نداء عاجل لشعب مصر

الصديقه العزيزه Cat of desert كتبت بعض الأحداث إلي حصلتلها النهارده في المواصلات : صباحو خناقات ... بركاتك يا علاوووة، وإلي شد إنتباهي واحد كان بيكلم نفسه وبيفكر يخرج عياله الكبار من المدارس وكفايه عليهم الإعداديه. ونظرا لإحساسي بما سيحدث في الأيام المقبله، أوجه هذا النداء الهام لكل الشعب المصري:

- أرجوكم متخرجوش عيالكم من المدارس .... أكرر، متخرجوش عيالكم من المدارس.

- أرجوكم إلي بيفكر فيكم يبيع عيل من عياله أو يبيع عياله كلها يستني شويه.

- سكان المناطق العشوائيه، متعلنوش المناطق دي مستعمرات عراه.... برده إستنوا شويه ومتبيعوش هدومكم دلوقتي، علي الأقل مش كلها.

- أصحاب السيارات ماركة سيات 900 سي سي 30 حمار، و الـ 128 الـ 1100 سي سي 40 حمار موديلات سنه 1975 وحتي موديل 1980، ماتبيعوش عربياتكم..... إوعوا تبيعوها.

- محدش يتهور ولا سمح الله يقتل عياله ومراته (ممكن مراته لو مغلباه).

وحيثيات هذا النداء:

1- الحكومه أعلنت مرارا وتكرارا إن "حزمة" القرارات الأخيره لن تمس محدودي الدخل ...... أولا يعني إيه حزمه؟؟ هما بيعاملونا إننا بهايم وبيرمولنا حزم (جمع حزمه) برسيم؟؟ ما علينا. وبما إن مافيش حد في الشعب المصري إسمه "محدود الدخل" فمحدش حيتأثر. ماتخافوش.

2- الحكومه حاسه بيكم وحتوصل الدعم للفقرا واحد واحد.... نفر نفر... مش مهم إرتفاع أسعار كل حاجه، إنتوا أساسا مكنتوش لاقيين تاكلوا ولا تلبسوا من الأول فبلاش حجة إرتفاع الأسعار المره دي وتخرجوا ولادكم من المدارس.

3- أهو.... السيد/أحمد عز رئيس لجنة الخطة والموازنة بمجلس الشعب، أعلنها صريحه أهو عن إرتفاع الأسعار الذي قد يصاحبه ارتفاع في معظم السلع في السوق المصرية: "هذا كلام يتردد في (الفلكلور) الاقتصادي المصري، بينما تري الدولة أن الفئة المستهدفة لديها القدرة علي دفع الزيادة في البنزين لصالح الفئة التي لا تمتلك مثل موظفي الدرجة السادسة بالحكومة، وهي الفئة التي بدأت تنكمش في القطاع الحكومي" ..... معني كلامه لو شفته أي سلعه إرتفع سعرها متصدقوش، دا خيال وسراب، إستعيذوا بالله كدة من الشيطان الرجيم وإشتروا حتلاقوا نفسكم محاسبين علي السعر القديم ... يمكن كمان سعر من سنتين فاتوا. وكمان معني كلامه إن أي صاحب كشك أو عمال التراحيل أو العاطلين بقوا رسميا من موظفي الدرجه السادسه في الحكومه.... ألف ألف مبروك يا جماعه.

4- وتعقيبا لكلام السيد/ أحمد عز، أصحاب السيارات الفارهه الحديثه (من الذين لم ترد مواصفات سياراتهم في النداء) ماركات 128 1100 سي سي موديلات من 1981 وحتي 1990 دول من الفئات القادره، فمعلش يا جماعه نستحمل بعض شويه وندفع الزياده في البنزين علشان العربيات القديمه، وعلشان الحكومه تعرف تروح تدي الناس الغلابه الدعم في..... إحم ... قصدي إيدها.

5- مش عارف حيثيات تانيه إيه ممكن تتقال، الصراحه ..... البقيه في حياتكم.

ملحوظه:

رشيد محمد رشيد شكله كده بيرسم علي رئاسة الوزراء .... إحساس داخلي كده عندي إن في تفكك في الوزراه، وفي معارضات داخليه كبيره داخل الحزب الوطني، ويمكن كمان داخل بيت الريس .... إلاهي يفككهم كلهم قادر يا كريم.

تفتكروا الرئيس موافق والا معارض لرفع الأسعار؟؟ في قوي عايزه تكرهنا فيه أكتر من كده وتسقطوا بثوره؟

طب شوفتوا الخبر دا: "مواطنون ضد الغلاء" تناشد الرئيس مبارك التراجع عن قراره بزيادة الرواتب بعد إقرار الحكومة زيادات جديدة في الأسعار ........ مش قولتلكوا حنبوس رجله علشان ميزودش المرتبات!

لو كان الموضوع إنهم بيلموا موارد علشان زيادة المرتبات كنا قولنا حمير وبيتصرفوا غلط، إنما يلموا موارد أكتر من اللازم من جيوبنا، ويعلوا الأسعار قبل ما توصل العلاوه جيوب الغلابه، ويعلوا سعر حديد التسليح كمان .... واخدين بالكم: حديد التسليح .... يبقي الموضوع فيه "إن" وميتسكتش عليه لأن الحكومه والعصابه إلي وراها كده بتتحدي الشعب.