عمو حجاب مش عايز يمشي

وانا بشوف موقع العربية.نت من كام يوم كدة، وإذ بي أفاجاء بـ "اليوم العالمي لنزع الحجاب" ..... عملوها الرجالة ولاد الـ ..... بقة كدة محدش يقولي أروح أتفرج علي اليوم دة؟؟ وخصوصا إنهم استعانوا بصورة امرأة تخلع نقابها وجزء كبير من ملابسها زي ما جية في الخبر. لأ اخص عليهم بجد!! بقي يا ناس واحدة حتخلع هدومها وحتكون مزة ومحدش يقولي؟؟

أوم إييية، علي رأي العمدة سليمان غانم في ليالي الحلمية، مكدبتش خبر وقمت عامل بحث علي اللهم إجعلة خير ياهو! لقيت حرب شعواء يقودها الناس الجدعان اللي عايزين الستات تقلع علشان الرجالة اللي زيي كدة ينبسطوا، وبين الأسلاميين المتحجرين اللي لسة عايشين في القرون الماضية اللي بيشوفوا شعر الست ولا مؤاخذة فخادها وكمان لا مؤاخذة اللي مش قادر أقول اسمة.... بيشوفوا دا عورة ... لأ واية بيثير في الرجالة الغرائز. أخص عليكوا يا رجالة يا مسلمين يا وحشين، أنت لسة غرايزكم بتثار لما بتشوفوا وراك المزز؟؟؟ لأ بجد إخص، هو انتوا معندكمش كافور في بلادكم المتخلفة دي؟

وبعدين مين قال إن الحجاب فريضة والكلام الفارغ دا، ما الرسول علية الصلاة والسلام أمرنا بأننا نبص علي النسوان الي رايحة واللي جاية، وكان مرة حيقيم الحد علي واحد من الصحابة لما غض البصر!! مبتعرفوش تقروا الدين كويس وحتفضحونا.

أوم ايية، طلعلك واحد من الناس الأحرار اللي حيحررونا (من الحر) اسمة عماد حبيب (غالبا حبيب أمة العريانة)، وقعد يحللك إن الفكرة انطلقت بدون أي تنسيق مسبق، يعني حصل توارد خواطر لتحرير المرأة من لباسها (هدومها يعني، مش اللي في بالكم)، وقالك علي موقع إسلام أونلاين وموقع القرضاوي انهم ممولين بملايين الدولارات (مع اني ممكن أعمل موقع ببلاش اقول فية اللي أنا عايزة)، وبعدين بقي دخل في الصميم، حرية المعتقد وحرية التعبير، مع انة هوا نفسة أول واحد بيحارب حرية المعتقد في لبس الحجاب. بس مفهمتش فين البطولة لما بورقيبة خلع الحجاب عن واحدة بإيدة الشريفة الطاهرة، ما ياما رجالة قلعت ستات هدومها كلها!!! ما علينا.

موقع تاني بيقول أنة "أقباط" ويبقولك ان الأقباط بتمتد جذورهم للفراعنة، يعني المسلمين ماكانوش أقباط أسلموا، وكلنا جينا من مكة حدف علي مصر، بس دا مش موضوعنا هنا، الموقع دا كمان ضد الحجاب.

موقع تاني بتاع عمو أو خالتو زيزو من جربا (مش فاهم اية جربا دي)، حاطط الأعلان كامل عن اليوم العظيم دا في تاريخ البشرية.

واحد أخير (علشان زهقت).. بس في دا أنا هلكت علي نفسي من الضحك، "اليوم العالمي لنزع الحجاب"، ومش حعلق علية دلوقت.

وتبعا لحرية الرأي وحرية التعبير السائدة هذة الأيام، وبما إن حرية الرأي والتعبير الأيام دي مبتكونش غير علي المسلمين والدين الأسلامي، فأنا عايز اقول رأيي بصراحة في الدين الوحش دا:

1- الحجاب مش فرض ولا سنة، فحيث أاثبت المدونون الأفاضل كرم اللة وجههم أن الحجاب بدأ فعليا في العالم الأسلامي مع الثورة الأسلامية الإيرانية، وكذلك الثورة النفطية في السعودية التي ساعدتها علي نشر مباديء الوهابية، ومن هنا انتشرت افكارهم والرجالة في العالم الأسلامي حجبوا الستات عن طريق حبسهم في اوض ضلمة علشان الثورة الأسلامية والحركة الوهابية تدخل مخهم صح. وأستنتجت من دا كمان إن صورة جدتي المحجبة - قبل متظهر ايران الأسلامية والسعودية كدولة - مش صورة جدتي، دي كانت صورة جدي بيحاول يخوف العصافير في الغيط. هما اغلب الظن علشان متخلفين عقليا زي أنكل ساويرس، مش عارفين يفرقوا بين موضوع الحجاب وموضوع النقاب.

2- مسمعتش امي يوم وأبويا مش موجود في البيت بتقول إنوا راجل ظالم وحيروح النار علشان أجبرها تلبس الحجاب.

3- كام واحدة مسلمة عندها أي اعتراض انها تلبس الحجاب؟؟

4- بلاش، دول ناس مش مسلمين، أنا عايش في أوربا ومتجوز واحدة مسيحية، البلد إلي انا عايش فيها صغيرة، جنبها قري كتير.... بجد بجد مشفتش واحدة فوق الأربعين خارجة من بيتها مش لابسة إيشارب علي شعرها!! هوا مش حجاب، بس دي حشمة. الولية حماتي لابس الإيشارب علي طول... معتقدش إن الحركة الوهابية وصلت هناك كمان، دي تبقي السعودية دي جامدة اوي!! نص عادتهم قريبة اوي من المسلمين، وبقعد أتريق عليهم، هوا في واحدة ممكن ترجع البيت بليل مثلا، يا فضيحة الدنيا كلها تسمع عنها. سيبكم من اللي عايشين في المدن، دول ناس القطر داسهم من زمان، عايزين تعرفوا الدول دي يبقي مفيش غير الريف. معلش دا موضوع تاني قلت اقولوا.

5- لفت نظري إن كل الراهبات محجبات، يمكن منقبات كمان، هوا محدش هاجمهم لية وهاجم الديانة المسيحية اللي بتجبر الراهبات يتحجبوا وأكتر كمان؟؟

6- وبعدين لما الست تقلع الحجاب، فين حرية التعبير؟؟؟ بتعبر عن إية؟؟

7- نيجي بقي لتوتو اللي ضحكتني موت، عايزة تعود لملكوت البراءة لأ وإية "الحكمة"...... اللة عليكي يا شيخة، كنتي فين من زمان. عايزة تقترب من الجسد علشان هو الأناء في سبيل الفناء.... البت دي عايزة تتجوز، الحقوها قبل ما تعملها علي روحها!!!! براءة اية يا طنط، هيا الست لما تقلع الرجالة تتفرج عليها بقي في مجال للبراءه، هوا حضرتك لا مؤاخذة مشوفتيش فيلم سكس قبل كدة؟؟؟ أحلي حتة في افلام السكس حسب الأحصائيات لما الست بتقلع هدومها حتة حتة، نفس اللي عايزين تعملوة علشان تحولوا الست عبدة لشبق الرجالة، هما الرجلة الغربيين اللي ستاتهم مش محجبات مبيبصوش ولا ما بيتملوش في المحاسن، امال هما بيعملوا أفلام سكس عندهم لية؟؟ المرأة بتمثل اية في الفيلم دا؟؟ واحدة عندها حرية رأي وعايز تعبر عنة ومش لاقية غير فيلم سكس؟؟ دي المراءة المهانة اللي بيتدغعلها فلوس علشان تهين نفسها أكتر؟؟ إيش جاب دا للعقول الأسلامية المتحجرة اللي مببتفكرش غير تصون الست وشرفها؟؟

بيقي عدة تساؤلات جادة (من غير هزار):

1- بلاش حجاب بفريضة، وبلا ش دين إسلامي من أصلة، بس مش علي الأقل مش في أصول وعادات لازم تتبع ولازم نحترم حرية الرأي فيها؟؟

2- لية كل حاجة لما نقول إسلامية بتبقي رجعية وضد حرية التعبير؟؟ هوا حد اشتكي من الحجاب مثلا؟

3- اية علاقة الحضري وزوجتة بالقصة؟؟ واحدة شافت انها مش عايزة تتحجب في سويسرا، هوا حد أعدمها لما رجعت مصر؟؟

4- لية محدش بيهاجم الديانات التانية بنفس الهمة اللي بتتهاجم بيها معتقدات المسلمين؟؟ مع إن سهل أوي تتهاجم الديانات التانية، هما نفسهم مش مقتنعين بحاجات كتير فيها وعارفين ان رجال الدين لعبت دور كبير في الأراء الموجودة.

حد ممكن ينورني؟؟