ربنا يخلي دادي وإبن دادي

في عام 2914 وفي دوله بعيده ما زالت تعيش العصر السحيق، وفي إحتفالات الدوله بمناسبه عيد الشعب المبارك، وقبل إلقاء رئيس الدوله لخطابه السنوي إحتفالا بالمناسبه دي، دار الحوار التالي:

الرئيس: يا رئيس الوزراء أنا العلاوة كاتبها في الخطاب حسب ما إتفقنا 20%، متأكد حتعرف تجيب الموارد لتغطيتها؟

رئيس الوزراء: ماتقلقش يا فندم كله تمام.

الرئيس: أصل أنا بصراحه صعبان عليا الشعب دا علشان غلابه، ومانمتش إمبارح بالليل.

رئيس الوزراء (وقد ظهرت عليه علامات التأثر): بعد الشر عليك يا فندم، ما ينحرق الشعب كله المهم صحتك.

الرئيس: ما ينفعش يا رئيس الوزراء، إنت عارف مسئوليتي التاريخيه. أنا بجد قلقان من الإضرابات إلي بتحصل وخايف الشعب يوزه عقله ويعمل ثوره.

رئيس الوزراء: معاك حق يا فندم، الشعب كفايه عليه ضغط كده، ممكن ينفجر.

الرئيس: إنت معاهم معاهم عليهم عليهم والا إيه؟

رئيس الوزراء: لا يا فندم، إنت بس تأمر وإحنا ننفذ.

الرئيس (بصوت واطي لنفسه): جتك نيله، أهو دا بس إلي إنت شاطر فيه، أمرك يا فندم، عمرك ما عملت حاجه من نفسك.

الرئيس: عارف أنا فكرت في إيه؟ إننا نخلي العلاوه 50%؟

رئيس الوزراء (وقد ظهر الرعب في عينة): يا نهار إسود!!! قصدي يعني، إزاي بس يا فندم، منين؟

الرئيس: إنت مش عندك 20% جاهزين؟

رئيس الوزراء: جاهزين يا فندم.

الرئيس: بسيطه، نسحب الكام عربيه مرسيدس المخصصين ليك وللوزراء، ونخفض بدلاتكم شويه صغيره، ونخفف الـ 600 عربيه حراسه المخصصين للوزراء، ونبيع الكام شاليه في "مرمرنا" "والودن السخسة" المخصصين إستراحات ليكم، ونفتش سر عمولات المصنع بتاع "دمطين" إلي عاملاه الشركه إلي من البلد إلي إسمها "كنكه" ونصادر العمولات لصالح الخزانه..... وحاجات كده يعني صغيره علي الماشي.... حنلم الـ 50% وأكتر كمان.

رئيس الوزراء (بغيظ في سره): يا إبن الـــ ... لا وإنت الصادق ما تبيع قصرك في "شرخ شرمب" حتسدد ديون البلد كلها ويفيض!!

رئيس الوزراء: يا فندم ما إنت عارف إن الوزراء ناس كبار في السن وعندهم أمراض ومينفعش يركبوا غير مرسيدس، وبعدين الحراسه دي مش وجاهه ومش بنحب نوقف الناس ساعتين وتلاته ولا حاجه، إنت عارف الأخطار الأمنيه إلي بتواجهها البلد اليومين دول، والكام إستراحه في "مرمرنا" علشان الوزراء يريحوا أعصابهم من ضغط الشغل..... لا يا فندم كتير اوي، حاخد علي خاطري كده.

الرئيس (في سره): يا إبن الــ .... بقي كبار السن ولازم تركبوا مرسيدس، وكبار السن بتوع الشعب يتسحلوا أتوبيسات... طب هاتولهم أتوبيسات مرسيدس مثلا.

الرئيس: أنا مقتنع بفكرتي جدا.

رئيس الوزراء: طيب نبيع عربيات الوزراء بس وخلي عربيتي، وبلاش نبيع الإستراحات.... وخليها 25%.

الرئيس: أف عليك بجد..... حنجيب وزير الماليه. (يشاور الرئيس لوزير الماليه فيأتي للمنصه)

الرئيس يشرح لوزير الماله فكرته. ولأن وزير الماليه راجل واعر ومدقدق مش أبيض وورور زي رئيس الوزراء.....

وزير الماليه: والله عندك حق يا فندم، الكلام دا حلو وجميل، مرسيدس إيه وحراسات إيه وإستراحات فارغه... ما كل وزير عنده بدل المرسيدس إتنين، وبدل الفيلا تلاته.

الرئيس: قله، أصله معارضني. (وراح ضاحك وبص لرئيس الوزراء بيغيظه)

وزير الماليه بص لرئيس الوزراء وغمزله بعينه من غير ما الرئيس ياخد باله.

وزير الماليه: خلاص يا فندم، إلي تشوفه، أنا بكره حنزل قرار بيع كل المرسيدس والإستراحات للوزراء وخلافهم من رؤساء مجالس الإدارات.... وعلشان شايف حماسة سيادتك للموضوع ومقدرها، حابتدي بالحراسه والعربيات المرسيدس المخصصه لأولاد سيادتك، وبعدين بالإستراحات إلي بينزلوا فيها.... وبعدين نشوف كل وزير وكل وزاره.

الرئيس: يا إبن الكــــ .... قصدي فكره روعه.... هيا دي الروح العاليه في الشغل.

وزير الماليه: أي اوامر تانيه سيادتك.

الرئيس (بيفكر بعمق): بس مش عارف برضه... حرام الوزراء دول ولاد ناس وحيتبهدلوا برضه.... الشعب اهو واخد علي البهدله مش مهم يتبهدل كمان، إنما الوزراء ذنبهم إيه؟؟

وزير الماليه: انا عندي حل.

الرئيس: قول.

وزير الماليه: خليها 30% ونزود الضرايب علي الناس الأغنياء شويه، ونرفع عنهم الدعم.

الرئيس: ممممممم طيب ضرايب إيه تاني، ماحنا عندنا ضرايب علي التنفس حتي.

وزير الماليه: لسه، ضريبة العقارات، ولسة ضريبه علي السيارات الفارهه زي الـ 128 والسيات، ما هو مش معقول مواطن عنده عربيه فارهه زي الـ 128 موديل 1975 مثلا واخوه المواطن بيتشعبط في الأوتوبيس.

الرئيس: مممممم فكره برضه. إيه تاني؟

وزير الماليه: نرفع الدعم عن البنزين والسولار خالص.... المفروض إننا إقتصاد حر والسعر بيحدده العرض والطلب.

الرئيس: طيب والدعم علي الغاز إلي بنديه للمصانع وبعدين يبيعوا باسعار عاليه؟ والغاز إلي بنبيعه للبلد المستعمره إلي جنبنا بسعر التراب؟

وزير الماليه: ما نقدرش نعمل حاجة، إحنا إرتبطنا معاهم بعقود لمدة 20 سنه، ممكن نشوفلها حل برضه بس بعدين مش دلوقتي، وخلي بالك يا فندم برضه مين هما إلي في الصفقه (يهز راسه ويغمز بعنيه) فشويه شويه علي الموضوع.

الرئيس (بنرفزه): غيره.

وزير الماليه: علي السنه الماليه الجديده، أهو نطبع شوية بنكنوت نفرح بيهم العيال.

الرئيس: غيره.

وزير الماليه: نعلي اسعار الخدمات الحكوميه في صورة دمغات، ونضيف شوية فكة .... طوابع معونة شتا علي طوابع شرطه علي نزود أسعار النماذج .... فكه كده المواطنين مش حيحسوا بيها.

الرئيس: طيب وظبط أسعار السوق؟

رئيس الوزراء (لأول مره يتكلم من فتره): هوا إحنا مغسلين وضامنين جنه؟ ما كل منتج لازم يكون عنده الوطنيه الكافيه وميغليش الأسعار. يا فندم البلد دلوقتي بتمر بمرحله أمنيه خطيره متخفاش عليك، والوزراء مش فاضيين للكلام الفارغ بتاع السوق والعيش والأسعار دا.

الرئيس (وقد حل وقت إلقاء الخطاب): طيب مفيش وقت دلوقتي، يا رئيس الوزراء إعملي تقرير مفصل بالكلام دا (وفي سره جتك نيله علي المرحله الأمنيه بتاعتك). 30% ... ماشي؟

رئيس الوزراء ووزير الماليه: ماشي يا ريس.

الرئيس (في سره): جتكم الهم، أنا كان مالي ومال القرف دا، مانا كنت قاعد في قصر دادي كافي خيري شري. رئيس الوزراء لوزير الماليه هامسا: يا جدع دانتا أنقذتنا.... أبوسك منين. هوا دا الكلام، أكل ومرعي وقلت صنعه.

الرئيس يعلن عن الـ 30% علاوه وكأنه فتح عكا.... بس كان بيبص لوزير الماليه مش مطمن من كلامه، وبيقول يا تري حيودي البلد علي فين، وكان بيبص للي بيصقفوا ونفسه يقولهم جتكوا خيبه في هبلكم.

الحاضرين صقفوا بحراره ...... 30%، ربنا يخليك لينا يا رئيس الكل. (هوا يعني دفعها من جيبه)

رئيس الوزراء بيحسس علي سلسة مفاتيحه إلي فيها مفتاح شاليه "مرمرنا"..... والله ماهو فاكر، هوا جه هنا بالمرسيدس السودا والا الفيراني؟

الشيوخ أفتوا بعدم جواز الإضراب والخروج علي الحاكم بعد مظاهر الحب الجارفة إلي عبر عنها الشعب بعد الإعلان عن ال 30%.

قيادات الكنائس الأرثوذكيسه والإنجيليه يعلنوا عدم جدوي الإضراب بعد حل مشكلة العيش وزيادة الأجور 30%.

موظفين الحكومه رقصوا لغاية الصبح ......موظفين القطاع الخاص حطوا إيدهم علي قلبهم .... أصحاب المحلات والعامل الحر وأصحاب الاكشاك وأمثالهم من إلي مالهومش مرتب ثابت أغمي عليهم إنتظارا للمجهول .... سكان العشوائيات اعلنوها مستعمرات للعراه إستعدادا لبيع الهدوم.

سلملي علي قصر دادي.