كلنا محمود

من فترة طويلة متابع برنامج "البيت بيتك"، حلقات محمود سعد بس، الأخ تامر أمين مش مستظرفوا أوي، وحلقاتوا وطريقة إدارة حواراتة مع الضيوف فيها شوية تصنع من وجهة نظري، إنما محمود سعد بحس معاة بـ Flow في تسلسل الحوار، وبساطة في التعامل.

ما علينا مش دا موضوعي، إنما يعنيني هنا الفقره إلي بيقدمها للناس الغلابة مش مهم إسمها إيه، والي بيتقال إنوا بيحصل لمحمود سعد قبل ما يدخل الستوديو، مظاهرات من ناس غلابة وأصحاب شكاوي، وكل دول عايزين يقابلوه علشان يحللهم مشاكلهم. قريت إنهم بيستنوه من الفجر، وساعات بيباتوا من بليل. الشهادة للة إنوا ما بيقصرش أبدا، بيسخر إمكانياتة كلها للمشاكل دي، وبيحاول علي قد جهده يحل أكبر قدر منها، خلوا بالكم دا مقدم برامج وبيحل المشاكل دي مش بصفتة عضو في الحكومة أو المجلس المحلية، دا عندة شغل تاني تقيل من إعداد البرنامج للتنسيق مع الضيوف لتحضير الأسئلة لإدارة الحلقة، وفي نفس الوقت هوا مواطن جاي في الزحمة وناجي من مخاطر المحور وخلافة.

وفي الأخر زي ما قال في الحلقة الأخيرة يوم الأربعاء بيلاقي ناس بتدعي علية وعلي عيلتة، بس هوا سامحهم لأنوا عارف إن عندهم مشاكل هداهم.

الحكاية دي بتدل علي مدي القصور الشديد في الحكومة وأجهزتها الإدارية، دا شيء مش جديد وأنا مأكتشفتوش لوحدي، الحكومة ماتت وشبعت موت، والفساد في المحليات بقي للركب علي رأي زكريا عزمي ومحدش منهم عايز ولا ناوي يحل أي مشكلة، بل مببالغش لو قلت إنهم يمكن يكونوا بيخلقوا المشاكل علشان الناس تتهد. وكمان الحكايه دي بتدل علي فساد الأحزاب والحركات والجماعات الموجودة في المجتمع، كلها بدون إستثناء، وعلي اقل تقدير لحسن النوايا، تدل علي مدي التخلف الفكري الي هما عايشين فية، وإن مش بس معندهمش خطط إقتصادية وسياسية ويمكن كمان مسمعوش عنها، لأ دول معندهمش حسن تقدير للأمور.

ليه بقي أنا بتكلم عن الموضوع دا؟ حرق دمي موت الدعوة لإضراب عام يوم 6 إبريل، دعوة مستهترة والي بيدعو ليها مستهتر، ومش بس بيستخف بعقولنا وعقول الغلابة الي ممكن يصدقوهم، لأ دا ممكن يتقال إنهم بيستغلوا سذاجة فئات معينة من الشعب علشان يستغلوهم لمصلحتهم ولتنفيذ أغراضهم. إضرابات مجرمة من عمال وموظفين مجرمين أساسا في حق بلدهم وبعدين بيطالبوا بزيادة الأجور، العامل أو الموظف دا مبيساويش أي حاجة في أي سوق عمل، عندة اضعف إنتاجية واضعف معدل شغل في العالم وبجحين. بس دا موضوع تاني.

إنما بقي الأحزاب والجماعات دي عايزة إية بالظبط؟ عايزين إننا نقول للحكومة إننا زهقنا؟؟ آه إحنا زهقنا، أهو "زهقنااااااا"......

حلو كدة؟؟ وبعدين؟؟ حد حل مشاكلنا؟؟ هوا دا برنامج حل المشاكل عندكوا، إضراب؟؟؟ برروروم؟؟ شغلتكم في مصر برروروم؟؟؟ يا ناس يا مؤمنين بالذمة مصدقين نفسكوا؟؟ طب مصدقين كام واحد حيشارك في الإضراب؟؟ إنتوا بتعلموا الشعب يستلبط بدل ما يزود إنتاج؟؟ بدل ما تعلموا الشعب يعملوا حاجة صح تعلموة الإضراب وخلاص؟؟

يص يا شاطر منك لة إزاي فرد واحد كل إسبوع بيحل مشاكل الناس، سيبكم من المشاكل الي بتستدعي تدخل محافظ والا وزير علشان محدش يقولي دا راجل واصل للناس الي في العالي وإحنا محدش بيسمعنا، بصوا للمشاكل إلي لما يقول واحد محتاج نص مليون تلاقي مليون جالوا، واحد محتاج عملية و50 ألف يورو تلاقي الدنيا كلها قامت في مصر ويتلم المبلغ في مفيش ويطلع 10 دكاترة عندهم إستعداد يعملوها ببلاش .... وغيره وغيره.

يعني يا شاطر منك لة علشان قاعدتكم تكون لا مؤاخذه عريضة لازم تعلموا الناس، لازم تعملوا للناس، إذا كان في واحد زي محمود سعد بيعمل مجهودة يخدم الناس، فما بالكم لو في مليون زيه، طب لية ميبقاش كل الناس محمود، في كل شارع محمود، في كل حي 100 محمود في كل محافظة 10 آلاف محمود، لية ميبقاش دا مثل (مهما كان رأيكم فية إلي هوا مش رأيي)، لية ميبقاش دا فكرنا...... الحكومة ماتت وغرقانه في حروبها الداخلية وترتيب المصالح، إحنا لسة عايشين وإحنا إلي حنفضل عايشين، هما مهما طال الزمن حيروحوا مطرح محيروحوا.

علمني مديري زمان حاجة جميلة أوي، نفعتني جدا في حياتي.... كان بيقولي ماتجيش تعرض عليا مشكلة غير لما يكون معاك علي الأقل حل واحد. لو في مشكلة في الشغل أروح أعرضها بس لازم يكون عندي حل أو وجهة نظر في حل، نتناقش فية مش في المشكلة. المشكلة موجودة وحصلت خلاص، حلها إية بقي؟؟

إنما الشطار الحلوين شايفين المشاكل ومشاركين فيها ونفسهم ومني عينهم يشاركوا في الحكم، بس معندهمش حلول أحسن من حلول الحكومة، نفس السكتش.... ثلاثي أضواء المسرح.

هل صحيح إنهم "أخذ يفكر ويفكر" وهداهم تفكيرهم لإضراب عام بس؟؟ محاولوش يفكروا يهذبوا الشعب دا إزاي؟ يعلموه إزاي تكبر قيمتة في سوق العمل؟؟ محاولوش يتدخلوا في مشاكل الناس ويحلوها علي مستوي القاعدة؟؟ محمود سعد بيحل مشاكل بعض الناس من ستوديو تليفزيون، هما مش قادرين يلفوا علي الناس ويحلوا مشاكلهم؟؟ واللة العظيم حتتحل، إلي عايز يتجوز نجوزة، إلي عايز يشتغل نشغلة، إلي عايز يتعالج نعالجه، في مشكلة عيش نحلها، ناس بتهرب دقيق نبلغ عنهم، ناس بتبيع حشيش وبانجو نوقفهم عند حدهم، عايزين مستشفيات نبني (أمال مستشفي السرطان كمثل بنيتها الحكومة مثلا)، مشكلة تعليم نعلم.

واللة واحده واحده والناس حتمشي وراكم كلها وحتساعد، ومش حبالغ لو قلت الحكومة حتتكسف علي دمها وحتحاول يكون ليها دور... لأ لازم حيكون ليها دور وإلا حيسقطوا نهائي.

ساعتها يا شطار يا حلوين تقدروا تتكلموا عن إضراب، عامل مثقف بيحترم شغلة مش بيزوغ، ناس عندها وعي وطني وفاهمين قيمة البلد، مسلمين ومسحيين فاهمين قيمة المواطنة صح مش كل واحد واخد في وشة وطايح.

إقعدوا في بيوتكم وإضربوا، بس وحياة إلي خلقكم، لو بتحبوا البلد، لتقعدوا في بيوتكم علطول ومتواروناش وشكم تاني، وأنا واثق إنكم أجبن وأسفل من إنكم تنفذوا دا.