هاتو فلوسكم علشان أهرب بيها

المفروض ان التكرار بيعلم الشطار، انما الظاهر ان كتير من المصريين مش ممكن يتقال عليهم شطار، انما ممكن يتقال عليهم أي لفظ تاني لأنهم مش ممكن حيتعلموا أبدا. سبحان اللة.

من شهر كنت بتابع برنامج 90 دقيقة لقيتهم بيتكلموا عن واحد خد من الناس مش عارف كام مليار جنية بحجة توظيفها في تجارة الموبايلات وكروت الشحن ويديهم فايدة شهرية 3 أو 4%، طبعا يا شطار لو حسبنا الفايدة حتكون بالميت 36%، فأية يا شطار، الناس ريلت جنيهات في جيب الراجل اللي في الأخر شرف في القسم والناس لسة مستنين فلوسها.

لغاية هنا ممكن نقول عادي، ونصاب والقانون لا يحمي ال... حلوين!

انما عملت بحث في الأنترنت لقيت ان الحالة دي متكررة 3 مرات في ظرف سنتين!! يا نهار أسود، هما الناس دي اية!!

اللي خلاني انفجر انو ظهرت قضية من كام يوم، نفس القصة والسيناريو، والفايده من 5 ل 7 %، والراجل مخدتش بالي هرب والا اتقبض علية، وحجم الأستثمار في قول 2 مليار جنية!

طلع واحد من اللي بيشتكوا، قالك دا راجل كان متدين وبيحج كل سنة، وكنا بنقابلوا في كافية، واللي خلاني أثق فية هو علاقاتة مع "أبناء مسئولين كبار في الدولة" اللي ظهر في الأخر أنة مثلا ابن مستشار والا قاضي والا ظابط"، ودا اللي خلا الراجل يثق فية علشان مش معقولة ابناء المسئولين يقعدوا مع حد مش موثوق فية او بيتاجر في تجارة مش مشروعة!!!

واحد تاني طالب الحكومة بتحمل مسئوليتها قدام الشعب وانها ملتزمة ترجع الفلوس دي تاني للناس!!! علي أساس ان الحكومة كان لازم تكون موقفة عسكري علي دماغ كل واحد بتراقبة، أو لأن الحكومة غنية وفلوسها كتير ولازم تصرف علي المواطنين القصر!!!

زمان كان فية قضايا الريان والشريف والسعد، ممكن نقول دي أول قضايا والناس مكانتش عارفة وكانت مغلفة بأقاويل عن الفساد وخلافة، وبعدين كل كام سنة تظهر قضايا نقول الناس بتنسي، انما في سنة واحدة تظهر 4 قضايا ورا بعض وكلهم نفس السيناريو(راجل متدين، علاقات قدام الناس، ايصالات أمانة، تجارة غير موجودة، أرباح غير معقولة) دي بقي مصيبة!

القضية هنا مش بس واحد خد فلوس الناس يستثمرها ومرجعهاش، كل واحد ذنبة علي جنبة ودي فلوسوا هوا حر يولع فيها، انما القضية او القضايا:

- الناس دي قصر؟؟ ما كل واحد بدل ما يدي فلوسة لحد تاني ويقعد يستني الفايدة الجهنمية، طب ما يحاول هوا يعمل التجارة دي، ماهياش ذرة يعني! طب ما يشتريلوا حتة ارض يزرعها والا بقرتين يربيهم هيا معضلة؟ ما الفلاحين بيعملوا كدة وبيكسبوا! انما هيا نظرية الأستسهال والتواكل والجهل اللي عاشين فيهم، لو في فايدة كبيرة نجري نرمي فلوسنا، ماهي العملية سهله، بيزنس بأه، مافيش أدني معرفة بالسوق ودرجات المخاطر... محدش حتي قري جرنال.

- كل واحد ربي دقنوا أو بيروح يحج كل سنة بقي شيخ ونقدر نثق فية بأموالنا وحياتنا ويمكن بعيالنا كمان.

- نفس القصة بتتكرر في البورصة (وشوفت ادام عنية من كام سنة ناس خسرت 2 أو 3 ملون جنية في البورصة). سهم تتطلع اشاعة انوا بيطلع، تجري الناس تشتري، وبعدين القصة معروفة، السهم ينزل ويقعدوا يعيطوا. بلاش معرفة بقوانين البورصات، بالعقل كدة... اية اللي حصل في الشركة دي بيخلي سهمها يرتفع، هيا مايكروسوفت والا بيبسي، دي بتبقي شركة أقل من محلية وخسرانة وطلاعان عينها كمانن اية اللي بيخلي قيمتها تعلي في يوم وليلة وبعدبن كل يوم!!

- بردوا كل واحد بيجري علي الحكومة،" ماما ماما عايز فلوسي من الراجل الوحش"، زي بردو "ماما ماما عايزين ناكل" "ماما ماما عايزين نخش الحمام"!!! الحكومة متنيلة ومش حتعمل حاجة خالص، والبلد بظرميط علي مر كل الحكومات، بس الناس مش عايزة تكبر وتاخد الأمور في ايديها، في رشوة مستسلمين، في فساد مستسلمين، في ارتفاع أسعار مستسلمين، وفي الأخر اية اللي بيحصل، الموظفين مبيشتغلوش وبيطالبوا برفع الأجور، طب ما تشتغلوا الأول!! موظفين (من الشعب برده) بياخدوا رشوة وبعدين لما يروحوا يخلصوا مصلحة بيتاخد منهم رشوة يقوموا يشتكوا ان الحكومة فاسدة!! أفران بتهرب الدقيق المدعوم وتبيعة برة بسعر عالي، وبعدين صاحب الفرن بيشتكي ان اسعار المواد الغذائية مرتفعة، ما هما كلهم مواطنين.

اللي عايز أقولوا ان الحكومة دي برضوا مواطنين زينا وبيعتمدوا في فسادهم علي مواطنين زينا، فمحدش يشتكي بقي.

وبعدين في سؤال غبي شوية بيدور في مخي: هيا الناس دي جابت الفلوس دي كلها منين؟؟ هيا البلد لسة فيها فلوس؟

يا رب الشطار يتعلموا.