تحديث لخلصنا لعب (البوست السابق)

إظاهر فوضي المحلة لسة مخلصتش، الضرب لسة شغال، ومش فاهم مين بيضرب في مين. أمن مركزي بيضرب قنابل غاز، وشوية بيحدفوا طوب، وناس بترد عليهم بطوب. بس الظاهر إنوا مش بس العمال إلي في الموضوع، دا في ستات بجلاليب وعيال ببيجامات، الستات بتصوت والرجالة بتقول اللة وأكبر. وكل واحد يطلع علي قناة فضائية يقولي "عمالنا" منتظمين وملتزمين، امال مين إلي مش ملتزمين؟؟

المصيبة مش عارف مين بيهيج مين، الأمن عايز يقبض علي ناس والمواطنين بيدافعوا عنهم، والا في ناس لقوها لعبة حلوة ويالا نضرب.... أهي خيبة وخلاص من الكل...... أمن عندة عبط وبله ونازلين ضرب... وناس مش لاقية حاجة عدلة في حياتها، ففرصة يطلعوا غلهم. ما علينا.

المصيبة لتكون الحكومة حتضرب المربوط علشان يخاف السايب... حتمسح بالمحلة الأرض علشان تكون عبرة لمن لا يعتبر. كان ممكن الأمن تسيب الناس تعمل إضراب تعمل كوسة براحتهم حيروحوا في الأخر ومش حيحصل حاجة، إنما إلي مخلي الفار يلعب في عبي إن الموضوع كبر والضرب طال. يا تري مين بيخطط لمين؟

الكوميديا إن في دعوة إضراب عام في الضفة الغربية، ومحمود عباس بينذر وبيتوعد ... إظاهر إنوا والعياذ باللة مرض بينتشر، يا تري يا عباس عندك أمن مركزي والا نبعتلك شوية؟؟

خلصنا لعب والا لسة شوية؟؟

صحيت الصبح يوم الأحد 7/4/2008، يوم أجازة الحمد للة، حضرت أكل، وشحذت كل أسلحتي من إنترنت وقنوات فضائية، ولية لأ، دا اليوم دا فاصل في التاريخ المصري وعمرها ما حصلت، إضراب عام والناس كلها يا قاعدة في بيوتها يا متظاهرين في الميادين العامة للمحافظات. وبالنسبة للي عايشين برة مصر زيي منقدرش نعرف إلي بيحصل غير عن طريق الحاجات دي، يا إنترنت، يا دش، يا تليفون للأقارب والأصحاب.

أقلب في القنوات الفضائية، ولا حاجة...... !!! الصحف علي النت، ولا حاجة..... أخبار عن الدعوة للأضراب بس... طب إية إلي بيحصل حد يقولي حموت واشوف الحكومة وهيا بتسقط.

مبدهاش، كلمت أمي... ها إية الأخبار بتاعت الإضراب؟؟ الشوارع فاضية أوي وأختك خافت تودي العيال المدارس لحسن يحصل ضرب .... يعني يا أمي مافيش مارشات عسكرية وقرأن في التليفزيون؟؟؟ شكلها بعد الجملة دي إفتكرت إني بشرب خمرة في بلاد الفرنجة وسكرت.

إبتيدت أشوف المدونات ..... القبض علي كوكي وهوا ماشي في الشارع ... القبض علي سوسو وهوا نازل من بيت طنط لولو .... كوكي رحلوة علي إسم النبي حرسوا ..... كوكي مش لاقيينوا والظباط الوحشين بيقولوا مش موجود وفوتوا علية بكرة لما يستحمي..... سوسو بيتعرض علي النيابة، اصل طنط لولو طلعت وحشة ومرضيتش تعترف إنوا كان بايت عندها وإنوا مش من تنظيم المضربين الأحرار .... إنت من الأحرار يا سوسو.... نط في اللوري.

وبعدين جت أخبار المحلة متأخر وإبتدت قنوات العربية والبي بي سي يجيبوا لقطات عن الأحداث والهتافات وبعدين الصدامات ومارشات الرعاع وهما بيحيوا الكاميرا ومناظرهم الحلوة، وكلوا فرحان .... هييييييي مظاهرات.

وبعدها برضة المدونين جابوا فيديوهات متصورة من فوق السطوح مفهمتش منها حاجة اكتر من إن في ناس بيعملوا حرايق وقوات الأمن بيسحلوهم .... يمكن أنا غبي معلش والمعني الموجود في الفيديو في بطن المخرج... يمكن.

وبعدين.... خلاص... بس خلاص خلصت الحدوتة .... يوم الأثنين 7/4/2008 يوم عادي خالص، الناس بتحارب في طوابير العيش ومحشورة في المواصلات والحكومة مش هنا، والمعارضة من هناك ..... ونفس الفيلم الهابط. عاملين زي لما كنا صغيرين، وتيجي راس السنة، كنا فاكرين حنصحي تاني يوم نلاقي شمس مختلفة وناس مختلفة... ونفاجاء إنها نفس الدنيا متغيرتش.

================

بس يا ناس، لعبنا كتير وهرجنا كتير في البوست دا، نتكلم جد بقي:

1- أشكر جميع من ساهم في إخراج هذا الفيلم من متظاهرين وعمال ومحامين وطلاب، وأشكر السادة رؤساء وأعضاء الحركات إياها علي ظهورهم علي شاشة التليفزيون لإمتاعنا وتسليتنا.... وأخص بالشكر علي رأي الكابتن لطيف قوات الأمن وجنودها الساهرين علي سحل المتظاهرين وضربهم علي القفا. كما أخص بشكر خاص المجهولين وراء إخراج هذا الفيلم لبراعتهم في الإخراج. وطبعا مننساش دعم الحكومة للفيلم لما سمعتنا صوت ركبها وهيا بتخبط في بعض ومنظر حاجات كدة صفرا نازلة في البنطلون من الرعب.

2- هما قالوا إضراب عام والا مظاهرات والا ثورة والا إية، مش فاكر.

3- هما عمال غزل المحلة مائة واحد بس؟؟ والا دول بعد قنابل الغاز كشوا؟

4- طول الوقت وانا بشوف الأحداث مش لاقي حاجة مختلفة خالص، نفس المناظر إلي بتمتعنا في المظاهرات بتاعت كفاية وحزب حمؤة طول السنة وإضرابات عمال النسيج (هوا مفيش عمال غيرهم؟)، ونفس الكلام ونفس الشعارات ونفس تدخل الأمن ونفس السحل ونفس الضرب علي القفا، ونفس المدونات الي شغالة "عاجل، القبض علي سوسو" ...... هيا هيا نفس المناظر ... إية، نجيبلوكوا ممثلين من سوريا والا إية؟؟ وفي الأخر الحكومة عارفة ديتها، المعارضة عارفة ديتها، كاتب السيناريو عارف ديتوا، والمخرج هوا إلي بيقش كلة والمتفرجين هما إلي بيدفعوا تذاكر السينما وأرباح الفيلم، وبيدفعوا أي خسائر لو كسروا الكراسي وقالوا "سينما أونطة هاتوا فلوسنا".

5- طبعا المحظورة بما إن قاعدتهم عريضة لامؤاخذة، قروا السيناريو صح لأول مرة في حياتهم، ومرضيوش يشتركوا في العرض، حيشتركوا في حاجة ببلاش كدة يعني؟ هل هما كانوا فاهمين حيحصل إية والا خافوا ينضربوا والا مرضيوش يزعلوا الحكومة ومجالهومش عرض أحسن والا إية؟؟ أهو أحسن برضوا ميشتركوش، يعني هما مشتركين في إية؟

6- السؤال إلي محيرني في كل الإضرابات، سواء الغزل والا الضرايب والا الأطباء والا غيرهم، هما عاملين إضراب لية؟؟ مش يبوسوا إيدهم وش وضهر بدل ما هما أصلا عالة علي المجتمع إلي بيدفع ضرايب؟؟ هوا في عامل بيشتغل أساسا؟ والا في حد من بتوع مصلحة الضرايب بيروح الشغل ويشتغل صح بما يرضي اللة؟؟ طب الدكاترة دول لازمتهم إية في المستشفيات، ما كلنا عارفين مستشفيات الحكومة وإلي بيحصل فيها.. وغيرهم وغيرهم وغيرهم.... محدش عايز يتقي ربنا في شغلة وكلة عايز يحش ويخلف وطز في البلد. ما الحكومة إلي بيهاجموها دي هيا إلي بتطفحهم وتشخخهم وتحميهم وتسمحلهم يزوغوا وميشتغلوش، وفي الأخر عايزين زيادة.... أهو عك في عك من كل الأطراف. إلي يسمع عمال غزل المحلة يقولك الغزل المصري حيغزوا العالم.

7- الأخ بتاع "الإضراب نجح نجاح غير مسبوق وغير متوقع" والنبي يقعد في بيتهم ويلبس طرحة، نجاح إية يابو نجاح. والا التاني إلي كل مقلب قناة ألاقية، سبحان اللة تكنولوجيا بسبع أرواح، وبيدافع عن شجاعة الحكومة في مواجهة الأقزام. يالا أهو رزق الهبل علي المجانين.

8- الحل أنا قلتة في بوستات قبل كدة، وأي حل تاني خليكوا متأكدين إنوا حيبقي تهريج أو إتفاق مع الحكومة أو حاجة مشبوهة.

9- في الأخر أحب أقول للسادة المسؤولين..... معاكم 3 جنية لأول الشهر أشتري بيهم عيش؟؟