أول يوم معايا - كان لسة عمرهم 6 اسابيع
لسة أطفال خالص
هنا مع الكلب التالت، بس دي صوره نادرة جدا، اصلا بشوفوا بالعافية ... التانيين تقريبا معايا 24 ساعة
مش عارف فاكرة نفسها إيى يعني، دي حيالله مرمية علي رمل :) .... دي الملكة Luna، وفي الضهر العمال في المزرعة، كنا لسة بنبني.
وش إجرام من صغرهم :)
وضع المراقبة
دي المتوحشة - إجرام، عند، وتمسك أجدع كلب في الحتة ترنوا علقة طحن وترجع ولا كأن في حاجة حصلت
دي حبيبة قلبي البرنسيس Luna، غمزة إنما إية - يا واد إنت يالي مدوخهم :)
سرعتهم هنا رهيبة - صواريخ - لو فكرت أجري، قبل محرك تاني رجل بيكونوا وصلولي ونطوا عليا - أهو هنا في الغابة، بس عند النهر، بندم إني مخدتش الكاميرا التانية وصورت بالموبايل...... المرة الجاية إنشاء اللة
دا وضع الصيد، علشان تعرفوا إن لسة أصلهم بتاع الذئاب في دمهم - المتوحشة Mina
بس خلاص :)
هناك ١٧ تعليقًا:
جميلة الملكة Luna
انا بعد اذنك لطشت الصورة بتاعتها
وأنا مسميهم كمان Blondi و Blacki علشان ألوانهم.
ايه ده كلاب
انا هخرج يا عم من المدونه دي
بلاش كلاب بعد اذنك عشان انا طبعا طبعا مش بخاف منهم
....
المهم
...
انا اتصفحت مدونتك وقريت كتير منها بقالي بالظبك بتاع ساعه الا ربع بقرا هنا
بجد مدونه هيايله وطريقتك في الكتابه مميزه جدا
تحياتي
لااااااااااا عااااااااااااا
كده حرام بجد
بسم الله ماشاء الله حلوين جدا
اصلى استاذه فى موضوع الكلاب ده وتربيتهم
بجد ميرسى للصور
سورى حضرتك
الكلاب دول نجاسه
دي كلاب جيرمن شيبرد ، دول أحن كلاب في الدنيا على أصحابها ، وكمان شرسين جدا وقت اللزوم أنا عندي في مصر باريس مجرمه وحنينه وبتكتئب وعايزه تدلع دايما لأنها أنثي ، أما الواد فيجو ده رودفيلر ربنا مايوري حد أجرام أصلي هوهوه على طول بمناسبه ومن غير مناسبه ، وجبناهم صغيرين وكبروا وبقم من أفراد العيله بيوحشوني وساعات أقول لبنتي أفتحي سماعه التليفون علشان أكلمهم ، والله بيعرفوا صوتي ويهزوا راسهم زي لما بيشفوني العل معاهم ، والله الكلاب أوفي وأطيب من البشر
شكلهم ظريف ماشاء الله...بس انا ماليش في الكلاب بصراحة...أنا من مشجعي القطط :-)
اخص عليك ياكافر يا ملعون يا نجس
كلاب
انجاس
انجاس
انجاس
انت اصلا مدونة كافره وبنت دين كلب
بتعبد الكلاب وتربيهم ايه الفرق بينك وبين الملاعيين النصاري
ازاي تربي حاجة زي القذاره الي في الصور دي
انت متعرفش الرسول عليه الصلاه والسلام قال ايه عنهم
الم تعرف ان من ينجس الانسان ويمنعه من الصلاه والتزام الوضوع هو المرأه والكلب والحمار
الا لعنه الله عليكم يا اتباع العلمانية وتضع القران وتحتة صور الكلاب
اذهب لعنه الله عليك والملائكة والناس اجمعين
لا ردك الله
اتفو علي شكلك
الأخ غير معروف
أنا واثق تماما إنك مش مسلم أصلا لأنك بتقول كلام هطل ومفيش واحد مسلم بيشتم بالدين، فواضح إنك يا يهودي إسرائيلي، با من العالم بتوع "المهبط".
كلام في سرك، لو عايز تعمل مسلم متشدد وتهاجم بطريقة المسلمين المتشددين تعلالي أديك شوية دروس حتعجبك.
سلام يا .... غير معروف
غير المعروف ده طبعا موش مسلم متدين لأنه بيسب الدين أولا، وأول مره أعرف ===============كلام مقتبس
الم تعرف ان من ينجس الانسان ويمنعه من الصلاه والتزام الوضوع هو المرأه والكلب والحمار=============موش فاهمه الكلام ده جابه منين ،وبعدين لعاب الكلب فقط اللي نجس ، لكن المفتي ومعظم الأئمه قالوا لو أنت متوضي ولمست جسم الكلب لاينقض الوضوء لكن أذا لمست لعابه أو لحس يدك او جسمك لابد من غسل المكان أربع مرات ثم نقوم بالوضوء ثانية ، كما أباح الأسلام تربية الكلاب للحراسة، وأسم بالله العظيم أن لعاب الكلب أنظف من ناس كتير حولنا ، فأنا كلبتي باريس جيرمن شيبر حساسه بشكل ووفيه بشكل وبتبكي وبيجي لها أكتئاب وبتحس بينا وكأنها أنسان وبتفهم حتى كلامنا اللي بنقوله ، كنت زمان أتعجب لما اشوف فيلم أجنبي وأشوف الناس أزاي مثلا لو قامت حريقه في البيت يبقى مهتم أوي أنه يجيب الكلب بتاعه وينقذه ،ولما تسمي الكلب على أسم واحد من الأجانب يفرح ويقول لك قد كده أنت بتحبني ؟؟، عرفت أن عندهم حق لما ربيت كلاب ، والله دول بيعلموا الأنسان الحنيه ، دي بنتي ماكنش يعجبها العجب ولا الصيام في رجب ، تلاقيها بتحميهم وتأكلهم وتنضفهم ، وتبكي لو حد فيهم وقع من السلم ، أو رجله أتخبطت في حاجه جامده ،،،،،،،،وفعلا أنت فهمت انه يهودي وجاي يضرب فتيل بينا وبين أخوانا المسحيين وهو موش عارف يتكلم كلام المسلمين ، وأحلا رد انك فهمته وجبته من الآخر
بالظبط يا مكسوفة، الكلاب دي عندها ذكاء ووفاء وإرتباط مش موجود في ناس كتير اوي.
وبالنسبة للنجاسة أنا مش حأفتي في الموضوع دة، وإن كان عندي شك (معلش) لأن أهل الكهف كان معاهم كلب ونام معاهم وقام معاهم، ومش معقول ربنا يضرب مثل بحاجة نجسة مينفعش نقرب منها.... أمل يتقال علي الخنازير إية؟؟ تعالي شوفي قرفهم وريحتهم وصوتهم!!! لأ، وأنا عايش في أكبر دوله مستهلكة للخنازير في أوروبا :)
بالنسبة للي رد دا، اللعبة بقت معروفة ومكشوفة خالص، يشوفوا المدونة دي ميتها إية ويدخلوا يضربوا أسفين، لو مسيحي يهاجموا علي إنو مسلم، ولو مسلم يهاجمو علي إنو مسيحي، ولو إخوان يهاجمو علي إنة أمن دولة .... وهكذا
ما علينا، بحب أوي مشاركاتك بالتعليقات. أشكرك.
تصدق فعلا ، أنا كنت ناسيه حكاية أهل الكهف دي ، تعرف فيه أحاديث عن الرسول عن الكلاب موش ممكن يقبلها عقل ، هل يعقل أن الرسول صاحب الرسالة التي هدت البشرية الى الحق ، والذي قال له الله سبحانة وتعالي لو كنت فظا غليظ القلب لأنفضوا من حولك ، يدعو الى قتل الكلب الأسود لأنه كلما أشتد سواده كان نجسا، طيب أنا عايزه مبرر واحد يدعونا لتصديق العلاقه بين نجاسة الكلب ولونه الأسود ،وأحاديث أخري يأمرنا فيها بعدم قتل الحية ، وطبعا لايخفى على أحد أن الحية أذا تمكنت من لدغ أي أنسان ستقتله، أعتقد أن هذا الكلام غير حقيقي ومدسوس على أحاديث الرسول ،،،،ديننا دين رحمه
===========================
أصلي بصراحه بقيت مهتمه بقصص الكلاب دي قوي ، بعد ماربناهم وحسيت أنهم أوفي وأحن من البشر ، يبصولك كأنهم بيتكلموا معاك ، تكلمهم كأنهم فاهمين، يدافعوا عنك بحياتهم ، متوحشين مع أي حد شكله جاي يضرك وفي نفس الوقت بيموتوامن الخوف منك لما يكونوا عملوا حاجه غلط وأنت تزعق فيهم ، بص تعرف حكاية أهل الكهف دي كانت غايبه عني بجد كويس أنك ذكرتها
========================
وصفك للكلاب جميل جدا بجد، وأنا شوفت صور كلابك في بوست عندك من مدة طويلة، شكلهم جميل ماشاء اللة.
كمان الكلاب الولف بالذات مميزين في كل حاجة، أولا كلاب حراسة درجة أولي.... مش ممكن يعيشوا غير في مجتمع بيتفاعلوا فية مع بني أدمين.... عندهم قدرة عالية جدا في التمميز بين الخطر والطبيعي، وبين الصديق والعدو... في قوانين الأتحاد الأوروبي، أي كلاب في حجمهم لازم يمشوا بكمامة في الشارع، ما عدا الولف هوا إلي مستثني، عمرك ما تلاقي أي وولف بيهاجم بني أدم وهوا خارج بيتة أو حدودة.
أما بقي لو عملوا حاجة غلط زي ما بتقولي بالظبط، عينهم بتشر رعب وودانهم بتقلب ورا :) كل لما آجي أزعق مأدرش، لازم أضحك.... وبيقروا عيني قبل ما أنطق.
واللة في بني أدمين معندهمش نص ذكائهم.
بالنسبة لموضوع أهل الكهف، دي مش فتوي مني بتحلل أي حاجة خلي بالك، بس دي ممكن تكون معني لحاجة:
وَتَحْسَبُهُمْ أَيْقَاظًا وَهُمْ رُقُودٌ وَنُقَلِّبُهُمْ ذَاتَ الْيَمِينِ وَذَاتَ الشِّمَالِ وَكَلْبُهُمْ بَاسِطٌ ذِرَاعَيْهِ بِالْوَصِيدِ لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَارًا وَلَمُلِئْتَ مِنْهُمْ رُعْبًا.
دي فكرة قريتها من عشر سنين أو أكتر في عمود الأستاذ أحمد بهجت في الأهرام، بس هوا نفسة مكانش متأكد منها. بس برضة لما تقري تفسيرات الأية السابقة، تلاقي المفسرين بيحاولوا يتفادوا التضارب بين فكرة وجود كلب في الكهف وحديث: لا تدخل الملائكة بيت فية كلب .... منهم بيقول إن دا مش كلب دا كان طباخ الملك وكانوا بيسموهم كلاب، ومنهم إلي قال الكلب فضل برة الكهف، ومنهم بيقولك دا كلب صيد أو رعي غنم فمفيش في مشكلة .... ومفسرين طنشوا الفكرة أساسا.
مش ممكن أفتي في حاجة زي كدة. ربنا يرحمنا.
تعرف باريس كانت من يومين حاتموت ، حرارتها مرتفعه من أسبوع لأنها مسكينة صغيرة وبعد أول دورة حملت للأسف وأجهضت ، وكانت أول أمبارح بتموت ، وجابوا لها الدكتور حط لها جلوكوز،وبدأت تتشنج وتطلع رغاوي من بقها ، وبنتي وزوجي كانوا في حاله نفسية صعبه وأنا من بره بأشاركهم بالتليفون ، وقعدت أدعى لها طول اليوم وأقول له يارب مخلوقة ضعيفة من مخلوقاتك يارب ، اشفيها وحوش عنها ، طبعا لو حد سمع الكلام ده حا يتهمني بالكفر والنجاسه وغيرها ،لدرجة أن زميلاتي لما يكلموني ويلاقوني بأعيط علشانها بيقعدوا يقولوا لي بتعيطي علشان كلبه ، أقول لهم ياريتكم بقوا زيها ، والله عمري ما شفت زوجي يبكي الا ببكاء أو مرض باريس ، لكن الحمد الله تاني يوم ودوها العياده وعملوا لها تنظيف للرحم وأدوها برضه جلوكوز ومضاد حيوي وفيتامين ، يعني فاقت شويه ، والله فيهم انسانية أكثر من البشر أنفسهم.
وباريس بقي لما تدلع وزي مابتقول بنتي دايما تقوم جايبه ودانها كاريه على الجناب ، حبيبة قلبي ربنا يشفيها .
ولا كفر ولا حاجة، هوا الواحد لما بيتعاطف مع الحيوان يبقي كافر؟؟ دا لما الواحد بيتعاطف مع الحيوان بيبقي إيمانة أحسن .... مش فاكرة قصة الأعرابي والكلب العطشان؟؟ بصي الرابط دا http://hadith.al-islam.com/Display/Display.asp?hnum=2187&doc=4
ونفس الموضوع برضة: http://www.ahram.org.eg/archive/2002/11/14/RAMA8.HTM
وعلي فكرة، دا بيثبت أفكار عندي بأن موضوع نجاسة الكلب وقتل الكلب الأسود دي خيالات، يعني أهو ربنا غفر لشخص شرب كلب مقتلوش.... بس برضة مقدرش أفتي.
أما بقي موضوع ودان الولف إلي بتيجي لورا أو بتقلب كارية زي ما بنتك بتقول، فأعتقد إن دي رسالة لصاحبهم إنهم Submitting لية، يعني بيفهموه إنة هوا الماستر. حتي في اللعب معايا لازم ودانهم ورا علشان يفهموني إنهم مش بيهاجموني .... إنما لما يكون في حد غريب أو بيدافعوا عن مكانهم لازم ودانهم تبقي مرفوعة. دي ملاحظة شوفتها معاهم.
وعلي فكرة بيتهيئلي بيضحكوا ساعات وبيكون وشهم كلو بيضحك، وبيفهموا أوي لما أتريق عليهم، أو لو أكون متنرفز ومش عايزهم جنبي دلوقتي. وبيعرفوا يفرقوا أوي بين الندهة نظام "إحفظ مركزك" .... والندهة بتاعت "تعالوا نلعب".
ألف سلامة لباريس، إنشاء اللة تتطمني عليها وتبقي كويسة.
ازيك ياغالى
انا زايك بعشق الكلاب
و ربيت كلاب كتير اخر حاجه كنت عندى النجم ريكو
كان كلب بلاك جاك بلجيكى
و قولت عليه النجم لانه كان وسيم اوى
ولعبى اوى مكنش فى حد يشوفه غير لم بيحبه بيخاف من الكلاب او مش بيخاف بيحبه بس للاسف معنديش ولا صوره ليه
وبنصح اى حد بيحب الكلاب يجيب بلجيكى
لانى الولف البلجيكى اوسم الكلاب الولفيه كمان من ازكى الكلاب
الكلب بتاعى كان فى حاجه جميله اوى بيعرف منه مين جالنى تحت البيت لانى كان بيعرف العربيات بتاعه قريبنا وينبح لم يجواالكلاب عالم جميل من الوفاء فقدناها مع البشر
السلام عليكم
تحيه لكل انسان علق
انا محمد من الاسكندريه
الاخ ئلى شتم ده مش مسلم
او ميعرفش اسلامه كويس
انا كنت بعانى من حكايه نجاست الكلاب
طيب تعالو معايه نتكلم براحه الكلب نجس ليه لانه فى نوع بيلحس و ده الكلاب البكينى ام الولف مش لحاس طيب يعنى مفهوش نجاس فيه بس فين فى بوقه
يعنى متخلهوش يلحسك او لسانه يلمس جسمك
وده سهل اوى لو عودته على كده بكده تبقى تجنبت النجاسه وطبعا
لو انت مسلم متخلهوش يكون فى البيت تخليه فى الجنينه او فى البلكونه لانى بيمنع دخول المليكه و لو انت بتصلى فى البيت المكان ئلى بيمشى فيه مش حيكون طاهر دى معلومات جمعتها من ناس اكبر منى و شيوخ صحابى لم عرفوا نى صعب اسيب فكرت تربيت الكلاب بس سبتها و بعت كلبى لانى عزلت فى عماره تحتيها جامع و كان من الطبيعى انى ابيعه
إرسال تعليق