قلبي وجعني، منكم للة

أقسم باللة اني كتبت البلوج اللي فات لما شوفت صورة أبو تريكة علي النت من بلوج قديم، واقسم باللة إن اللي حصل وحاحكية دلوقتي حصل بعد ما كتبت الكلمتين اللي كانوا محشورين في زوري واللي كل المصريين بيقولوهم معايا.

بعد مخلصت البوست اللي فات زرت بوست شخصية محترمة جدا أكن لة كل إحترام، السيد/ أحمد (حكاوي أخر الليل)، لازم أشوفة كل يوم قال اية في مدونتة، وعلي الجنب الشمال هناك في أخر ما زارة من بوستات. قريت اسم بوست هناك: أغيثوا غزة .... أرجوكم لا تنسوها، والتهمة مصرية .

واللة واللة الدم غلي في عروقي، انتوا تاني، مش عايزين ترحمونا؟؟ لجنة الأغاثة باتحاد الأطباء العرب، وحسابات بنوك للتبرعات، وفتاوي شرعية لدفع الزكاة لفلسطين..... لأ واية، القاعدة الشرعية: اذا جاع المسلمين فلا مال لأحد ....... واو لأ بجد دا في شريعة مين دي؟؟ والا دي تبع الكفار المسلمين؟؟؟

المهم رديت رد عادي خالص: يا شيخة ارحمونا، اغيثوا مصر الأول من الأحتلال وبعدين دوروا علي غزة ونيلة

ردت هيا: مبحبش نظام الندب والنواح دة، لا اجد تعارض بين الاثنين، و تعلم ان تعبر عن وجهة نظرك بطريقة أكثر تحضرا يا عزيزى

أنا رديت (بما معناه، لأن الكومنت بتاعي اتلغي كعادة المتأسلمين في بلوجاتهم): ان النواح دا في اللي طالعين نازلين: اغيثونا في غزة، الحقوا أهل غزة، حرام عليكو غزة!!! وان في تعارض بين غزة وانقاذ مصر، لأن لو بنجري ننقذ الغريب واحنا بنغرق دي هيا العمالة بعينها. وحاضر حتعلم أرد ازاي لما حضرتك تتعلمي تقولي ردك انتي مش الرد اللي متمليلك.

وبعدين رد عليا واحد أعد يتفزلك ويتحذلق وأي هجص.

عايز أسأل: هما المصريين خلاص بقو أغنيا وحلينا مصايبنا والفقراء اختفوا يا بتوع القواعد الشرعية؟؟ محدش فتح حساب يفتح بية افران عيش بدعم في مصر لية؟؟ محدش افتكر يعالج الناس اللي بتموت كل يوم لية؟؟ محدش فكر يرحم المصريين من أزمة الواصلات لية، بلاش الرجالة، الستات اللي كل يوم بتتزنق وتتبهدل كرامتها في الأتوبيسات؟ محدش فكر في اللي عايشين في عشش الصفيح لية يرحمهم؟؟ في رب العيلة اللي قرب يشتغل ورا الرقاصات والا بيبيع هدومة علشان يأكل والا يلبس ست انشاللة صاحب الفرن ياخدو يظبطوا في المخزن؟؟

لو شوفنا حساب لفقراء المصريين ومظاليم المصريين اللي واقعين تحت الأحتلال الفاسد، والضغط الكافر، والأفكار اللي وراها غرض، ساعتها حانفكر نبقي نساعد غزة والسودان والصومال ويا رب نساعد أمريكا كمان. انما ساعدوا غزة، ارحموا غزة، انقذوا غزة .... بنكلم ناس مطحونة، ناس ضايعة، ناس مخطوفة، وبنطلب منهم نساعد واحد تاني مخطوف وضايع.

بس احنا نقدر نساعد نفسنا لو عايزين زي ما قلت قبل كدة، ونقدر نفتح بدل الحساب عشرة، ونقدر بالتبرعات اللي بتجيلنا من برة بالملايين (واخدين بالكم)، نقدر بالتبرعات دي نثبت حسن نيتنا، وحتلاقوا الناس كلها بتحب مصرن زي ما كنا بنحبها أوي زمان، سعاتها حنساعد الكل، بردو زي ما كنا بنساعدهم أوي زمان.

ابدأوا بنفسكم يا أخوة، متخلوش حد يركبكم ويدلدل رجلية ويمليكوا اللي عايز يقولوا، متخلوش حد يمشيكوا في السكة اللي هوا عايزها، متنتخبوش غير اللي شوفتوا انو عمل بجد مش ببرامج انتخابية، متخلوش حد يضحك عليكوا باسم الدين، الدين دا مش بتاع حد، والرسول علية الصلاة والسلام مش بتاع حد، والأجتهاد في الدين مش من اختصاص حد معين. كل واحد عندة عقل ممكن يقرا أكتر، يعرف أكتر، يميز بين الكلام اللي بجد والكلام اللي وراة حد.

يا رب حد يفهم من اخوانا.

تعاطفا مع مصر

معلش، دا موضوع قديم أوي، ودول كلمتين نفسي أقولهم وأخلص ذمتي، استحملوني.

أبو تريكة في كاس الأمم الأفريقية رفع شعار "تعاطفا مع غزة"، في رأيي انه ركب الموجة وشرخ، عبر عن رأية وعن رأي اللي وراه، وعن رأي اللي قدامة، وعن رأي الأمة العربية، وعن رأي الأمة المهلبية والكسكسية. انما محدش رفع شعار "تعاطفا مع مصر"؟؟ كله عايز ينهش وييمضغ براحته وبعدين لا مؤاخذة في الكلمة يتكرع ويكمل نهش!! محدش فكر في الراجل اللي لبس ست ووقف في طابور الستات بتاع العيش علشان خمس ترغفة عيش؟؟ محدش مصدق إن في مصريين قربوا يفلئسوا لصاحب الفرن علشان يديهم عيش ياكلوا هما وعيلتهم؟؟ ورجالة عندهم استعداد يعملوا (أسف في اللفظ) نسوان علشان خمس ترغفة!! وبعدين "تعاطفا مع غزة"!! وبعدين بيصرخوا عايزين الناس تنتخبهم؟؟ واللي بيقولك جماعة الأغلبية!! أضحك والا ألطم والا أعمل اية؟؟ أغلبية ايه يا سيادنا، دا الرجالة لا مؤاخذة بقوا... والا بلاش. في لفظ واقف في زوري نفسي أقولة بس مينفعش هنا.

يا حزب الواطيين المتعاليين، يا جماعة الفسق المتأسلمين، يا حركات الجبن والسبهللة ولاد الكفاية والمصالح، يا أحزاب الكلام والتناطح الداخلي، يا دعاة الفضائيات والمؤتمرات، يا كل قادر في مصر، يا رب أدعوك بكل أسماءك الحسني، يا قوي يا رزاق يا باسط يا عفو يا رازق يا باسط يا فتاح يا عليم...... تعاطفا مع مصر. مصر لأن الشعب في إحتلال أشرس من الإحتلال الأسرائيلي، في هجمة أخطر من هجمة الصليبيين والتتار، الناس ولعت نار وعدمت الحيلة.

تعاطفا مع مصر يا أبو تريكة المره دي وحياة النبي علية الصلاة والسلام.