شعب جاهل معندوش أي ثقافة

حلقة وائل الإبراشي مع والد وخال قتيل المحلة وفي حضور اللواء فؤاد علام إتكتب عنها كلام كتير في المدونات والتعليقات. مشوفتش الحلقة دي بس لقيتها علي النت كالمعتاد: جزء أول - جزء تاني - جزء تالت ..... وأهم جزء فيهم هوا التاني لأن كل التعليقات والنقد منصب علي تعليق سيادة اللواء حرب إليكترونية مدرعات كلاب بوليسية/محمد عبد الفتاح عمر وكيل لجنة الدفاع والأمن القومي بمجلس الشعب، إلي ربنا يكرمة ويباركلة فهمنا الحقيقة الواضحة بعد ما كنا متعاطفين مع الطالب إلي إنضرب بالنار في بلكونة بيتهم أثناء مظاهرات المحلة، وفهمنا منة جزاة اللة كل خير إن ذنب هذا الطالب الخسيس في رقبة متظاهرين المحلة الجبناء إلي كانوا بيجروا والأمن وراهم فاتح نار علي البحري فوق وتحت و "يصاب من يصاب ويقتل من يقتل" حسب كلامة، المهم أمن مصر إلي فوق راس الكل. وإعترض سيادتة كمان علي لفظ شهيد للقتيل الصعلوك ومش معقولة نسرف في اللفظ دا. لا فض فوهك يا سيادة اللواء.

أحلي الحاجات إلي قالها سيادة اللواء وعجبتني بصراحة إن قوات الأمن إنتقلت للمحلة مش علشان حوار يا شعب يا جهلة، لأ علشان في تخريب قد يؤدي إلي قلب نظام الحكم. وإن قوات الأمن بتطلق النار عشوائي للتحذير علشان إلي واقف في البلكونة يستخبي تحت السرير، وإلي لا مؤاخذة في الحمام يرفع البنطلون، وإلي قاعد كدة والا كدة مع مراتة يقطع الخلف. بس الشهادة للة، الراجل ضحي بإبنة لما إتسأل يعمل إية لو إبنه راح في ضرب نار عشوائي قال" يروح في ستين داهية، طالما معندوش ثقافة أين يقف وأين يبدي رأية واين يكون". أنا بموت في الثقافة، ويا ريت يبتدوا يعلموا الشعب الجاهل دا بقي شوية ثقافات جميلة زي دي كدة، أهو ياخدوا فينا ثواب برضة.

مش عايز حد يشعر بأي نبرة سخرية زي ما السيد/رئيس الوزراء شعر بيها خلال اللقاء الذي نظمته جامعة القاهرة لرئيس الوزراء بمناسبة مئويتها، خالص خالص، دا حتي السيد/ رئيس الوزراء علمنا بما إننا شعب جاهل وهمجي وغوغاء حاجات جميله أوي يا ريت نحفظها كلنا ونرددها وراه ميت مرة "إنت لازم تعرف أن فيه تهديدات بتتعرض لها البلد، ولازم تفرق بين التعبير عن الرأي والاستئذان، وهو شيء آخر". مش مهم يا شعب يا غجر تعرفوا إية إلي بيهددكم، المهم تعرفوا تتكلموا مع سيادكم إزاي. خلوا بالكم إنة أكد وشدد علي "أن رغيف العيش الذي لا يعجب الناس ويقفون من أجله في الطابور ليحصلوا عليه في النهاية، هناك من لا يجده أصلاً" شفتوا الحكم؟؟ واللة إنتوا ما تستاهلوا الرغيف أبو شلن يا كليبه، إنتوا أخركم تلعبوا في الغموس بصوابعكم علشان جهلة. غموس إية، هوا إنتوا لاقيين الغموس علشان تطلبوا عيش يا غجر؟؟ خلي بالكم من "هناك من لا يجده أصلا" دي....... بيتكلم عن شعب مصر الشقيق، فك اللة كربة... إحنا فين وشعب مصر الشقيق فين، داحنا نحمد ربنا ونبوس إيدنا وش وضهر إننا مش زيهم. إخص عليكم إخص، لأ بجد إخص.

في مقالة جميلة عن سيادة اللواء في صحيفة إسمها المصريون، بتتكلم عن بعض تاريخة ومعرفش الكلام دا صح والا غلط، اهو الواحد برضة ياخد ثقافة.

ملاحظاتي بقي عن الموضوع:

1- الشعب المصري دا أمرة غريب، فيها إية واحد عيل مات يعني؟ دول كلهم كانوا طلقتين والا تلاتة ومات، أمال لو قالك فرغوا فية خزنة رشاش كنتوا حتعملوا إية؟؟ مبتحمدوش ربنا أبدا، علشان كدة ربنا واخد منكم النعمة حتي العيش مش لاقينة. ومش عايزين تفهموا، المهم أمن مصر، أمن البني أدمين، أمن مصر، إية مبتفهموش؟؟؟ البني أدمييييييين إلي عايشين في مصر، هوا الواد إلي مات دا كان بني أدم عايش في مصر؟؟ دا حتة عيل عايش في المحلة!! مش عارف مش قادرين تفهموا أنهي حتة بالظبط، الواد والا القتيل والا الأمن والا مصر؟؟!! المهم محدش يقلب نظام الحكم يا كلاب، أمن مصر، في تهديدات بتتعرض ليها البلد (هوا سيادة اللواء قريب رئيس الوزرا والا حاجة؟) ... أقلهالكم 100 مرة؟؟

2- كل واحد ينضرب يموت عايزين تطلعوه شهيد، هيا عافية يعني والا عافية، هوا الحديث الشريف إلي بيحدد الشهداء قال "بلكونة"؟؟ يبقي مش شهيد. رسميا أهو سيادة اللواء (عايزين إية أكبر من كدة) بيقول مش شهيد، دا جايبها من الكنترول حتي وتاعب نفسة.

3- وبعدين خدوا هنا، مش تنهدوا بقي والا إية، عمالين تموتوا في كل حتة كدة وكاسفين الحكومة؟ خلاص بتموتوا علي روحكم مش قادرين تمسكوا نفسكوا!! يحطوكم في عبارات علشان تحجوا تموتوا، يحطوكم في قطارات تموتوا، يسكنوكم جنب مصانع أحدث تكنولوجيا للأسمنت والكيماويات تموتوا، يرشولكم الخضار والفاكهه علشان تكبر وتزهزه وتاكلوا وتربربوا تقوموا تتسرطنوا وتموتوا، يعملولكم معديات في النيل تغرقوها وتموتوا، يعملولكم طرق دائرية حديثة تركبوا عربياتكم وتعملوا حوادث وتموتوا.... إية، مش عارفين تعيشوا خلاص، زهقتوا من الدنيا؟ طب علي الأقل متكسفوش الحكومة أدام العالم يا غجر.

4- بعد كل الكلام دا جايين تتكلموا عن قتيل المحلة، لأ وعايزين تحاسبوا الحكومة وتحاسبوا المسؤول كمان!!! إتقوا ربنا بقي يا ظلمة، المسؤولين دول عندهم عيال عايزين يربوها. وإلي زاد وغطي الطالب قليل الأدب إلي في كلامة مع رئيس الوزراء نبرة سخريه. كمان شعب مش متربي؟

5- أحيي سيادة اللواء علي هذا الكلام الأسطوري ومن قبله السيد/رئيس مجلس الوزراء، وأطالب سيادة رئيس الجمهورية بتقليدهم أرفع أوسمة الذكاء، لأنة بصراحة سيادة اللواء جاب من الأخر ومقعدش يزوق كلامة علشان يرضي قلة منحرفة من الشعب المصري والسيد/ رئيس الوزراء أثبت انه ملوش دعوة بشعب مصر الشقيق. عفارم علي رئاسة الوزراء وعلي رئيس لجنة الدفاع والأمن القومي، ودايما مصر حتتقدم بينا..... لو ربنا أراد وفضلنا عايشين أكتر من كدة.