فجاءه الدنيا لخبتط. هيا الحقيقه مش فجأه، دا تغيير بيحصل بقاله سنين طويله، مبينامش دا بيزيد. إنما إلي فجأه هو أحداث دير أبو فانا إلي إنفجرت، وقبلها سرقة محلات الدهب، وبعدهم واحد مسلم قتل واحد مسيحي ...... أحداث ممكن تبقي طبيعيه، إنما بشوية بنزين تبقي مش طبيعيه. والبنزين إتدلق بالهبل من كل ناحيه، رهبان بيفتروا علي الحقيقه (دا إلي ظاهر)، محافظ مغطي الحقيقه (ويمكن لو إتكلم حيقول كلام متعاد محدش حيصدقوا)، نظام صامت ولا كأنه هنا (تحس إنه مستفيد إن الدنيا تولع)، والأنبا شنوده مبيتكلمش غير كلام مبهم عن الأحداث، مبيفسرش ومبيتهمش ومبينفيش. قال "خلاص أنا عارف كل حاجه" .... بس إحنا مش عارفين!!! المسلمين مش عارفين يا شركائنا في البلد ناويين علي إيه .... والمسيحيين مش عارفين شركائهم في البلد متهمين والا مظلومين، ناويين يقتلوهم واحد واحد والا مالهومش أي دعوه؟ مين إلي عارف يقولنا؟؟ مين نثق فيه أكتر من البابا وأكتر من أي حد مسئول يطلع يقولنا الوقائع بمستندات أهي: 1، 2، 3، ...... مفيش فتنه طائفيه والا فيه ولازم نحلها وفورا؟
في رأيي:
- مفيش فتنه طائفيه بالمعني الواسع. دي لو فتنه طائفيه كان المسيحيين إتدبحوا في الشوارع بالهبل .... هو إحنا مشفناش في بعض البلاد الأقليه بيحصلها إيه؟؟
- في كره واضح وتعصب بيتزايد من بعض المسيحيين ضد المسلمين، وإبتدت قنوات فضائيه متعصبه تظهر، مش محتاج أحكيلكم عن كم الرعب إلي بتبثه، والرعب دا بيوصل لمسيحيين الداخل كأنه حقيقه واقعه.... تبص تلاقي تزوير الحقيقه وأي مستمع مسيحي علاطول حيفكر: يا ولاد الكلب يا مسلمين .... بتعملوا فينا كل دا؟ فلما يتقالهم محمد قتل بطرس علشان بيكرهه لأنه مسيحي، تبقي حقيقه .... ميعرفوش إن بطرس دا عاكس أخت محمد ..... ولو مكانش بطرس حيبقي أحمد، ومحمد ساعتها كان حيقتل أحمد برضوا. كام واحد مسلم قتل واحد مسلم تاني علشان أي نزاع؟؟ وكان عادي، الحمد لله مقالوش سني قتل شيعي (لسه مش دلوقتي). فيعني لما مسلم يقتل مسيحي إيه الغريب في دا (بغض النظر عن كونها جريمه)؟ طب مفيش أي مسيحي قتل أي مسلم في تاريخ الجريمه في مصر؟ بطرس علطول ملاك ومحمد علطول شايل السيف؟
- مسيحيين الخارج أو أقباط المهجر، إلي في رأيي (بعضهم) بيسترزقوا من الأحداث، نظام ولاعها ولاعها شعللها شعللها، بس خلي واحد مسيحي يموت، وإديله مترحموش، بحب أشوف قناة الحياه بعدها.... والله بحس إن المسلمين ماشيين في الشوارع بالكلاشينكوف والمسيحيين مستخبيين في بيوتهم ليتقتلوا. طب ما لو المسلمين كانوا مجرمين وقتالين قتله ودينهم وقرأنهم بيأمرهم يقتلوا المسيحيين ويبيدوهم، كانوا خلصوها من 1000 سنه، مستنيين ليه سنة 2008 يعني؟ دا حتي من 1000 سنه محدش كان حيقولهم حاجه ولا يعاتبهم، ولا حد كان يقدر يقول يا حرام أو يا عيني حتي!!! كانوا مستنيين أقباط المهجر لما يظهروا علشان يقتلوا المسيحيين قدام شاشات التليفزيون فبتوع المهجر يسترزقوا أكتر؟؟؟ أه هيا شاشات الفضائيات السبب، حيث قال الإمام إبن بمبه: وإقتلوهم حيث وجدتوهم بشرط وجود عدسه للتصوير!!!
- برضه ترويج حكاية الأقباط هما أصل مصر، والمسلمين جايين غزو فمش بلدهم .... يعني الفراعنه كانوا مسيحيين .... والرومان إلي جم مإختلطوش بمصريين، والإسكندر الأكبر لما جيشه جه مإختلطش بالمصريين، والمسيحيين مأسلموش بالزوفه لما المسلمين فتحوا مصر .... في مين تاني؟ ماشي يا سيدنا إنت وهوا، المسلمين مش مصريين، عايزين إيه؟ قولوها بصراحه خلي عندكم شجاعه!!! والا حكاية اللغه القبطيه وإن كلام كتير من اللغه المصريه إلي بنتكلمها دلوقتي أصلها قبطي. هيا أصلها فرعوني، وقبطي يعني مصري.... فماشي، لغتنا أصلها قبطي، بيتكلمها مسلمين ومسيحيين ... يبقي مسلمين ومسيحيين قبطيين. والبلد بتاعت الكل. الفراعنه إلي بقوا مسيحيين، والمسيحيين إلي بقوا مسلمين.
- في حكاية الدير الأخيره: المصري اليوم جايبه الأحداث كلها بأرقام المحاضر: «المصري اليوم» تنشر القصة الكاملة للصراع علي أراضي الدولة المحيطة بدير «أبوفانا» .... الأرض مش بتاعة الدير والرهبان مغتصبين وكذابين، ومهياش بتاعة العرب او الفلاحين وهما مجرمين وبلطجيه. إشمعنا الحكايه دي؟ والا علشان الرهبان صوتهم طلع أعلي؟ طب أنا فاكر حكايه قريبه أوي، العرب فتحوا النار علي قاضي وظابط شرطه في نزاع علي أرض ناحية طريق مصر الإسكندريه الصحراوي وقتلوهم. أنا نفسي كنت عايز أشتري ارض للإستصلاح في المنطقه دي وقالولي لازم تراضي العرب وإلا حيقتلوك!!! طبعا الرهبان مش حيدفعوا، وطبعا العرب مش حايسيبوا الأرض إلي بيعتبروها بتاعتهم! طب بص الموضوع: البابا يرفض إنهاء أزمة «ملوي» بـ«جلسة صلح».. والمطرانية تعلن ٦ مطالب لـ«التهدئة». هيا حقيقي عدم كياسه في حل الموضوع والا هي فرصه لمكسب أكبر؟ "هذا الحادث يمثل «إساءة» للمسلمين والمسيحيين معًا، لأنه يوضح - حسب قوله - عدم وجود أمن في المنطقة" .. إيه دخل الدين هنا؟ يمثل إساءه للدوله ماشي، يمثل إساءه للأمن ماشي، إنما إيه دخل الأديان هنا؟
- علي الناحيه التانيه مش ممكن ننكر إن في مسلمين بيكرهوا المسيحيين؟ لييييية؟ علشان لقوا حد يزيفلهم الحقائق ويديهم البنزين في إيدهم؟ تلاقي شيخ علي فضائيه طالع يلطش في المسيحيين، وإنهم عايزين يعملوا وإنهم بيقولوا وإن إنجيلهم بيقول وإن في الكنيسه مش عارف إيه ..... يا سيدنا الشيخ، هوا كل إلي في الإنجيل دا مكانش علي أيام رسولنا عليه الصلاة والسلام وعلي أيام الصحابه وعلي أيام الخلافه؟ مفيش حد فيهم لمس المسيحيين أو حرض ضدهم ليه؟ هما في 1400 سنه كانوا مستخبيين وطلعوا دلوقتي؟ وإنت مالك يقولوا إلي يقولوه إنشالله يقفوا عريانيين في الكنيسه، وإنت مالك!!! ما كانوا علي أيام قوة الدوله الإسلاميه عايشين عادي ولا حد دخل في عقيدتهم السماويه!! أوم ييجي إبنك إنت يبيعلي البتاعه ديه ويقولي دي طرمبة ميه؟ (علي راي علام الملواني في مسرحية مدرسة المشاغبين).
- تلاقي الصحف ووكالات الأنباء ميصدقوا يلاقوا خبر .... "عصابه تقتحم محل صايغ مسيحي وتقتل ..." .... بذمة أهاليكوا مفيش ولا صايغ مسلم إتقتل وإتسرق محله؟ "الفلاحين يقتحمون الدير ويختطفون 3 رهبان ويرغموهم علي نطق الشهاده والبصق علي الصليب" ...... والنعمه الشريفه؟؟ بس برضه لازم يبرزوا تصريحات الجهات الأمنيه "الموضوع ليس له بعد طائفي" ... رموا السم وغطوه بالعسل.
- قصص وحكايات للصبح. إلي يقولك المسيحيين بيستدعوا أمريكا علشان تتدخل، وإلي يقولك المسيحيين عايزين يعملوا دوله ليهم في مصر، وإلي يقولك الأنبا شنوده عايز قانون خاص للمسيحيين، وإلي يقولك الأديره والكنايس مليانه سلاح ..... كل دا والمسيحيين مش بينفوا أو يأكدوا أو بمعني أصح باسطهم الوضع شويه علشان لقوا نفسهم بيكسبوا مكاسب من نظام مرتعش. بصراحه المسلمين بدأو يصدقوا الكلام دا، وإلي هوا مش في صالح المسيحيين، وكلنا حنخسر كتييييييير أوي، حنخسر مصر. أمريكا أو غيرها لو جم (ودا مستبعد أوي لأنهم مبيتحركوش غير علشان مصلحتهم) مش حيفرق معاهم مسلم أو مسيحي، حيقتلوا الأول وبعدين يشوفوا البطاقه.... مش حيفرق معاهم بيت مين دا لما حيضربوا الصاروخ. والمسيحيين لو حيفكروا يعملوا دوله مسيحيه حيخسروا بلدهم ... تقدروا تستغنوا عن أنهي حته في مصر؟؟ بحري والا قبلي؟ قناه والا بحر أحمر؟ النوبه والأقصر، والا الإسكندريه؟ مش كلها تارخنا مع بعض؟ فين الحته إلي في مصر مافيهاش تاريخنا؟ تاريخ مصر. وبعدين من إمتي القانون المصري فرض حاجه علي المسيحيين، ما إلي عايز يتجوز بيتجوز في الكنيسه، والمواريث بمعرفتهم، ومفيش طلاق ليهم حاضر مفيش..... وغيره!! أما عن الأديره والكنايس إلي فيها سلاح .... يعني بنادق ومسدسات؟ وبعدين، ما ممكن المسلمين يكون عندهم أكتر وأقوي! حنحارب بعض؟
يبقي الحل إيه؟
- لازم الأنبا شنوده يدرس الموقف كويس أوي، ويحسب كل الحسابات كويس أوي، ,انا بجد عارف أد إيه هوا حاش بلاوي كتيره أوي كانت ممكن تحصل .... بقول لازم الأنبا شنوده بعد ما يدرس الموقف كويس، يعمل مناظره تليفزيونيه مع مسئول كبير .... وليكن وزير الداخليه أو أي حد .... يا عم وزير إنت، مش حصل في اليوم الفلاني جه مش عارف مين عمل مش عارف إيه؟ دي فتنه طائفيه والا لأ؟؟ مش حصل في اليوم الفلاني إن في مسلمين هاجموا الكنيسه الفلانيه؟؟ ...... يقوم يرد الوزير.... وهوا مش عارف مين دا عمل كده مش علشان الشيء الفلاني؟؟ يبقي فين الفتنه بقي؟؟ والمسلمين مش هاجموا الكنيسه علشان أبونا مش عارف مين قال إيه في السر؟ ...... طبعا أنا ببسط الأمور، مش حيتكلموا كده ومش علي أحداث فارغه. يجوا في الأخر يعرفوا، في فتنه طائفيه والا لأ. ..... طب الحل إيه يا أبونا شنوده .... أبونا يعلن حرمانيه القنوات الفضائيه المشبوهه، وعدم موافقته عليها علنيا. ويعلن إستعداده لتفتيش الأديره والكنائس في أي وقت كان، ويعلن أن من لا يلتزم بشروط الأخوه والصداقه هو خارج عن الكنيسه، .....إلخ .... والوزير يعلن نفس الشيء، إغلاق القنوات الفضائيه إلي بتثبت عليها التحريض، إيقاف الدعاة إلي بيثبت عليهم التحريض........
- لما تحصل أحداث، لازم يتجاب كل الأطراف علانيه ويتكلموا، إنت عملت كذا وإنت عملت كذا ويتعاقبوا.... أسلوب التخبيه والتعتيم مبيجبش غير القيل والقال وبيسمح لغيرنا يضربنا وإحنا مش عارفين صح والا غلط. الرهبان إلي قالوا إتخطفوا يتجابوا علي الهوا مع إلي قالوا خطفوهم، وكل واحد يقول إلي حصل قدام بعض، والكذاب حيبان، والغلطان يتعاقب. إنما نخبيهم في مستشفي ونفرض عليهم طوق أمني يبقي سبنا كل واحد يقول إلي عايز يقوله والشعب مسلمين ومسيحيين ميعرفوش الحقيقه غير من الجرايد أو قنوات التطرف.
- أي صحفي أو كاتب او شاعر أو غيره يهاجم طرف من الأطراف يتعاقب فورا وبعنف، إشمعني لما قالوا عن صحة رئيس الجمهوريه إتطسوا حكم فورا من أول جلسه، ولما يشتموا دين غيرهم نطبطب عليهم ونداري ونخبي؟ سواء من دول والا من دول؟
- كل دا و 90% من الشعب مش حاسس بيه، وعلاقته مع جاره وصاحبه المسيحي والمسلم زي ما هيا مش فارق معاهم كل دا، وهي دي نقطة القوه الأساسيه في الموضوع.
الكلام إلي فات دا كله عشوائي، مجرد إحساس نفسي أقوله، وكل واحد يقول الحل إلي عنده.... مش حتفرق كتير لأن محدش حيعمل إلي حنقوله، بس أهو بنقول. وعلشان خاطري، محدش يقولي أنا صحابي طول عمرهم مسيحيين والكلام دا، أصل مش هوا دا الموضوع إن صحابنا وجيرانا بنحبهم وخايفين عليهم وعلاقتنا كويسه، الموضوع هو ضرب الفتنه وإلي بيبعتهالنا وإلي عايزينها، علانيه وبصراحه. لكن نظام أرمي كلمه وأجري، والا أعمل عمله وأستخبي، أو أكذب كذبه وأصرخ وألم الناس ..... مش حينفع وحينقلب علي الكل.
