا شرعيين يبقا تكونوا حزب.. تحطوا حلول وخطط للخلل الى فى البلد، تعرفوا الشعب بيكوا، تخلوا الشعب يثق فيكوا وبعدين يكون ليكوا شرعيه قانونيه؟ انما خبط لزق مظاهرات؟؟ بصراحه أنا شاكك فيهم وفى اهدافهم… بيشتغلوا فى الضلمه، كل تفكيرهم "نعمل مظاهره" فى ميدان التحرير… يطلعلك شوية عيال معرفش منين وشكلهم غريب يعملوا المظاهره‼! فى الأول قولت الللله… مظاهره وبتشتم حسنى مبارك فى ميدان التحرير… أول مره نشوف حاجه زى كده فى مصر… وبعدين بعد ما غبار المعركه انقشع زى ما بيقولوا قعدت أفكر، هو لو حسنى مبارك نفسه ماكنش منظم المظاهره دى كان الناس دى عاشوا بعد المظاهره؟؟ ما هو الى اتمسكوا فى أمن الدوله دول لو ماكنش ليهم غطا كان حد لاقاهم تانى؟ طيب يمكن الديموقراطيه مساحتها بقت واسعه زى ما بيقولوا؟؟ امال الناس دى بيتظاهروا ليه؟؟ يمكن غيرانين من حسنى مبارك وعيزين هما كمان يحكموا، اشمعنى هوا؟؟ آآآآآآآآآه، قلتولى بقى‼ بس برده انتوا مين، وبتوع ايه، وتبع مين؟ أفكاركم شمال والا يمين؟؟ والا مافيش؟ ماهو لو الغرض حسنى مبارك يمشى… خلاص يا عم مشيناه…. حانعمل حكم ذاتى زى المدارس العسكريه كل يوم فصل يحكم؟؟ دا احنا حتى معندناش فصول (قصدى أحزاب) عليها القيمه فى مصر

يطلعلك واحد تانى مش عارف ايه حزب التشحبر المتبلف… نعم يا سيدى؟؟ أصل الفساد والأنحراف‼! ايو يعنى يا عم اذا كان البلد بقت كلها مسجله انحراف ودعاره الحل عند سيادتك ايه؟ صمت تام‼ أو الحل نغير الرئيس والحكومه والحزب بردوا وكمان يمكن نغير الشعب… طبعا الحزب بتاعه هو الأقدر والأقوى والأعظم وكلامهم منزل وأعضائه كلهم شرفا وملايكه وماشيين بالستر ويا عينى مفيش انحراف‼ تصحى الصبح تلاقى النائب بتاعوا نط على مقر الحزب وعايز يبقى الرئيس، وهب هات يا بلطجيه ومسدسات ونيابات وقضايا! طيب والنبى لو مش عارف تسيطر على حزب أخره 10 خرفان، حاتسيطر على 72 مليون مصرى؟؟ دا كان كل يوم واحد نطلك على كرسى الحكم وبقت بوظه!
يطلعلك "الناشط السياسي المثير للجدل" حازومبول أبو فجله… حلوه حكاية الناشط دى.. مش عارف جت منين بس كل وكالات الأنباء والصحف بتقولها… الظاهر دى مرادف للصايع اللى مالوش شغلانه.. والنبى مانا عارف‼ المهم، نعم يابا الناشط، خير؟ يقولك حقوق الأنسان ومنظمة الأمم المتحده للأدويه منتهية الصلاحيه، ومش عارف منظمه معوقين بلا حدود "الغير حكوميه" اللى مقرها وكالة البلح… ماهو ناشط دى لازم تيجى فى خبر فيه "الغير حكوميه" و"المثير للجدل"، كأن الغير حكوميه دى مالهاش أهداف.. وكأن الغير حكوميه دى مالهاش سياسات معينه‼ سيبك بقى من كل دا، انما الأخ دا برضوا بيتكلم عن نفس المواضيع الشهيره، فساد، انحراف وتوريث… الله، هوا البلد مافيهاش أى موضوع تانى والا أى مشكله تانيه؟؟ طيب ماشى، والحل عند حضرة الناشط ايه؟؟ صمت وظلام‼ بس مؤتمرات صحفيه وبكائات دوليه. طيب مين بردوا حضرتك؟؟ تمويلك منين؟ خططك ايه للنهوض بالبلد؟؟ مين معاك؟ افكاركم ايه؟؟ مافيش‼! مافيش فعلا. بس بلطجه وصوت عالى ومافيش نتيجه‼ يطلعلك واحد من النغانيغ تبعوا يشيد بأمجاد الناشط اياه وحبه لمصر وموتوا فى دباديب النيل وهوا مصر ….الخ… ويفقعلك موقع على الأنترنت بالصوت والصوره عن الحب دا

انما ليه كل دا دلوقت مش من سنه والا اتنين والا عشره؟؟؟ ….. طيب ليه دلوقت وليه القضاه نطوا النهارده وليه الصحفيين صحيوا دلوقت؟؟ طيب الناس دى مين وكانوا فين؟؟ ما الفساد طول عمروا موجود والحكم الشمولى طويل الأمد موجود والحزب الوطنى موجود؟ امال ايه الجديد؟

ماهو فى رأيى كان لازم يظهروا النهارده بالذات، ويمكن رأيي فيه دا فى حته من نظرية المؤامره القديمه اياها.. انما لأن "الأذن العلوى" جه: أن اظهروا ووروا العين الحمرا…. فظهروا‼ جزء من منظومة التهديد والترهيب فى المنطقه العربيه… السعوديه والكويت ومصر والسودان واليمن والأردن واللى بعدهم لسه ماجوش، والدور على لبنان وسوريا … اضرب المربوط يخاف السايب… المربوط دا طلع العراق، ضربوها لما عموها، آم كلوا ابتدى يلم نفسه ويتعدل فى كرسيه لحسن يطير راسه زى الطور اللى قبله.. كل واحد ابتدى يرش شوية ديموقراطيه وتسامح وحرية رأى… وفي بلاد ابتدت تناقش المحظورات القديمه.. اما مصر فهيا لسه أم الدنيا… لعبت اللعبه صح، و "هاااااا، عايزين ديموقراطيه كمان والا كفايه كده؟؟"… وطلعت الأحزاب والحركات والنشطاء عن بكرة ابيهم من جحورهم ومتاحفتهم ليتحفوا الشعب المصرى بما لذ وطاب عن الفساد والأنحراف والحكم الشمولى، اللى مالحقش الأتوبيس اللى رايح التحرير، ركب واحد رايح الهرم وخد تاكسى من هناك‼ قالولك نلحق قبل ما عم جيمى ينط ياخد الكرسى ننط احنا، بس المشكله وقتهم كان قصير ولعبهم مش متنظم… الشعب اتخنق، حاسس انو يروح شمال يلاقى فساد، يروح يمين يلاقى انحراف، يغطس تحت الأرض يطلعلوا ضياع‼ خلاص مافيش حل؟؟ خلاص مافيش أى حاجه حلوه؟؟ الشعب جالوا اكتئاب وابتدى يا يبيع القضيه ويحشش بانجو يا يتطرف… بس ازاى مصر لعبت صح؟؟ اديت الديوقراطيه وورت "الأذن العلوى" اننا لو قضيناها ديموقراطيه مين حاينط ومين حاييجى ومين حايطلع… فالى نعرفوا أحسن من اللى مانعرفوش وزيتنا فى دقيقنا ومصالحنا واحده، وخليني أنا وابن عمى على الغريب، بدل ما الغريب دا يبقى عليا وعلى ابن عمى. طبعا الرساله وصلت واضحه، والموافقه كانت اوضح، والأمورابتديت ترجع زى الأول تانى، بس لسه فى كام نشط كده فيهم الروح… انما اصبر على جار السو يا يرحل يا تجيلوا مصيبه تاخدوا… يا اما أمن الدوله حاتخدوا‼ بالسلامه يا عسل، انشاء الله نشوف وشكم الحلو بعد 900 سنه

فيلم مصر الكبيره - المثال التانى

ندخل على المثال التانى…. ده بقى مصيبة المصايب (يمكن بالنسبه لى لوحدى الله وأعلم)، اكتشفت موضوع البلوجات (وفى قول أخر المدونات) المصريه واللى هيا المفروض بتعبر عن الشعب المصرى بكل فئاته… ومره تانيه يا للهول‘ بس المره دى أبو الهول بنفسه بقى لأن الموضوع كبير وخطير. بعد الأطلاع على الأوراق والمستندات واللى هيا البلوجات أو المدونات (حوالى 200 منهم)، وبعد استشارة وكالات الأنباء والصحف والمواقع ما ظهر منها وما بطن…. استطاع عقلى الغبى دائما تقسيم الشعب المصرى الى عدة فئات (خدتولى بالكم هنا؟؟ أصل أنا حارجع تانى لحكاية التصنيف والأراء دى علشان موضوع خطير)… المهم

الفئه الأولى أبسطهم … بسيطه أوى… ناس مالهاش دعوى بحاجه خاااااالص.. شاريين دماغهم من أى حكايه على الأطلاق… من البيت للكاباريه… ايه ده؟؟ قصدى من البيت للشغل ومن الشغل للبيت يشربوا كباية اللبن ويغسلوا رجليهم ويصلوا العشا ويناموا علشان بكره يعملوا نفس الكلام… مافيش طموح مافيش آمال مافيش تفكير… يقبض المرتب آخر الشهر، يبوس ايده وش وظهر الحمد لله، يحشر نفسه فى الأوتوبيس والا الـ 128 موديل 1975 اذا كانت موجوده… وبــــس‼! لو اشتكا الوجع لأم العيال فى ساعة فسئيه يبقى دا أقصى المراد وكان الله يحب المحسنين… ابتدى زيرو وخلص زيرو…. ولا ليه دعوى البلد عايزه ايه، الحكومه بتقول ايه (الا اذا كان عن منحه)، ولا تيارات سياسيه (ولا حتى يعرف الفرق بينها وبين التيارات المائيه)… صفر أكبر من صفر المونديال الشهير…. مقهور، مطحون، جاهل…. حتى الثقافه العامه مش عايزها ولا يعرفها مع انها سهله. الفئه دى مع انها أبسط فئه الا انها أخطر فئه، أولا لأنها أكبر فئه (يمكن 70 أو 80% من الشعب المصرى) وثانيا لأن الجهل منتشر فيها (الثقافه العامه لأن المتعلم مش شرط يكون مثقف) فهيا أول فئه للتطرف سواء يسار أو يمين أو أسفل، أى تطرف يترمى عليه وخلاص ممكن يجرجروا معاه، وممكن الحكايه تنتهى مع بعضهم ان اللى يدفع أكتر يسبح بحمد ربه، حتى لو كان ربه هو المخدرات

الفئه التانيه قريبه من الفئه الأولى شويه وان كان معظم أعضائها شباب… شباب الروشنه والمهلسه والنعنشه وضرب الحاجات (من أول ضرب كباية الشاى لحد ضرب سرنجة ماكس).. شباب "تامر حسنى" و"بنحبك يا تامر" (أنا شخصيا باحب صوت وأغانى تامر، بس لسه ماضربتش ماكس)، شباب البدى والستومك وحفلات الروك وهاى يا جماعه، وشباب البلطجه والسنجه والموس واللى يدفع لى أضرب سيجارة بانجو وأنزل أكسر الفرح، شباب ضاع قبل ما يبتدى، مالوش مستقبل، مغيب نفسه فى هباله، أو "متغيب" فى هباله، اترمت عليه الفضائيات والكليبات والأفلامات والحوارات وزبالة الدنيا كلها… دول آخر أملهم يعلق المزه، والا صاحبها يبوسها ويظبتها (فى الجامع وفى رمضان زى ما أخت فاضله قالت فى مدونتها)، والا سيجارة حشيش على كافيه مع الشله، والا حد يديله 100 جنيه وهوا يلم الرجاله وينزل يخلص الطلبيه… ودول وان كانوا يتفقوا مع الفئه الأولى فى الجهل وان مالهمش دعوى بحاجه خالص فى البلد، انما نسبتهم مش كبيره وفرصة تطرفهم محدوده.

الفئه التالته والرابعه كبيره شويه، فكل واحده ليها مكانها المخصص... ابقوا معانا

المثال الأول

اكتشفت من 6 شهور صحيفه مستقله متحرره متنوره شجاعه جباره واعيه (نسيت وصف؟؟)… هذه الصحيفه ملأت الدنيا بتباهيها باستقلالها وتحررها (نفس الأوصاف السابق)… بس كل الأستقلال والتباهى ده انصب على الحكومه، والحكومه فقط… مافيش عدد من الصحيفه غير ماينزلوا تلطيش فى الحكومه وسياسة الحكومه وأم الحكومه.. وبعدين يطلعوا شويه ويلطشوا فى جمال مبارك وسياسة جمال مبارك (بش الشهاده لله ماجابوش سيرة أم جمال مبارك)… وبعدين طلعوا فوق خالص ولطشوا لحسنى مبارك وسياسة حسنى مبارك….
أحب أوضح هنا نقطه عن نفسى، أنا مش معجب بسياسة حسنى مبارك بنظام 100% ووراك يا ريس، وكمان مش كل حكومه جت على مصر عملت سياسات صح وكمان عمرى ما كنت باخاف أقول رأى وبأعلى صوتى فى أى مكان عام. بسسس

بس مش معنى ان حسنى مبارك ساكت على شتيمته، وجمال مبارك لو كان حايورث يبقى فى نفس القوه، والحكومه عندها وزارة داخليه تقدر ترد…… مش معنى كده نهبل…. وأنا أقصد ان لو فى حريه رأى ومساحة حريه فى البلد خلت بعض الصعاليك ينطوا من جحورهم اللى كانوا مدفونين فيها ويعملوا أبطال كفاح على الشعب المصرى، يبقى لازم يكون فيه مسئوليه قدامها، مسئوليه عن اللى بينكتب، ومسئوليه مشتركه عن حل أزمات البلد. لاحظوا "مشتركه" دى…. أصل كل واحد يبكتب وينقد ويشتم وفى الأخر مايقلش حل… طيب لو سيادتك فظيع أوى وكارثة زمانك، ما تتخيل نفسك مكان الوزير ده والا المسئول ده والا حسنى مبارك نفسه وقلنا حاتعمل ايه؟؟

كل حاجه يقولها حسنى مبارك تبقى علشان هو عميل لأمريكا واسرائيل، وكل ما يطلع قانون يبقى قصدوا يدمر البلد، وكل ما يروح زياره بيقى بيشحت، يحاول يحل أزمة فلسطين سلميا يبقى خاين، يقاطع الأزمه من أساسه يبقى خاين… هما عايزينه يعلن الحرب من بكره علشان ناس تانيه تروح تخارب غيرهم، طبعا ما هما شغلتهم الكتابه مش الحرب

رئيس الوزرا يقول حاجه، يطلع ألف كرباج يدققوا فى كلامه ويلاقوا أى ثغره علشان يهبشوا فيها, طيب يا عم يا فاهم لو انت رئيس الوزرا حاتعمل ايه فى البلاوى اللى عندنا؟؟؟ قول حل أو قول أى حاجه تفيد‼‼ انما ازاى، الصحافه فى مصر بتعمل حاجه من ثلاثه، يا طبل وزمر والريس جه والريس راح والرخاء والمشروعات والأفتتاحات والخزعبلات وأخبار النجوم والأقمار وخلافه… تسالى يعنى…. أو صحافه حره مستقله على نفسها أسد على الحكومه (ما هو مافيش غير الحكومه)…. أو الصنف التالت بقى… الزغلول الكبير… صحف تتبع أحزاب لولبيه كفتجيه محظوره أحيانا مرفوسه أحيانا اخرى، ودول بالأضافه الى مهاجمة الحكومه (عادى يعنى) يتحفونا بأخبار الصراعات الحزبيه والأفكار المهلبيه والكفيرات الأرهابيه والأنبعاصات السلفيه ومهاجمة كل الأراء ما عدا رأيهم طبعا كأن كل الناس متخلفين وهما بس اللى ربنا فتحها عليهم واتعلموا فى كتاب القريه

طيب حد يقولنا حل‼ طيب اديت النقد اللى انت عايزه، مين حايحل؟؟ ……. لأ ازمة البلد كلها حاتتحل لو حسنى مبارك مات وجمال مبارك ما ورثش الحكم وأحمد نظيف خدوا الوبا والوزرا دخلوا السرايا الصفراء كلهم‼! هى دى المواضيع اللى دايره دلوقت فى الصحف، كلوا بيتكلم عن كده بس…. طيب الحل؟؟ ماحدش عندوا حل، انما كلوا لسانوا 100 متر ماشاء الله‼ طهقت بجد!

فيلم مصر الكبيره

من شهر نوفمبر وأنا بره مصر وباسمع الأخبار وباقراء المقالات من مواقع عديده…. من حوالى شهر استفزتنى بعض الأحداث فى البلد فقررت انى أشوف موقع فيه ناس مثقفين أو فاهمين او واعيين بغض النظر عن آرائهم، لأنى مش بادور عن موقع كل الناس فيه رائهم واحد ويالا هيييه كلنا مبسوطين ونروح ننام مرتاحين

أنا ممكن يكون آرائى مجنونه والا مش محسوبه والا متعارضه مع الأخوه دولا أو الأخوه دوكاهما… على رأى مش عارف مين بس بيتهيائلى الكابتن لطيف رحمه الله. المهم… وبردوعلى رأى يوسف وهبى "يا للهول"… فيا هول ما قرائت وما سمعت وما شاهدت… حاجه من الأتنين، يا ترتر يا ترتر….اففففففففف قصدى يا اما أنا ما كنتش عايش فى البلد دى، يا اما الأنترنت فى البلد اللى أنا فيها مضروبه وبتجيب أخبار بلاد تانيه وأراء ناس تانيه على انها مصر والمصريين

ممكن أقول أمثله؟؟ حاقول طبعا، امال حرية رأى ايه؟؟

المقاومه الفلسطينيه تقوم بعمليه حربيه‼ وتأسر جندى اسرائيلى، ثم تفاوض لأطلاق سراح 1000 معتقل فلسطينى من السجون الأسرائيليه (مش عارف ليه 1000 بالظبط، ليه مش 500 أو 900 أو رقم زوجى…. 866 مثلا)، المهم انهم حسبوا العسكرى الأسرائيلى الهلفوت دا بـ 1000 فلسطينى‼ عجبى

مشهد المقاومه الفلسطينيه فى شوارع غزه بلباسهم الأسود، وعلى اليمين الأسرائليين بلباسهم الأخضر، آآآآآه آسف دا مش ماتش كوره، المهم، المقاومه بلباسهم الأسود أعطونى احساس انهم حايسحقوا الجيش الأسرائيلى ويطردوه حتى البحر المتوسط‼! هجم الجيش الأسرائيلى على غزه وهات يا ضرب وتلطيش، وما شفناش حتى حد من الكتائب ضرب عيار واحد‼ والا حتى عسكرى اسرائيلى اتعور‼! الله، امال فين المقاومه والجهاد والأستشهاد؟؟ دا لما الأسرائليين اعتقلوا شوية وزراء من حماس، مافيش وزير منهم حتى طلع بمبه من جيبه علشان يدافع عن نفسه ويموت بشرف شهيد‼! هما بس عايزين الشعب الفلسطينى يموتوا شهدا‼ فين الكتائب والفصائل والألويه والحركات والذى منه؟؟؟ كل اللى عملوه انهم ضربوا صاروخ قسام (يدوي الصنع زى ما الأخبار ما بتقول)، مره صاروخ عادى، ومره قالو حامل لرأس كيماويه (بس كان حامل فى الشهر الأول الظاهر)، ومره ضربوا صاروخ لحد عسقلان (مش عارف فين عسقلان دى، بس بيتهيئلى على بعد 2 كيلو من غزه‼)… المهم كالعاده مافيش حد اسرائيلى حصلوا حاجه، دا يا ناس حتى صواريخ القسام دى عمرها ما قتلت حد والا دمرت مبنى

أسرائيل تتوعد وتهدد، الكتائب والألويه تتوعد وتهدد، عباس يحتضن رئيس الوزراء الأسرائيلى فى مشهد مقزز، حماس ترفض جميع الوساطات العربيه للتفاوض وتتهم جميع الدول العربيه بالخزى والعار والأنبطاح والفساد والهلاك…. الخ، نفس شعارات الوحده العربيه والمقاومه الأسلاميه والجهاد الى ما جابوش حاجه…. والشعب الفلسطينى الغلبان مش فاهم حاجه ومطحون ومقهور‼ عايزين يعيشوا زى البنى أدمين الطبيعيين وصدقوا حماس (مش عارف صدقوهم ازاى)، وكل اللى شافوه اغتيالات للشعب ومافيش أى انتصار‼! مش هوا دا نفس الشعب اللى كان فرحان لما غزه رجعت؟؟ هما عملوا حرب علشان ترجع والا اتفاوضوا؟؟ هما نفسهم مش فاكرين

حماس لغاية دلوقت مش فاهمه الموضوع، عايشين فى وهم القتال حتى آخر نفس، طيب قتال آه، بس فين الهدف النهائى؟؟ أهو قتال وخلاص، وجهاد بالنفس والمال مقلناش حاجه، فرض وواجب، بس حانوصل لفين؟؟ ما حدش عارف‼ والا كلهم عارفين ومستعبطين؟؟ الله أعلم. أى حد يقولهم نتفاوض ونشوف يتهموه بالعماله والخنوع …. وينط أمثالهم من المرتزقه فى الدول العربيه يقولوا نفس الكلام…. طيب يا عم عايز تحارب روح حارب ربنا معاكم وهو أحسن من الكل، بس حاتحاربوا بأيه؟؟ وعلى أساس ايه؟؟ وماحاربتوش من زمان ليه؟؟ نفس منطق صدام حسين: "أنا بطل، أنا شجاع، أنا قوى"… وبعدين … خدوا الوبا وضيع العراق‼‼! طيب لما انتوا ابطال ومجاهدين لغاية أخر نفس، عمالين تصوتوا علشان العالم يلحقكوا وينقذكوا من مدابح الصهاينه ليه؟؟ اذا الحكومات العربيه خونه، امال عايزنهم يلحقوكوا ازاى؟؟ اذا انتوا مش عايزين تسمعوا كلام العالم كلوا، امال عايزينهم يساعدوكو ويلحقوكو ليه؟؟ يشمروا ويحاربو الأسرائليين ويموتوا بدالكو؟؟ لأ معلش، روحوا موتوا لوحدكم‼! البلاد التانيه رجعت أرضها بالتفاوض والحيله وعملوا قيمه لنفسهم خلاص، كل واحد يحل مشكلته بنفسه لو مش عايز يسمع للتانيين

أما المجاهدين "من وراء الكمبيوتر" ومجاهدين "الوكسه العربيه": سمعنا عن العائدين من أفغانستان وعن العائدين من البانيا، امال ماسمعناش ليه عن العائدين من فلسطين والا العائدين من غزه أو العائدين من الضفه الغربيه؟؟ لما روسيا احتلت أفغانستان أنا شخصيا سمعت عن 50 واحد راحو يحاربوا هناك، ,وعرفت أن المقاتلين العرب كانوا أساس المقاومه فى افغانستان، وبعدين عرفنا عن البانيا…… طيب جميل… الناس دى سافرت ودخلت أفغانستان وألبانيا وقعدت واتدربت وحاربت ورجعت… بقى أفغانستان سهله ودخول فلسطين صعبه؟؟؟؟ لما تكون هنلك عمليه ارهابيه فى سينا نكتشف أنفاق وطرق لغزه لتهريب السلاح… مش عارفين يهربوا "المجاهدين"؟؟

أنا أعتقد ان الحكايه غير كده خالص…. لما كان فى مقاومه ضد روسيا، امريكا فتحت لهم الباب والوسيله عن طريق الضلاليه الملتحين أعداء الله فى كل دوله وكل حى وكل شارع، غسلوا مخ الشباب وضيعوهم ورا وهم الجهاد وانقاذ اخوتنا الأفغان…. الخ هذه الحكايات المفزعه المقرفه… أما فى فلسطين، فالضلاليه الملتحون السلفيون الحنجريون المتزحلقون المتفلسعون.... الخ الألقاب التى تنتهى ب "ون"... ليس لديهم أى باب مفتوح أو اشاره خضرا، فأكتفوا بالهوهوا والهبهبا من ورا الكمبيوتر….. شويا "حنجاهد وحنحارب وحانقطعهم" وشويا "أين أنتم يا عرب…الخ "قصائد النحيب"…… الله.. اللى عايز يجاهد ويحارب ما يروح يجاهد ويحارب، والا هوا كلام وبس؟؟؟

طيب والنبى بصوا المسخره
استشهاد مجاهدين قساميين ..استهداف آليات العدو بعشر قذائف `هاون` و خمس قذائف `ياسين`.. إطلاق ثلاثة عشر صاروخ `قسام` تجاه أهداف صهيونية ويستمر أبناء كتائب الشهيد عز الدين القسام في التقدم والعطاء، أولئك الرجال الذين تخرجوا من محاريب الصلاة، رهبان الليل فرسان النهار.. يتقدمون ابتغاء مرضاة الله تعالى ويدفعون ضريبة الدين من دمهم في زمن تخاذل فيه المتخاذلون، وصمت العالم كله أمام الجرائم الصهيونية البشعة التي ترتكب بحق أبناء شعبنا.. يقفون سداً منيعاً يفجرون الآليات والدبابات ويعيقون تقدمها، ويكبدون العدو المتغطرس الخسائر الفادحة ويبددون وهْم الجيش الذي لا يقهر.. وفاءً من الأحرار للأسرى الأطهار. وإليكم يا جماهيرنا المجاهدة تفاصيل الحصاد الجهادي ليوم الجمعة (07/07/2006) لكتائب القسام: · استشهاد المجاهد القسامي أدهم الديري أثناء تصديه للقوات الغازية (بيان رقم 49/0607). · في تمام الساعة 06:00 تم قصف مغتصبة سديروت الصهيونية بصاروخ قسام وإطلاق قذيفة ياسين تجاه دبابة صهيونية في منطقة الإسراء غرب بيت لاهيا (بيان رقم 50/0607). · استشهاد المجاهد القسامي وائل هشام نصر أثناء تصديه للقوات الغازية في منطقة السلاطين (بيان رقم 51/0607). · في تمام الساعة 10:30 تم قصف مغتصبة كيبوتس سعد الصهيونية بصاروخ قسام. (بيان رقم 52/0607). · في تمام الساعة 12:10 تم إطلاق قذيفة ياسين تجاه ناقلة جند صهيونية في العطاطرة (منطقة الإسراء غرب بيت لاهيا) (بيان رقم 53/0607). · في تمام الساعة 13:30 تم قصف مغتصبة سيدروت الصهيونية بأربعة صواريخ قسام (بيان رقم 54/0607). · في تمام الساعة 15:35 قصف تجمع للدبابات بخمس قذائف هاون في منطقة السلاطين (بيان رقم 56/0607). · في تمام الساعة 15:57 تم قصف مغتصبة نيتفوت عزات بصاروخين قسام (بيان رقم 57/0607). · في تمام الساعة 17:10 تم إطلاق قذيفة ياسين تجاه ناقلة جند صهيونية في منطقة دوار السلاطين (بيان رقم 58/0607). · في تمام الساعة 18:00 تم قصف تجمع للدبابات بثلاث قذائف هاون في منطقة دوار السلاطين (بيان رقم 59/0607). · في تمام الساعة 18:30 تم قصف مغتصبة سيدروت الصهيونية بصاروخ قسام (بيان رقم 60/0607). · في تمام الساعة 19:01 تم قصف تجمع للدبابات الصهيونية بقذيفتين هاون في منطقة دوار السلاطين (بيان رقم 61/0607). · في تمام الساعة 19:34 تم قصف تجمع للدبابات الصهيونية الغازية بصاروخ قسام في منطقة شمال مدينة بيت لاهيا (بيان رقم 62/0607). · في تمام الساعة 20:11 تم إطلاق قذيفتين ياسين على عمارة سكنية تحتلها قوات خاصة صهيونية في منطقة السلاطين (بيان رقم 63/0607). · في تمام الساعة 21:25 تم قصف مغتصبة سديروت بصاروخ من طراز قسام (بيان رقم 64/0607). · في تمام الساعة 21:40 تم قصف مغتصبة سديروت بصاروخين من طراز قسام (بيان رقم 65/0607)

شوفتو هبل أكتر من كده؟؟؟ شوفتو ضحك على شعب وبهدلتو اكتر من كده؟؟؟ كل دى صواريخ قسام؟؟ كل دا قصف لدبابات العدو؟؟؟ دا لو بجد، كانت اسرائيل هربت بجلدها وكانت كل المستوطنات (أو المغتصبات) قفلت والناس روحوا‼! وبعدين قذيفة ياسين دى بتعمل ايه؟؟ بتزغزغ العساكر الصهاينه؟؟؟

يمكن حماس مش همها الدنيا والمال والسلطه، بقول يمكن…. ويمكن همهم مرضاة الله تعالى والرسول صلى الله عليه وسلم، يمكن برضه، ويمكن تكون نيتهم صافيه…… بس كل دا ربنا حايحاسبهم عليه، كل انسان استشهد بسبب سياستهم الغير مدروسه وعدم وجود خطط….. اتقوا الله فى شعب فلسطين، وماتستنوش مساعدة حد، لأن الحل معاكم وفى ايدكم، ما تضيعوش وقت وتدمروا الموجود اكتر من كده ، على الأقل حاولوا وثابروا على الحل السلمى واثبتوا للعالم انكم عايزين تعيشوا بسلام وان اسرائيل هيا الى مش عايزه السلام، وبعدين شوفوا وضعكم وحسنوه وبناء على كل خطوه ونتيجه يكون فيه خطه

فيلم: ابن هنيه

المشهد الأول

هنيه للشعب الفلسطينى: برنامجنا واضح، لا تفاوض مع العدو الصهيونى، سنفرج عن جميع الأسرى الفلسطينيين فى سجون المحتلين، سنعيد بناء القطاعات الفلسطينيه بسواعدنا الأسلاميه الحره، ولن ندع المحتلين يهنأون بالعيش فى فلسطين وسنكشف الفساد والأنحراف فى دولتنا… سنجاهد حتى أخر قطره من دمكم

عباس: ألله يخرب بيتك، حايقطعوا عنا المساعدات، حانفلس ومش حانلاقى ناكل…. بس كل دا مش مهم… المصيبه فى حكاية الفساد دى… تبقى مصيبه لو كسبوا الأنتخابات…. مش لازم نخلى فلوسنا هنا… أنا مش عارف طلعولنا منين دول

الشعب الفلسطينى ينتخب حماس بأغلبيه ساحقه…. جميع الدول تقطع المساعدات عن الفلسطينيين (طبيعى.. ما هما كانوا عارفين كده من الأول

هنيه: برضه مش حنتفاهم مع العدو‼! والدول العربيه كلها عملا لأمريكا وخونه للقضيه (أنا سمعت الكلام دا فين قبل كدا؟) الجهاد يا أخوه…. الصبر الصبر… فرج الله قريب

واحد فلسطينى: بس احنا مش لاقيين أكل

هنيه: صوم يا أخى‼ ماسمعتش فضل الصوم؟؟

الفلسطينى: المشكله مش فيا… ابنى الرضيع

هنيه: دا لو مات يبقى شهيد، يا بختك انت وأمه

الفلسطينى: فال الله ولا فالك‼! هو دا الرخاء الى وعدتنا بيه فى برنامجك الأنتخابى؟؟

هنيه: الرخاء قادم لا محاله، وفرج الله قريب، ماسمعتس يا أخى ان التوراه عندهم بتحذرهم من قرب نهايتهم؟

الفلسطينى: الكلام ده امتى انشاء الله؟؟

هنيه: قريبا يا أخى… أصبر فالصبر طيب

المشهد التانى

عباس وهنيه وقادة الكتائب والفصائل والأجنحه والألوبه والحركات والذى منه، فى اجتماع فى شرم الشيخ مع مندوب مصرى ومندوب سعودى لتهدئه الأزمه الناشبه بين الفلسطينيين وبعضهم

مندوب مصر: يا جماعه، انتو عندكم حول؟؟ نازلين ضرب فى بعض وسايبين الشعب بيطحن؟

عباس: م هما الى ابتدوا الضرب الأول

هنيه: لا لا لا يا أخ عباس، الكذب حرام، انت الى قرصتنى الأول

عباس: بلاش كلام فارغ، انت خدت لعبتى وأنا عيطت واشتكيتك

قائد كتائب الأقصى: عااائدون… عااائدون… عااائدون

قائد الجناح العسكرى لحماس: سنجاهد…. سنجاهد… وسنكشفش فسادكم وظلمكم

عباس: يا عم قول كلام على قدك‼ دا لو الشرطه الوقائيه نطت عليكم حاتقطعكم

هنيه: الكلام دا خطير، شاهدين يا جماعه؟

مندوب السعوديه: بلاش لعب عيال والنبى، ركزوا شويه علشان نحرك القضيه قبل ما اسرائيل تعمل حركة غدر وتضيعها للأبد

مندوب أحد الفصائل: ما تقدرش‼ الشعب الفلسطينى حيحارب حتى أخر قطره من دمه، حتى لو مابقاش غير الرضع

مندوب أحد الكتائب: وبعدين ماتقلش اسرائيل، احنا مش معترفين بالأسم دا أصلا

مندوب السعوديه: ماشى يا عم، بلاش اسرائيل، الدوله الى بالى بالك

مندوب الكتائب: دى مش دوله، دول جماعه ارهابيه محتله

مندوب السعوديه: يا سيدى الزفت الأرهابيه الأحتلاليه العنصريه اللولبيه الهبابيه…. أى حاجه… بس خلينا نمشى مراحل نحاول نتفق علشان قيام دوله فلسطينيه الأول

هنيه: برنامجنا ثابت، لا اتفاق مع العدو الصهيونى ولا تفاوض ولا استسلام ولا تراجع ولا وقف للقتال

عباس: ولا حد حايعيش زى البنى أدمين ما هما عايشين

هنيه: ما هو لولا مواقفكم الأنهزاميه واتفاقياتكم الخائنه مع العدو كان زمانا دلوقت حالنا أحسن

عباس: أحسن ازاى يعنى؟؟ على الأقل فى المرحله الأولى أعلنا دوله فلسطينيه، وقطاع غزه استقل وقطاع الضفه الغربيه تحت الحكم الذاتى الفلسطينى، والحكومه الفلسطينيه تتلقى مساعدات دوليه منتظمه لبناء البنيه التحتيه

مندوب الكتائب: أى هوان هذا؟؟ أرأيتم هوان أكبر؟؟ أين الجهاد؟؟ أين الكفاح؟؟ أين الأستشهاد فى سبيل الله؟

عباس: طيب واستشهاد ليه اذا كان ممكن نبتدى تفاوض ونشوف؟

هنيه: لا نتفاوض مع محتل أبدا

عباس: يا عم احتلونا وخلاص من 50 سنه، احنا حاربنا وجاهدنا واستشهدنا…. نقدر عليهم بوضعنا دا؟؟

مندوب الفصائل: سنذيقهم الويل وعظائم الأمور، وسنجعل الكيان الصهيونى يرتعد هلعا

مندوب مصر: ما هو احنا مش واخدين منكم غير الكلام

هنيه: ما احنا سيبنا فرصه للتفاوض و مافيش نتيجه

عباس: امتى سبتو فرصه، دا كل ما كنا نيجى نقعد مع بعض فى محادثات تيجى عمليه ارهابيه توقف الكلام

مندوب الألويه: ماتقولش ارهابيه، استشهاااااديه

عباس: استشهاديه يا سيدى ما تزعلش…. أهى عمليه وخلاص

هنيه: لا اتفاق ومهادنه، كفانا مهانه

مندوب مصر: طيب لا مهادنه، ما تعلن الحرب على اسرائيل؟؟

هنيه: هوا أنا مجنون؟؟ عايز اسرائيل تسحق فلسطين؟؟

مندوب مصر (ضاحكا): بس ماتقولش اسرائيل

هنيه (خجلا): أقصد العدو الصهيونى الأمبريالى الخمفشاوى. لا تفاوض، اما دوله فلسطينيه عاصمتها القدس أو لا

مندوب السعوديه: أنا أفهم حاجه من الأثنين، يا حرب يا سلام…. انما أضرب وأجرى وبعدين تجروا تصوتوا علشان العالم يلحقكو؟؟ مش فاهم ليه

مندوب الكتائب: احنا حانرد العدوان بالعدوان، وحانضربهم بصواريخ القسام حتى يموتوا خوفا

مندوب مصر: وحكاية القسام دى ماسخه أوى، دانتو ضربتوا يجى 600 صاروخ وماسمعناش عن خسائر ولا حتى صرصار اسرائيلى، هو انتو حاشينهم رز؟؟

مندوب الكتائب: بدل ماتشجعونا عمالين تتريقوا؟؟ هما الحكام العرب جرالهم ايه؟؟ ليه الذل والخزى والعار دا؟؟

مندوب السعوديه: انتوا عايزينا نمشى على رأيكم بس ومش عايزين تسمعوا رأينا؟؟ علشان تبقوا قوه تتفاوض لازم يكون عندكم رأى واحد وحاجه تساوموا بيها؟؟ انما انتوا معندكمش… يبقى الحل ايه؟؟ ندى فرصه لأسرائيل تفرج عليكم العالم ولا نبتدى تفاوض؟؟

هنيه: لا تفاوض…. لا تفاوض…. لا تفاوض

مندوب مصر: خلاص يا عم، ربنا معاكم

عباس: خلاص ايه؟؟ فين المساعدات؟؟

مندوب السعوديه: مساعدات مساعدات مساعدات… كفاياكم بقى سرقه فى الشعب الفلسطينى الغلبان…. دا أبو عمار مات مسموم منكم‼! ويا حبة عينى كل المساعدات راحت لزوجته الغلبانه

I must say here that all my blogs are my OWN COMMENTS on what happened or is happening in the Middle East area, and all the "conversations" I am writing is only a fiction and are not based on any actual or real historical events. And my comments on the current actions are my own opinion and it can be right or wrong according to the readers different views.

فيلم عجبت لك يا زمن

المشهد الأول: اجتماع بين أنور السادات وياسر عرفات/القاهره 1977

السادات: أنا مش فاهم ايه المشكله يا أخ ياسر، حانروح نتفاوض واذا ما عجباكش الكلام امشى
عرفات: أتا لايمكن أتنازل عن شبر من قضيتى
السادات: هو انت سمعت حد قالك اتنازل؟؟ هو يعنى أنا رايح أتنازل عن سينا؟؟
عرفات: شعبى بيعتبر أى محادثات مع العدو الصهيونى خيانه، وانا مش معقول بعد العمر الطويل والكفاح دا، أبيع القضيه
السادات: يا سيد ايه الكلام الكبير دا‼! تبيع قضيه ايه، هيا كيلو كفته؟؟ ما تبيعش ولا تشتريش…. روح قول رأيك... اظهر قضيتك للعالم.. قول كل الى انت عايزه ما حادش حايوقفك…. وبعدين ما خادتش حقك، كافح يا سيدى زى ما انت عايز
عرفات: مع احترامى ليك دى خيانه، أنا لا يمكن اتفاوض مع العدو، وما أخذ بالقوه لا يسترد الا بالقوه… مش كده والا ايه؟؟
السادات: والله انت حر، أنا بحاول أفهمك وانت مصر… براحتك… دا شعبك وانت أدرى

المشهد الثانى: اجتماع بين ياسر عرفات وقيادات منظمة التحرير الفلسطينيه

رقم 1: الراجل دا (يقصد السادات) قالك ايه؟؟
عرفات: دا باين عليه مجنون والا عميل والا خاين للوحده العربيه…. مش عارف والله. قال ايه، حيتفاوض مع اسرائيل على سلام وانسحاب من سينا… قال اسرائيل حاتنسحب من سينا قال… الجدع دا بيحلم؟؟ اسرائيل الكبرى من النيل للفرات، يبقى معقول تنسحب من سينا وهى على بعد 300 كيلو من النيل؟؟؟ مجنون طبعا
رقم 2: أوعى تكون حاتروح تتفاوض زيه؟؟
عرفات: ليه شايفنى مجنون؟؟ أبيع قضيتى وشعبى وأخون العروبه؟؟ فين الجهاد والشرف والكفاح؟؟
رقم 3:(فى سره) فى البنك يا حبيبى

رقم 3:عندك حق يا أبو عمار، زين ما اختارت
رقم 4: السادات دا خاين، ولو حط ايده فى ايد اسرائيل لازم الجامعه العربيه تقاطعه وتطرده…. دا كمان يبقى كافر بيعمل معاهدات مع اليهود
رقم 4:هوا دا الكلام، بلا مفاوضات بلا كلام فارغ….. الكفاااااااح… المقاااااومه…. تعيش فلسطين حره أبيه
رقم 1 و 2 و3 و4 يرددون وراءه: تعيش فلسطين حره أبيه
عرفات: اذا اتفقنا يا اخوه
الجميع: اتفقنا
عرفات: انفض الاجتماع
فى طريقهم للخارج، عرفات يسحب رقم1 جانبا….: كلمت الأخوه فى السعوديه عن المساعدات؟؟
رقم 1: الملك بعت المبلغ فى حسابك…. 50 مليون دولار
عرفات: بسسسسسس؟؟؟ الملك دا باين عليه خاين هو كمان
رقم 1:صبرك يا ابو عمار شويه
عرفات: طيب و قطر؟؟
رقم 1: الأمير لسه بيجهز المبلغ
عرفات: أنا مش فاهم الناس دى بتعمل كده ليه؟؟؟ يعنى أبيع القضيه وأخلص؟
رقم 1 فى سره: هوا انت لسه ما بعتهاش؟؟

المشهد الثالث: جامعة الدول العربيه

مندوب فلسطين: شوفتوا الخيانه والعماله… أهو اتفاوض مع اسرائيل وأخد سينا تانى‼ لا، ومن غير حرب‼ فين الدم؟؟ فين الكفاح؟؟؟ فين الجهاد؟؟
مندوب العراق: لازم نقاطع مصر الخاينه… لازم نوريهم ان الخيانه والخروج عن الوحده العربيه مش حاينفعهم. قال خد سينا من غير حرب؟؟ خاين
مندوب الأردن: طبعا دى خيانه واضحه… أنا رأيي نقاطع مصر ونسحب الجامعه لتونس
مندوب تونس: واحنا بنرحب باستضافة الجامعه على أرض تونس ونوافق على مقاطعة مصر
مندوب الجزائر: واحنا كمان
مندوب الكويت: واحنا موافقين. مصر دى أكبر خاينه
مندوب المغرب: موافقون ايضا
موافقه بالأجماع، مقاطعة مصر، نقل الجامعه الى تونس
عرفات لمرافقيه: هوا السادات فاكرنى مجنون؟؟ أعمل سلام ومفاوضات مع اسرائيل علشان العرب يقاطعونى ويوقفوا المساعدات؟؟ ها أو أو أو

المشهد الرابع: بعد 25 سنه

عرفات يتفاوض مع اسرائيل على مافيش…. قطر والأردن وتونس والمغرب ودول عربيه اخرى لهم علاقات مباشره مع اسرائيل (علنيه أو خفيه)… القضيه الفلسطينيه زى ما هيا.. ولسه قدامها 100 سنه لغاية ما حد يعمل حاجه، وما حدش حايعمل حاجه

فيلم نجادى لا تعادى

المشهد الأول

مجلس الأمن مجتمع لبحث مسئلة العراق واعلان أمريكا امتلاك صدام حسين لبرنامج نووى وكيماوى… مندوب أمريكا، مندوب ألمانيا، مندوب انجلترا، مندوب فرنسا، مندوب روسيا، مندوب الدول العربيه

مندوب أمريكا: وكما رأينا فى الصور، فهناك مواقع عراقيه تحتوى بالتأكيد على مواد كيماويه، وأمريكا تخشى على نفسها وعلى العالم من هذا الخطر. ونرى ضرورة ازاله هذه المواقع فورا والا سنهاجم العراق ونبلغ الواد صدام : يا فيها يا نخفيها

مندوب ألمانيا: نرى أن التفاوض مع صدام هو أمر واقعى قبل الحديث عن عقوبات

مندوب انجلترا: نحن مع أمريكا فى مطالبها

مندوب روسيا: نرفض حل الحرب، وسنستخدم حق النقض لهذا القرار

مندوب فرنسا: نحن ايضا سنستخدم حق النقض

مندوب الدول العربيه: ونحن أيضا

مندوب أمريكا (فى سره لمندوب الدول العربيه): يا شيخ اتلهى، هو انتوا عندكوا حق لأى حاجه، دانتوا معندكوش أى قوه ولا مجال لتفاوض

الأجتماع ينفض بغير اتفاق

المشهد الثانى

صدام حسين يهدد ويتوعد بالقتال وعظائم الأمور والويل والثبور….. الخ من الشعارات العنتريه…. وزير الأعلام العراقى يهدد أمريكا بالرد الحازم الحاسم القاطع الباتر المتوهج التمشعلق

هب….. أمريكا فى وسط العراق‼! وكل واحد عمل نفسه عبيط… روسيا وفرنسا والمانيا والدول العربيه‼ صدام اختفى فى لحظه (وان كانوا لاقوه بعد كده فى حفره)، والصحاف بعد الضنا لبس حرير فى حرير…. أقصد بعد ما ملاء القنوات الفضائيه بأخبار العلوج… فص ملح وداب‼ وأمريكا نزلت تلطيش فى العراق والعراقيين وما حدش لقا برنامج نووى ولا كيماوي ولا حتى برنامج تلفزيونى، وكل الدنيا هسسسسس… امال فين العنتريه والشجاعه والجهاد حتى آخر نفس؟؟ تحت السرير، وفى القنوات الفضائيه، وعلى شعوبهم الغلبانه وبس

(السيناريو دا شفتوا فين قبل كده؟؟)

وضاعت العراق

المشهد الثالث

مجلس الأمن مجتمع لبحث الأزمه النوويه الأيرانيه… مندوب ايران، مندوب أمريكا، مندوب ألمانيا، مندوب فرنسا، مندوب روسيا، مندوب الدول العربيه

مندوب امريكا: وكما اتضح فان البرنامج النووى الأيرانى غير سلمى ويطمحوا لأنتاج قنبله نوويه، وأطالب ايران بوقف التخصيب فورا

مندوب ألمانيا: ممكن يا أستاذ نجادى بلاش حكاية التخصيب دى

نجادى: نستخدم حقنا فى انتاج طاقه تخدم الدوله الأيرانيه

مندوب روسيا: هناك مفاوضات لتخصيب اليورايوم الأيرانى فى روسيا

نجادى: لأ، حانوقف المفاوضات دى، مش عايزين

مندوب فرنسا: ليه بس، الطيب أحسن

نجادى: هوا كده، عاجبكم والا لأ؟؟؟

مندوب أمريكا: يبقى نطالب بعقوبات على ايران

نجادى: ما تقدرش

مندوب روسيا: عقوبات ايه بس يا أمريكا…. ما احنا بنتفاوض أهه

مندوب فرنسا (يميل ناحية المندوب المريكى ويهمس): عقوبات ايه؟؟ يعنى حانعمله ايه؟؟ زى صدام مثلا؟؟

مندوب أمريكا (هامسا): لأ صدام ايه، الدنيا هنا مختلفه… أهو كلام وخلاص

نجادى: مش حانوقف البرنامج النووى بتاعنا، وطظ فيكم كلكم وعلى رأسكم أمريكا

مندوب المانيا (يغمز بعينه للباقيين): يا أستاذ نجادى، طظ فينا وفى اللى خلفونا، بس بلاش تخصيب

نجادى: حانخصب.. وأعلى ما فى خيلكم اركبوه

مندوب فرنسا: طيب تاخد 100 مليون يورو وأسلحه وحانوصلك كهربا مجانا لحد بيتك بش وقف تخصب

نجادى: مش عيب ناس محترمه تهزاء نفسها كده؟؟ ما تقلوش احترامكم معايا والنبى

مندوب أمريكا: حانضرب ايران زى ما ضربنا العراق، وذنبكم على جنبكم

نجادى: طظ فيكم، ولو شاطرين خلوا عسكرى أمريكانى يضرب طوبه فى الخليج حتى. أديكوا عنوان المفاعلات الأيرانيه والا عارفينها؟؟

مندوب فرنسا: طيب بص… أخر كلام… بوش حاييجى يوميا لحد طهران يعمل قرد علشان يسلى الشعب الأيرانى، بس توقفوا التخصيب

نجادى: والله لو الشعب الأمريكى كلوا عمل قرود، … أنا ماشى، الكلام معاكو مش جايب هموا

مندوب امريكا: يا عم انت خلقك ضيق ليه….. الكلام أخد وعطا

نجادى: مش حاوقف تخصيب وحاعمل قنبله نوويه…. عندكم كلام مفيد قولوه… ما عندكمش يبقى ما تعطلونيش

مندوب ألمانيا(فى سره): يخرب بيتك دماغك ناشفه… مش عارف نعملك ايه؟

نهاية الفيلم : لو عايز تعمل عنتر يبقى لازم يكون عندك سيفه‼!……….. حد فاهم حاجه؟؟