معلش، دا موضوع قديم أوي، ودول كلمتين نفسي أقولهم وأخلص ذمتي، استحملوني.
أبو تريكة في كاس الأمم الأفريقية رفع شعار "تعاطفا مع غزة"، في رأيي انه ركب الموجة وشرخ، عبر عن رأية وعن رأي اللي وراه، وعن رأي اللي قدامة، وعن رأي الأمة العربية، وعن رأي الأمة المهلبية والكسكسية. انما محدش رفع شعار "تعاطفا مع مصر"؟؟ كله عايز ينهش وييمضغ براحته وبعدين لا مؤاخذة في الكلمة يتكرع ويكمل نهش!! محدش فكر في الراجل اللي لبس ست ووقف في طابور الستات بتاع العيش علشان خمس ترغفة عيش؟؟ محدش مصدق إن في مصريين قربوا يفلئسوا لصاحب الفرن علشان يديهم عيش ياكلوا هما وعيلتهم؟؟ ورجالة عندهم استعداد يعملوا (أسف في اللفظ) نسوان علشان خمس ترغفة!! وبعدين "تعاطفا مع غزة"!! وبعدين بيصرخوا عايزين الناس تنتخبهم؟؟ واللي بيقولك جماعة الأغلبية!! أضحك والا ألطم والا أعمل اية؟؟ أغلبية ايه يا سيادنا، دا الرجالة لا مؤاخذة بقوا... والا بلاش. في لفظ واقف في زوري نفسي أقولة بس مينفعش هنا.
يا حزب الواطيين المتعاليين، يا جماعة الفسق المتأسلمين، يا حركات الجبن والسبهللة ولاد الكفاية والمصالح، يا أحزاب الكلام والتناطح الداخلي، يا دعاة الفضائيات والمؤتمرات، يا كل قادر في مصر، يا رب أدعوك بكل أسماءك الحسني، يا قوي يا رزاق يا باسط يا عفو يا رازق يا باسط يا فتاح يا عليم...... تعاطفا مع مصر. مصر لأن الشعب في إحتلال أشرس من الإحتلال الأسرائيلي، في هجمة أخطر من هجمة الصليبيين والتتار، الناس ولعت نار وعدمت الحيلة.
تعاطفا مع مصر يا أبو تريكة المره دي وحياة النبي علية الصلاة والسلام.
هناك ٤ تعليقات:
أولا تسلم ايدك ويسلم قلمك بس مين يفهم اللى انت قلته اذا كانت الناس مش عايزه تفهم وبلد زى القرع تمد بره وشوية نصابين بينصبوا على الشعب بشوية شعارات كدابه ولسه الناس بتصدق ربنا يستر عليك وعلينا وعلى مصر من شوية النصابين والحرامية الحنجورية
كمصري و من جماعة وائل عباس أعتقد أن هذا الموضوع سيهمك
http://dkaken.blogspot.com/2008/03/blog-post_11.html
طبعا الموضوع مع صور حلوة
السيد/جمال، واللة الموضوع في ايدنا، بس أغلب الناس مبتقراش حاجة ومبيشغلوش مخهم علشان يفهموا بية، مخهم بتاع حفظ بس: لما تشوف رمز الهلال، ابصم.... حاجة ساقطة.
الأخ أو الأخت أو الدكان بتاع التعليق التاني، أنا مش فاهم اية علاقتك بالموضوع التافة اللي سيبتلي عنوانة دة، فلو عايز تلفت نظري لية يبقي شكرا، ولو ليك علاقة بية مباشرة تبقي انت في مستوي فكري مسمحش لنفسي انزلة. وبالنسبة للسيد/ وائل عباس، فهو مدون بيقول رأية، اللي أنا شخصيا مبوافقش علي أسلوبة في الحوار ولا افكارة ولكن بحترم فية شجاعتة وفهمة لفكرتة اللي بيعرضها من وجهة نظرة. وعلي فكرة، أنا مش من اي جماعة أو حزب أو مؤسسة أو حركة ولا عمري شوفت أي حد من المدونين، ولا يشرفني أن أنتمي لأي حاجة في مصر علي الأطلاق غير حبي للبلد وحبي لديني.
هاي
ديه اول مرة اخش مدونتك وعجبتني قوي. على فكرة انا كمان كتبت في نفس الموضوع يا ريت تشوفة وتقولي رايك
تعاطفاً مع مصر
http://migomishmish.blogspot.com/2008/02/blog-post_27.html
Love, MishMish
إرسال تعليق