في ملاحظات وأراء كتيرة أوي علي حكاية غزة واللي بيحصل. ولكن بعيد عن التهليل والتشنج و "لا لتجويع غزة" و"تضامنا مع غزة" والحبشتكانات الي لا تودي ولا تجيب في عالم السياسة والتخطيط الحقيقي، عايز اقول شوية نقط يمكن اكون صح ويمكن أكون غلط فيها:
- المجموعة اللي ماسكة غزة دلوقتي ليها وجهة نظر معينة في تحرير فلسطين مش مجال نقاش اذا كانت صح والا غلط هما حرين، بس كمان في وجهة نظر تانية في الضفة وحصل خلاف بينهم. اللي يعنيني هنا هو الكيفية اللي صفوا بيها الخلاف، مش يتفقوا ويتوحدوا، لا دول نطوا علي بعض، عملوا سباق سرعة مع اسرائيل مين يخلص علي الفلسطينيين الأول. شوفت فيديو على النت أسمة "ماذا حدث"، عن الأيام الأخيرة قبل ما تنفصل غزة عن الضفة، كمية اعدامات وخيانات واستهتار بأرواح الناس واستعراض قوة علي الفاضي، من فتح ومن حماس، هوا دا تاريخ فلسطين الحقيقي، هيا دي الحقيقة المرة.http://www.tadwen.com/working-brain/?p=221
- سيبكوا بقي من حكاية الحركة الأسلامية ولازم نساعد اخوانا المسلمين ونظام الهطالة دة اللي محدوف علي مصر بس علشان العلاقة القوية بين حماس والأخوان، دي مش علاقة بس دول فرع منهم كمان. هما نفسهم مساعدوش بعض وبيقتلوا في بعض وبيخونوا في بعض، اية علاقة دة بالأسلام. اذا كان بعض الفلسطينيين أغني أغنياء العالم العربي ومنهم اسر معروفة بالأسم في مصر مبعتوش ربع كيلو جبنة علي غزة... بلاش، هيا الدول العربية التانية مش مسلمة برضو، طب ما ياخدوا الفلسطينيين ويحموهم ويأكلوهم ويغطوهم قبل ما يناموا كمان.
طب لو حد في أي دولة عربية غير مصر جرب يعمل مظاهرة، الشرطة مش حتضربة.... لا لا لا هما زي الغجر اللي في مصر... دة لو حد عمل مظاهرة هناك حيختفي تماما، دة لو لحق يفكر أصلا....
- ما الوفد الأمني المصري اتضرب لما اتعمي من حماس، ووزير الخارجية المصري انضرب بالجزم، هو الوفد والوزير دة برضوا مش من الأخوة المسلمين برضة والا طالما مش حماس والا أخوان يبقي من الأخوان الكافرين.
- محدش يفتكر ان اسرائيل فوجئت "اذ فجئتن" بالفلسطينيين بيفتحوا الحدود وبيتدفقوا، وجهة نظري ان هيا دي الخطة الأساسية علشان يعودوا الغزاوية علي الحركة دي وهوب "مصر هيا أمي، وسينا جوا دمي" ونصدر القضية لمصر يا يخلصوا علي الفلسطينيين يا الفلسطينيين يحتلوا نص سينا ويرفعوا العلم هناك (رفعوا العلم فعلا في الشيخ زويد)، وأهو نريح العساكر السرائيلية شوية. طب ما هيا اسرائيل عارفة ان مصر معندهاش قوة كفاية في سينا توقف مية متين ألف فلسطيني لو حاولو يعدو، ساعتها بقي حتبقي مشكلة مصر وفلسطين والحرب حتبقي جوة وولعها يا ريس. هما المليون ونص فلسطيني في غزة كلهم بيدينوا لحماس باسمع والطاعة؟ لو قلنا ربعهم عايز يطفش ولقو سينا قدامهم حتبقي كارثة.
- من ضمن اللي حيتسللوا لمصر عناصر تخريبية سواء فلسطينية أو اسرائيلية وهاتك يا تفجيرات وبهدلة في المصريين اللي مش عارفين يلاقوها منين والا منين.
- سؤال جة في دماغي امبارح: لما كان في حرب في افغانستان ضد الروس، كنا بنسمع عن الجهاد وناس بتسافر بالزوفة متطوعة واشي "الجهاد فرض عين" "ومناصرة اخوانا في افغانستان" .... طيب ما في حرب ضد الأمريكان في العراق وضد اليهود في فلسطين، مسمعناش لية عن الجهاد والتطوع؟ والا المخابرات الأمريكاني مدفوش كويس المره دي؟؟
- بس ونبي روحو جاهدوا بعيد عننا، لما تحطوا صوابعكوا العشرة في الشق من الفلسطينيين تبقوا تشوفوا حد تاني تجاهدوا معاه.
- بصوا:
طيب بصوا دة كمان:
لما تنتن يتلم علي تنتون حيعملوا فينا اية؟
ودي:
http://www.almasry-alyoum.com/article.aspx?ArticleID=91659
- اللي حيطلع يقولك ربنا ما يوريك الحصار واحنا بنحارب العدو والكفتة والبطيخ اللي بيتاجرو بيها... معلش ما مصر كانت بتحارب بسبب الفلسطينيين وكان عندنا سينا كلها محتلة وحاربنا 6000 حرب ومات من كل بيت في مصر واحد... أنا شخصيا فاكر الغارات السرائيلية علي القاهرة سنة 67 وكنت لسة عيل صغير ولما كنا بنجري علي المخابىء... بس في مصر في رجالة بصحيح مش تجار خونة... رجعوا سينا وحاربوا صح ووحدوا جهودهم لقضية واحدة... مقعدناش نشحت علي القضية واهي يا عم سبوبة للي يدفع أكتر لمصلحتة، اللي يولع فتح واللي يولع حماس وأهي كروش وجيوب بتتملي وعمر ما حد حيحل القضية.
هناك ٣ تعليقات:
هو واضح بالنسبة لي انك لم تفهم الفيديو الذي وضعت رابطه أصلا..في هذه الحالة فالمشكلة ليست من الفلسطينيين..
على أي حال فقد كتبت تدوينة جديدة، لكن والله قبل أن أقرأ تدوينتك..
سيدي أرحم دماغك، بالنسبة للفيديو فهو واضح تماما س من الفلسطينيين ضد ع منهم نزلوا ضرب في بعض ومافيش حد افتكر فيهم ان فية اسرائيل ولا فية أخوة ولا فية قضية، كل طرف عايز يثبت شرعيتة وحقة في الحكم وطظ في الشعب والقضية واللي يجوع يجوع واللي يموت يموت دا حتى اللي مايموتش من رصاصة اسرائيلية يموت من رصاصة فلسطينية واللي ما يموتش بالرصاص حيموت من الجوع. حد خد بالة من كمية الرصاص اللي انضرب هناك وظهر في الفيديو، دة رصاص فلسطيني/فلسطيني ..... صحيح حظائر الخنازير والكلاب انفتحت.
يا سيدي أستحلفك باللة أن تكون موضوعيا، اذا كان هناك مؤامرة دولية وقلة نخوة واخوة واسلام وانبطاح، امال مين اللي كان بيحارب وبيدافع عن مصالح الفلسطينيين قبل كدة؟ لية ماتكونش فية حلقات كتيرة غايبة عن حضرتك وش ممكن تتقال في وسائل الأعلام؟ انت شايف السطح بس ومش عارف الكواليس بيحصل فيها اية، اللي بيحصل هناك شىء مروع ميقبلوش عقل عادي، ومع ذلك مضطرين نتعامل معاه وبسرعة.
شوف حقولك، بغض النظر عن ماهية الفصائل الفلسطينية المتحاربة (ضد بعضهم مش ضد اسرائيل حاشا للة)، وبغض النظر عن الأجندات الفجة المجرمة اللي كل فصيل بيحاول ينفذها علشان ملايين الدولارات تملى جيوبة وجيوب اتباعة ومش مهم باقي الفلسطينيين، طظ، يا رب الوبا ياخدهم.... بقولك برغم كل دة المهم كام حاجة:
- الشعب الفلسطيني (الجزء المطحون) يتلاقالو متوي يتاوا فية ولقمة يطفحها، ودي حلها سهل انشاء اللة.
- يحلوا بالسلامة بعيد عن مصر وحدودها علشان شعب مصر تعب أوى يرجع حتة حدودها دي بالذات وماتلنا في كل بيت بدل الشهيد اتنين، وماخوناش بعض وماحارباش بعض والأهم من كدة متفقناش مع اسرائيل ضد بعض، فمعلش المرادي الأخوة في (دولة غزة المحررة) يستحملوا شوية علشان مواطني عزبة الصفيح اللي تعدادهم أكبر من تعداد غزة يلاقوا ياكلوا، ولا دول ديانتهم صفيح والتانيين مسلمين؟
- الخونة اللي عارفين نفسهم كويس وبينفذوا أجندات دول تانية وبيقبضوا من تنظيمات محظورة ، يا ريت يلموا نفسهم علشان الشارع المصري مش حيقبل بخراهم وقلة أدبهم وكفاية ان ريحتهم فاحت أوي.
- ما اللي عايز يروح يحارب في غزة ما يروح، هوا حد ماسكوا، بس بلاش جعجعة علي الفاضي وكل واحد قاعد يتهم التانيين وهوا قاعد في بيتوا تحت الغطا، ما اللي عايز يساعد ما يساعد
شوف يافندم انا طبعا عارف كويس انه التفكير عملية شاقة على بعض الاخوة وانه كلام كتير ملوش معنى ولا أصل بيتحدف كدة وخلاص..
كلامك يا أستاذي أولا في منتهى السطحية، فانت سطحت الفيديو ومحتوياته لسين وصاد وده لا يدل بالنسبة لي على شئ غير كونك من النوع الذي يرهقه التركيز أو يخشى مواجهة الواقع..
وتعليقك على الخونة وأجندات الدول الخارجية تعليق مضحك..يا حبيبي الخونة مش بيقبضوا من تنظيمات محظورة ولا حاجة، الخونة بيروحوا أنابوليس يشحتوا لمواجهة المقاومين الشرفاء وبعين قوية وبتصريحهم هم وكلامهم هم..الخونة مصر بتدربهم وبتسلحهم، أيوة الحكومة المصرية التي لم تنتخبها وبتحكمك برضاك أو غصب عنك..
فرجاء متجيش تنط من فوق كل ده وتدعي انه في كواليس أنا معرفهاش..اللي انا اعرفه واضح جدا ومفيش دخان منغير نار!
مصر يا حبيبي معنية بالأمر، وبشكل مباشر، ولو لم تصمد غزة اليوم، ستسير الدوريات الصهيونية في الأزبكية غدا..طبعا منسوبي حظيرة الخنازير وقتها هيكون حالهم من حال عباس، واكلين شاربين نايمين، وآخر أخبارهم انه طارق عباس رايح يشارك في شركة اتصالات اسرائيلية..في حين الشعب هيكون حاله من حال غزة..
على فكرة السيد حسني مبارك كان قال في السابق اللي عايز يروح البوسنة ما يروح، أبشرك بأنه اللي رجع منتصر تم اعدامه..
أفكرك كمان انه كان مصير اللي سمح لهم السادات بالمرواح..
وأفكرك انه الرصاص المصري كان بالمرصاد للشباب اللي حاولوا يروحوا قبل كدة..
لكن على أي حال محدش قال انه مصر تحارب، بنقول انه مصر لاتتورط في جرائم حرب..
بنقول انه مصر لازم تفضل نقية الثوب..
انه مصر تقفل حدود بغرض تجويع شعب..دي جريمة، لما تقوم بيها حكومة مصر تبقى حكومة مجرمة..
لا قلنا نسيب الحدود عالبحري ولا غيره، بنقول الناس اللي عايزة تشتري دي..والتجار اللي عايزين يبيعولهم..من حقهم يتبادلوا البضائع عن طريق المعبر بشكل عادي وطبيعي..
مش تقفل الحكومة المعبر وتجوع الناس، ودلوقتي يصوتوا ويقولوا لنا حدود!..لأ طز في الحدود والسيادة كمان لما نتكلم عن حياة الانسان..وشرحت الكلام في البوست الجديد
إرسال تعليق