إظاهر فوضي المحلة لسة مخلصتش، الضرب لسة شغال، ومش فاهم مين بيضرب في مين. أمن مركزي بيضرب قنابل غاز، وشوية بيحدفوا طوب، وناس بترد عليهم بطوب. بس الظاهر إنوا مش بس العمال إلي في الموضوع، دا في ستات بجلاليب وعيال ببيجامات، الستات بتصوت والرجالة بتقول اللة وأكبر. وكل واحد يطلع علي قناة فضائية يقولي "عمالنا" منتظمين وملتزمين، امال مين إلي مش ملتزمين؟؟
المصيبة مش عارف مين بيهيج مين، الأمن عايز يقبض علي ناس والمواطنين بيدافعوا عنهم، والا في ناس لقوها لعبة حلوة ويالا نضرب.... أهي خيبة وخلاص من الكل...... أمن عندة عبط وبله ونازلين ضرب... وناس مش لاقية حاجة عدلة في حياتها، ففرصة يطلعوا غلهم. ما علينا.
المصيبة لتكون الحكومة حتضرب المربوط علشان يخاف السايب... حتمسح بالمحلة الأرض علشان تكون عبرة لمن لا يعتبر. كان ممكن الأمن تسيب الناس تعمل إضراب تعمل كوسة براحتهم حيروحوا في الأخر ومش حيحصل حاجة، إنما إلي مخلي الفار يلعب في عبي إن الموضوع كبر والضرب طال. يا تري مين بيخطط لمين؟
الكوميديا إن في دعوة إضراب عام في الضفة الغربية، ومحمود عباس بينذر وبيتوعد ... إظاهر إنوا والعياذ باللة مرض بينتشر، يا تري يا عباس عندك أمن مركزي والا نبعتلك شوية؟؟
هناك ١٥ تعليقًا:
أستاذي العزيز
والله العظيم أنا مستني البوست بتاعك من يوم ما سمعت عن الاضراب
كان نفسي أعرف رأيك وموقفك ووجهة نظرك
بس خير
خلينا نتفق الاول علي أن كل حاجه نسبيه يعني النجاح نسبي والفشل كمان نسبي
مفيش نجاح مطلق
أنا امبارح رحت التحرير علشان نعمل مظاهره
أمبارح كان الاحد أول الاسبوع
كان بيبقي يوم فظيع زحمه وندرة مواصلات والبلد بتبقي مقفوله من العربيات اللي في الشوارع
بس الله ما شاء الله أمبارح كنت حاسس أن أن في أوروبا اه والله لما من مدينة نصر للعتبه حوالي ربع ساعه وكمان الاتوبيس يبقي فاضي وأقعد فيه دي حاجه مفيش حد يتخيلها
محطات المترو امبارح كانت فاضيه فاضيه بجد
الدعوه كانت الامتناع عن الشراء والقعده في البيت
أعتقد أن النقطه دي نجحت بجد
الامن امبارح كان محاصر التحرير وميدان طلعت حرب
لو شافوا أتنين تلاته ماشيين مع بعض ممكن يعتقلوهم
وده مكانش في التحرير وبس ده كان في كل الجمهوريه
مع وجود كمية ضباب تسيطر علي تفكيري دلوقتي مش قادر أحلل الوضع بشكل عام
ولكن بحلله بشكل خاص مقتصرا علي اللي شوفتوابعنيه
أن شاء الله قريب أقدر أقيم الموقف بصوره أحسن
خالص تحياتي أستاذي العزيزي وبلاش الغيبه دي كلها تاني
تحياتي
alshared
أشكرك علي ثقتك في رأيي، هيا في النهاية رأي شخصي أنا واثق ولا بيودي ولا بيجيب.
بالنسبة لفشل او نجاح الإضراب، أنا أتمني ينجح، بس المشكلة إية معيار الفشل أو النجاح؟؟ لو إتحقق إية حيبقي نجح والعكس.
لو الهدف هوا إن الحكومة تعرف إن الناس تعبانة ومخنوقة، يبقي الإضراب فشل، لأن الحكومة عارفة إن الناس تعبانة ومعملتش حاجة، وضغط مش حتخاف منة
لو الهدف تخويف الحكومة من ثورة يبقي الإضراب فشل لأن محدش حيعمل ثورة والحكومة حتمسح بالمحلة الأرض علشان هيا إلي تخوف الشعب. إلا لو الشعب كلة قام بثورة جماعية في كل المحافظات. بس المشكلة الشعب مش واثق في حد علشان يقوم كلة بثورة واحدة وبعدين الحد دا يطلع عيل ويقولك مليش دعوة.
الحلول كتيرة وأسهل من كدة بكتير والحكومة مش حتقدر توقفها، إلي يقدم الحل دا ويقدم الخير للشعب هوا إلي حيثقوا فية وساعتها يبقي في كلام تاني.
أشكرك
ربنا يستر والموضوع ميكبرش
الناس مشحونة, والحكومة زى التيس الغبى ..وكرة النار لو أدحرجت محدش هيعرف يوقفها
يا حازم، ولا حتتدحرج ولا حتكبر، لأن مفيش قاعدة أو ضهر للمحلة، مفيش حد موجههم ومفيش حد بيساعدهم، فكل واحد بيعمل إلي هوا عايزة من غير تنسيق، ومبقاش في مطالب، بقي في هوجة وبس.
شوفت في كام مدونة كانت بتهلل للإضراب؟؟ قلي كام مدونة دلوقتي بتفتكر إلي بيحصل في المحلة ومتابعة؟؟ 90% نفضوا إيدهم وكأن مالهومش دعوة.
اتفقت معاك على حاجه واحده
اضرب المربوط يخاف السايب او العكس مش عارفه المهم انهم قالك من البدايه خالص من زمااااااااااان من اللى دعى للحاجات دى اول ناس هما عمال المحله فقالك درس ويأخدوه زى ما عملوا فى بورسعيد
وشكرا
ههههههههه متزعلش من اختك انت عارف انها بتحدف قلل وانت اللى استفذتنى بقى الله
انا قدمت لك اعتذار على خروف مشوى هناك ابقى تعالى شيله علشان مش يبوظ
أبدا يا Appy مش حزعل منك، وخلي بالك انا بموت في الخرفان المشوية، بس يا ريت يكون محشي رز :)
كلة فك من قصة المحلة وقعد من بعيد يقولك "يا حراااام.. غلبانين" بس محدش جرؤ يعمل حاجة، شعللوها وفكوا.
دا درس لعمال المحلة وللشعب المصري إن ملهومش دية غير عن طريق العمل الجماعي إلي بيقودة شخص او حزب أو جهة مسئولة وظاهرة للجميع وليها أهداف شعبية واضحة ومحددة.
بجد "مصرنا لنا" ولازم نحافظ عليها.
المشكلة شم فى المحله ولا اضرب المربوط يخاف السايب المشكلة اننا مش عارفين نتحد كل واحد مستنى قائد
انما بالنسبة للاضراب فهو بالفعل نجح على الاقل معظم الناس تخلت عن سلبيتها
السلام عليكم
الضرب نجح اه الاضراب نجح فيين اللي يقول انه نجح
البلطجية اغتنوا اه
وبتوع الذهب افتقروا اه
اصحاب العربيات اللي سايبنها في الشوارع اتكسرت اه يستاهللوا راكبين عربيات واحنا مش بناكل عيش
امال وبتوع المحلات كمان
سواق القطار اتبطح وفي المستشفى اه معلش
القطار اتحرق والتاني اتكسر ههنصلحه من الضرايب ادفع يا شعب
ياترى كان دة صح ؟؟
فين التنظيم للاضراب دة اختاروا 6 ابريل علشان غاندي عمل اضراب فيه
طب ما عملتوش زي غاندي ليه؟؟!!
مش عارفين تجتمعوا لا ععلى قائد ولا عارففين حتى نعمل اضرب يبقى احنا بنعمل ايه ؟؟
ااخوان الجماعة الوحشة ما شاركتش وقالوا دول كدابين وباعوا الشعب
طيب لو شاركوا كنتوا هتقولوا ايه مش هيتقال برضه دول عاوزين يقلببوا الحكم والشعب علشان مصالحهم
طب والحزب الوطني مش حزب ببرضه ؟؟
تعازيا للناس اللي انضربت ومعلش علقة تفوت
ماذا بعد ننتظر
تحياتي
سيدى الفاضل
بغض النظر على ان الاضراب ده نجح او لا او هو صح ولا لا او هو حتى ها يجيب نتيجه ولا لا
بس انا شفت على غير توقعى ان فيه تغير حصل فى اليوم ده
مش بالذمه لما المصرين يفكروا فى حاجه غير الاكل والشرب ومتشات الكوره والحبايه الزرقا
ده يبقى تقدم ؟
ولو حتى ماجابتش نتيجه
مجرد التفكير يعتبر تقدم وتحرر من التنبله
وبالنسبه لرايك عن موضوع ال\ضرابات الدكاتره والعمال وموظفين الضرايب
اكيد فيه كتير جدا منهم ماعندوش ذمه ولاضمير
بس فيهم عندهم ذمه وضمير
موظف المحله بياخد فى الشهر 400 جنيه
شوف انت ها يعملوا له ايه وهو متجوز وعنده عيال
بلاش التعميم فى كل حاجه
تحياتى
Desert Cat، صدقيني يا قطة المشكلة في القائد، مش لازم يكون قائد سياسي، الحقيقة مش لازم سياسة خالص... خلي السياسة كلها والإنتخابات كلها للحزب الوطني بالهنا والشفا... المهم قائد شعبي مالوش أغراض... مش لازم قائد واحد، جمعية، حزب أي إسم ينسق للمصريين.
إلي كان لازم يتعمل من زمان هو مقاطعة إضرابية لأمور محددة: سلع، خدمات، موبايل، رشوة، فساد.... الشهر دا مثلا مفيش شرا لحمة... وإذا السعر منزلش كمان شهر. الشهر إلي بعدة مفيش مكرونة، مفيش رز، مفيش ..إلخ
واللة كلة حينزل السعر، لأن كل المنتجين مجرمين ومحتكرين.
وإذا كان الناس عايزين يعملوا إضراب، طب ما يضربوا عن السلع، يهملوا غرفة معلومات مركزية تفضح وتجرس إالي بيهرب دقيق، غلي بياخد رشوة، إلي بيحط فورمالين في اللبن.....
في أفكار كتير، مدام الإضراب نجح (مش عارف نجح في إية)... طب مانستغل الروح العالية للمواطنين دلوقتي ونبتدي.
nonoymm
يبقي دلوقتي منتظرين الناس الفاشلة يقعدوا في بيوتهم، كفاية أوي كدة. الأحداث الأخيرة كشفت حاجات كتيرة أوي، بس معظم المهللين إختاروا يا إما يتجاهلوا النتائج ويكملوا تهليل، يا إما يدوروا علي موضوع تاني يهللوا علية، إضراب تاني مثلا.
طبعا مش المقصود الحكومة بالكلام دا، الحكومة دي ست الجميع وفوق راسنا كلنا أردنا أم لم نرد، مخطئة أم منصفة.
nody_1987
عندك حق، أنا فعلا غلطان لما عممت، لأن كل مهنة فيها الكويس والوحش. إنما طبعا المفهوم إني بتكلم علي الوحش هنا، والمشكلة إن علمونا في علوم الإدارة إن عميل واحد غضبان بيساوي 10 عملاء مفقودين... فعامل او طبيب أو موظف فاسد بيقابل مواطن بطريقة مستفزة ويطلب رشوة بيساوي في دماغ المواطن 10 موظفين فاسدين... وهكذا بالنسبة لعامل بيزوغ وطبيب مهمل ...الخ
موضوع الأجور دا موضوع شائك ولو قلت رأيي حيزعل كل الأطراف مني، لإن إلي شوفتوا في حياتي مختلف عن كل إلي الناس بيتكلموا عنة، فغالبا ناس قليلة أوي حتعرف أنا بتكلم عن إية. أنا مش حاجة فريدة ولا محصلتش قبل كدة، أنا أقل واحد في كام مليون مواطن فهموا السكة صح من الأول.
يا ريت بقي التغيير المحسوس، والأمل إلي الناس حاسة بية، يا ريت يبقي إيجابي ويستغل صح.... وإلا حيبقي عامل زي التطور الطبيعي للحاجة الساقعة.
الناس كلها بتتكلم عن الاضراب
تقريبا دا عاشر تعليق عن موضوع الاضراب
عموما
انا بحترم التجربه دى جدا
اتمنى نتقابل تانى فى حاجه تانيه
يا استاذى الاضراب نجح كخطوة ايجابية الشعب بدأ يتحرك بصرف النظر عن احداث المحلة الاضراب مش كان فى المحلة بس .. الاضراب واللى حصل فى المحلة مش من اهلها ... اهل المحلة اول ناس قالت يا اضرابات واعتصامات وعمرها ما كانت باهمجية دى ...
الا مين بقى اللى مغمية نفسها وداخله تقول عووو دى ... لما تحبى تتكلمى يا تتكلمى فى الموضوع يا توجهى كلامك لصاحب البلوج مش تردى على ردود حد قبلك .. يا اما لو مش لاقيه كلام تكتبيه تحطى نقابلك فى بؤك وتتكتمى خالص .... مع احترامى لصاحب البلوج بس معلشى الرد استفزنى وانت عارف انا مستفزة من العالم دى خلقه
احترامى وتقديرى لحضرتك مش لحد تانى
إرسال تعليق